ଅମରାବତି,୨୨ା୭: ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏନ୍. ଚନ୍ଦ୍ରବାବୁ ନାଇଡୁ ପୋଲାଭରମ୍ ପ୍ରକଳ୍ପ ପାଇଁ କେନ୍ଦ୍ର ସରକାରଙ୍କୁ ୧୨ ହଜାର କୋଟି ଟଙ୍କା ମାଗିଛନ୍ତି। ମଙ୍ଗଳବାର ସଂସଦରେ ୨୦୨୪-୨୫ ଆର୍ଥିକବର୍ଷ ପାଇଁ ପୂର୍ଣ୍ଣାଙ୍ଗ ବଜେଟ ଉପସ୍ଥାପନ ହେବାକୁ ଥିବାବେଳେ ଏହାର ଅବ୍ୟବହିତ ପୂର୍ବରୁ ଚନ୍ଦ୍ରବାବୁ ଏଭଳି ଦାବି କରି ଚାଲାକି ଦେଖାଇଥିବା କୁହାଯାଉଛି।
କେନ୍ଦ୍ରର ବଜେଟ ଅଧିବେଶନ ପୂର୍ବରୁ ଶନିବାର ଅମରାବତିରେ ତେଲୁଗୁ ଦେଶମ୍ ପାର୍ଟି (ଟିଡିପି) ସଂସଦୀୟ ଦଳର ଗୁରୁତ୍ୱପୂର୍ଣ୍ଣ ବୈଠକ ଅନୁଷ୍ଠିତ ହୋଇଛି। ଆନ୍ଧ୍ର ମୁଖ୍ୟମନ୍ତ୍ରୀ ତଥା ଟିଡିପି ସୁପ୍ରିମୋ ଚନ୍ଦ୍ରବାବୁ ଉକ୍ତ ବୈଠକରେ ଦଳୀୟ ଏମ୍ପିମାନଙ୍କୁ କେନ୍ଦ୍ର ନିକଟରେ ରାଜ୍ୟର ପ୍ରମୁଖ ପ୍ରସଙ୍ଗଗୁଡ଼ିକ ଉଠାଇବା ପାଇଁ ପରାମର୍ଶ ଦେଇଛନ୍ତି। ଚନ୍ଦ୍ରବାବୁ କହିଛନ୍ତି, ସମସ୍ତ ଏମ୍ପି ରାଜ୍ୟର ସ୍ବାର୍ଥକୁ ଗୁରୁତ୍ୱ ଦେବା ଉଚିତ। ସେମାନେ କେନ୍ଦ୍ରମନ୍ତ୍ରୀମାନଙ୍କ ନିକଟରେ ଆନ୍ଧ୍ରର ବିଭିନ୍ନ ପ୍ରସଙ୍ଗ ଉଠାନ୍ତୁ। ପ୍ରକଳ୍ପଗୁଡ଼ିକ ପାଇଁ ଆବଶ୍ୟକ ପାଣ୍ଠି ପ୍ରଦାନ ଲାଗି ଦାବି କରନ୍ତୁ। ଦରକାର ପଡ଼ିଲେ ରାଜ୍ୟର ମନ୍ତ୍ରୀମାନଙ୍କୁ ମଧ୍ୟ ସାଙ୍ଗରେ ନିଅନ୍ତୁ ବୋଲି ଚନ୍ଦ୍ରବାବୁ କହିଛନ୍ତି। ଲୋକ ସଭାରେ ଟିଡିପିର ୧୬ ଏମ୍ପି ରହିଛନ୍ତି। ଲୋକ ସଭା ନିର୍ବାଚନରେ ଭାଜପା ସଂଖ୍ୟାଗରିଷ୍ଠତା ନ ପାଇ ଏହି ଏମ୍ପିମାନଙ୍କ ସମର୍ଥନରେ ସରକାର ଗଢ଼ିଥିବାରୁ ଚନ୍ଦ୍ରବାବୁଙ୍କ ଏଭଳି ପରାମର୍ଶ ବିଶେଷ ଗୁରୁତ୍ୱ ବହନ କରେ।
