ନୂଆଦିଲ୍ଲୀ, ୩ା୨: ଆନ୍ଧ୍ର ପ୍ରଦେଶରେ ନିର୍ମାଣାଧୀନ ବହୁମୁଖୀ ନଦୀବନ୍ଧ ପୋଲାଭରମ ପ୍ରକଳ୍ପ ଯୋଗୁ ଓଡ଼ିଶାର ଅନୂ୍ୟନ ୧୦୦୨ ପରିବାର ପ୍ରଭାବିତ ହେବେ। ସେଥିରୁ ୯୦୩ ପରିବାର ହେଉଛନ୍ତି ଆଦିବାସୀ। ରାଜ୍ୟ ସଭାରେ ବୁଧବାର ବିଜେଡି ସଦସ୍ୟ ସସ୍ମିତ ପାତ୍ର ପଚାରିଥିବା ଏକ ପ୍ରଶ୍ନର ଉତ୍ତରରେ ଆଦିବାସୀ ବ୍ୟାପାର ମନ୍ତ୍ରଣାଳୟ ପକ୍ଷରୁ ଏହି ସୂଚନା ଦିଆଯାଇଛି। ଉକ୍ତ ପ୍ରକଳ୍ପ ଯୋଗୁ ଓଡ଼ିଶା ଓ ଛତିଶଗଡ଼ର ଅଞ୍ଚଳକୁ ଜଳମଗ୍ନ ହେବାରୁ ଏଡ଼ାଇବା ପାଇଁ ସୁରକ୍ଷାତ୍ମକ ତଟବନ୍ଧ ନିର୍ମାଣର ପ୍ରସ୍ତାବ ଦିଆଯାଇଥିବା ପ୍ରୋଜେକ୍ଟ ପ୍ରପୋନେଣ୍ଟ ଅଥରିଟି ସୂଚନା ଦେଇଛନ୍ତି। ଏହା ନିର୍ମାଣ କରା ନ ଗଲେ ଓଡ଼ିଶାର ୧୦୦୨ ପରିବାର ପ୍ରଭାବିତ ହେବେ। ପ୍ରକଳ୍ପ ଯୋଗୁ ଆନ୍ଧ୍ରପ୍ରଦେଶରେ ବିସ୍ଥାପିତ ହୋଇଥିବା ମୋଟ ପରିବାର ସଂଖ୍ୟା ୧,୦୬,୦୦୬ ଯହିଁରୁ ୫୬,୫୦୪ ପରିବାରର ୧,୬୪,୭୫୨ ସଦସ୍ୟ ହେଉଛନ୍ତି ଆଦିବାସୀ।
ଆନ୍ଧ୍ର ସରକାରଙ୍କ ପକ୍ଷରୁ ଗୋଦାବରୀ ନଦୀରେ ନିର୍ମାଣାଧୀନ ପୋଲାଭରମ ପ୍ରକଳ୍ପକୁ ବିରୋଧ କରି ଓଡ଼ିଶା ୨୦୦୭ରେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲା। ଓଡ଼ିଶା ସରକାରଙ୍କ ପକ୍ଷରୁ ଏ ନେଇ ସର୍ବୋଚ୍ଚ ଅଦାଲତରେ ଏକ ଅରିଜିନାଲ ସୁଟ୍ ଦାଖଲ କରାଯାଇଛି। ଏହି ପ୍ରକଳ୍ପ ଯୋଗୁ ଓଡ଼ିଶାର ବହୁ ଅଞ୍ଚଳ ଜଳମଗ୍ନ ହୋଇଯିବ। ଫଳରେ ଅନେକ ଆଦିବାସୀ ପରିବାର ବାସଚ୍ୟୁତ ଓ ଭୂମିହୀନ ହୋଇଯିବେ ବୋଲି ଉକ୍ତ ଆବେଦନରେ ଉଲ୍ଲେଖ କରାଯାଇଛି। ୨୦୨୦ ଫେବୃୟାରୀ ପରଠାରୁ ଏହି ପିଟିଶନର ଶୁଣାଣି କରାଯାଇନାହିଁ।