ମିଳିଥିବା ସୂଚନାନୁସାରେ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ଗୋଦାବରୀ ନଦୀ ଉପରେ ନିର୍ମାଣାଧୀନ ପୋଲାଭରମ୍ ଓ ଅମରାବତି ପ୍ରକଳ୍ପ ଉପରେ ଗୁରୁତ୍ୱ ଦେଇଛନ୍ତି। ପୋଲାଭରମ୍ ପ୍ରକଳ୍ପର ପ୍ରଥମ ପର୍ଯ୍ୟାୟ କାର୍ଯ୍ୟ ସମ୍ପନ୍ନ କରିବା ପାଇଁ ୧୨,୧୫୭ କୋଟି ଟଙ୍କା ଆବଶ୍ୟକ। ତେଣୁ କେନ୍ଦ୍ରଠାରୁ ସେ ଏହି ଅର୍ଥ ଆଶା କରିଛନ୍ତି। ସେହିପରି ଗତ ୫ ବର୍ଷରେ ପ୍ରକଳ୍ପ ନିର୍ମାଣବେଳେ ଦେଖାଦେଇଥିବା ଢାଞ୍ଚାଗତ ତ୍ରୁଟିଗୁଡ଼ିକର ଅନୁଧ୍ୟାନ ପାଇଁ କେନ୍ଦ୍ର ସରକାର ଅନ୍ତର୍ଜାତୀୟ ବିଶେଷଜ୍ଞମାନଙ୍କୁ ଆଣି ପରିଦର୍ଶନ କରାନ୍ତୁ ବୋଲି ମଧ୍ୟ ସେ ଦାବି କରିଛନ୍ତି। ଅନ୍ୟପକ୍ଷେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ସଂଯୁକ୍ତ ଜନତା ଦଳ (ଜେଡିୟୁ) ସ୍ବତନ୍ତ୍ର ରାଜ୍ୟ ପାହ୍ୟା ଦାବି କରୁଛି।
ଲୋକ ସଭାରେ ଜେଡିୟୁର ୧୨ ସଦସ୍ୟ ଥିବାରୁ ତାଙ୍କ ଦାବିକୁ ମଧ୍ୟ କେନ୍ଦ୍ର ଅଣଦେଖା କରିପାରିବ ନାହିଁ। ଯଦି ଅଣଦେଖା କରେ ତେବେ ଚନ୍ଦ୍ରବାବୁ ଓ ନୀତୀଶ ସମର୍ଥନ ପ୍ରତ୍ୟାହାର କଲେ କେନ୍ଦ୍ରର ଏନ୍ଡିଏ ସରକାର ଭାଙ୍ଗିଯିବ। ଏହି ଜଟିଳ ସ୍ଥିତିକୁ ଦେଖି ସମାଜବାଦୀ ପାର୍ଟି (ଏସ୍ପି) ଅଧ୍ୟକ୍ଷ ଅଖିଳେଶ ଯାଦବ, ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ ରାଷ୍ଟ୍ରୀୟ ଜନତା ଦଳ (ଆର୍ଜେଡି) ମୁଖ୍ୟ ଲାଲୁ ପ୍ରସାଦ ଯାଦବ ‘ଏ ସରକାର ବର୍ଷେ ଚାଲିବ ନାହିଁ, ଭାଙ୍ଗିଯିବ’ ବୋଲି ବାରମ୍ବାର ଦୋହରାଉଛନ୍ତି। ଏଭଳି ସ୍ଥିତିରେ ସହଯୋଗୀ ଦଳଗୁଡ଼ିକୁ ଧରି ସରକାର ଚଳାଇବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପାଇଁ ବଡ଼ ଚ୍ୟାଲେଞ୍ଜ ହୋଇଛି। କାରଣ ବିନା ସଂଖ୍ୟାଗରିଷ୍ଠତାରେ ସରକାର ଚଳାଇବା ଅନୁଭବ ମୋଦିଙ୍କର ନାହିଁ।