ଭୁବନେଶ୍ୱର, ୮।୧୦(ବ୍ୟୁରୋ): ରାଜନେତା, ଚଳଚ୍ଚିତ୍ର ପ୍ରଯୋଜକ, ଅଭିନେତା, ବ୍ୟବସାୟୀ, ଉଚ୍ଚ ପଦସ୍ଥ ପ୍ରଶାସନିକ ତଥା ପୋଲିସ ଅଧିକାରୀଙ୍କୁ ମାୟା ଜାଲରେ ଫସାଉଥିଲେ। ସେମାନଙ୍କ ନିକଟକୁ ସୁନ୍ଦରୀ ଯୁବତୀ ପଠାଇବା ପରେ କୌଶଳକ୍ରମେ ଅନ୍ତରଙ୍ଗ ମୁହୂର୍ତ୍ତର ଭିଡିଓ ଶୁଟ୍ କରୁଥିଲେ। ତାହାକୁ ଭାଇରାଲ କରିଦେବାର ଧମକ ଦେଇ ସେମାନଙ୍କଠାରୁ ଟଙ୍କା ଆଦାୟ କରୁଥିଲେ। ଏପରି ବ୍ଲାକ୍ମେଲ୍ କରି ବହୁ କୋଟିର ସମ୍ପତ୍ତି ଠୁଳ କରିବା ସହ ବିଳାସପୂର୍ଣ୍ଣ ଜୀବନ ବିତାଉଥିବା ଜଣେ ମହିଳାଙ୍କୁ ନେଇ ଏବେ ଚାରିଆଡ଼େ ଚର୍ଚ୍ଚା। ସମ୍ପୃକ୍ତ ମହିଳା ବ୍ଲେକ୍ମେଲରଙ୍କୁ କମିଶନରେଟ ପୋଲିସ ଗିରଫ କରି ଶୁକ୍ରବାର ବିଳମ୍ବିତ ରାତିରେ ତରବରିଆ ଭାବେ କୋର୍ଟଚାଲାଣ କରିଥିଲା। ଏବେ ସେ ଜେଲରେ ଥିବାବେଳେ ଦୁଇ ଥାନା ଅଧିକାରୀଙ୍କଠାରୁ ଆରମ୍ଭ କରି କମିଶନରଙ୍କ ପର୍ଯ୍ୟନ୍ତ କେହି ତାଙ୍କ ସମ୍ପର୍କରେ ମୁହଁ ଖୋଲୁ ନ ଥିବାରୁ ଘଟଣା ରହସ୍ୟମୟ ହୋଇପଡିଛି।
ଅଭିଯୁକ୍ତା ମହିଳାଙ୍କ ଭଉଣୀ ଗଣମାଧ୍ୟମକୁ କହିଛନ୍ତି, ପୋଲିସ ତାଙ୍କ ଘରେ ପହଞ୍ଚତ୍ ସମସ୍ତଙ୍କୁ ବାଲିଅନ୍ତା ଥାନାକୁ ନେଇଥିଲା। ଏହାପରେ ଦିଦିଙ୍କୁ ପୋଲିସ ଅନ୍ୟ କେଉଁଠିକୁ ନେଇଯାଇଥିଲେ ବୋଲି ସେ କହିଛନ୍ତି। ତେବେ ଏନେଇ ବାଲିଅନ୍ତା ଥାନାଧିକାରୀ ଯୁବରାଜ ସ୍ବାଇଁଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କ ପ୍ରତିକ୍ରିୟା ମିଳିପାରି ନ ଥିଲା। ଖଣ୍ଡଗିରି ଥାନା ପକ୍ଷରୁ ତାଙ୍କୁ କୋର୍ଟଚାଲାଣ କରାଯାଇଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଥିବାବେଳେ ଥାନାଧିକାରୀ ଦୟାନିଧି ନାୟକ ଚୁପ୍ ରହିଛନ୍ତି। ସୂଚନା ପାଇବାକୁ ଡିସିପି ପ୍ରତୀକ ସିଂଙ୍କୁ ତାଙ୍କ ମୋବାଇଲ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସେ କଲ୍ କାଟି ଦେଇଥିଲେ। ଏପଟେ ଏପରି ଛୋଟ ମାମଲାରେ ନଜର ରଖୁ ନ ଥିବା ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ କହିଛନ୍ତି। ଅଭିଯୁକ୍ତାଙ୍କ ସହ ବହୁ ବଡ଼ବଡ଼ିଆ, ପ୍ରତିଷ୍ଠିତ ଓ ପ୍ରଭାବଶାଳୀଙ୍କ ବ୍ୟକ୍ତିଙ୍କ ଲିଙ୍କ୍ ରହିଛି। ତେଣୁ ପୋଲିସ ଚାପରେ ଚୁପ୍ ରହୁଥିବା କୁହାଯାଉଛି। କାରଣ ଉକ୍ତ ମହିଳାଙ୍କ ପାଖରୁ ୨ଟି ପେନ୍ ଡ୍ରାଇଭ୍ ଓ ଗୋଟିଏ ହାର୍ଡଡିସ୍କ ଜବତ ହୋଇଛି। ସେଥିରେ ବହୁ ବିଶିଷ୍ଟ ବ୍ୟକ୍ତିଙ୍କ କଳାକାର୍ନାମା ଲୁଚି ରହିଥିବା କୁହାଯାଉଛି। ସେହିପରି ସମ୍ପୃକ୍ତ ମହିଳାଙ୍କ ବ୍ଲାକ୍ମେଲ୍ର ଶିକାର ହୋଇଥିବା ବହୁ ରାଜନେତା, ବ୍ୟବସାୟୀଙ୍କ ସମେତ ପ୍ରଭାବଶାଳୀ ବ୍ୟକ୍ତିଙ୍କ ସମ୍ମାନ ହାନି ହେବାର ଭୟ ରହିଛି। ତେଣୁ ମୁହଁ ଖୋଲୁ ନ ଥିବା କମିଶନରେଟ ପୋଲିସ ମହିଳା ବ୍ଲାକ୍ମେଲରଙ୍କ ରହସ୍ୟ ଲୁଚାଇବାକୁ ଚେଷ୍ଟା କରୁଥିବା ଆଲୋଚନା ଚାଲିଛି। ତାଙ୍କ ସହ ଆଉ କାହାର ସମ୍ପୃକ୍ତି ରହିଛି, କେଉଁ ଉଚ୍ଚକ୍ଷମତା ସମ୍ପନ୍ନ ବ୍ୟକ୍ତିଙ୍କ ସାହସରେ ସେ ଏପରି କାରନାମା ଚଳାଉଥିଲେ, କେତେଜଣଙ୍କୁ ଏପରି ସେ ବ୍ଲାକ୍ମେଲ କରି ଟଙ୍କା ଲୁଟିଛନ୍ତି, ତାହା ଜାଣିବାକୁ ପୋଲିସ ତାଙ୍କୁ ରିମାଣ୍ଡରେ ଆଣିବାକୁ ଯୋଜନା କରୁଛି। ଏଥିସହ ଏଥିରେ ସମ୍ପୃକ୍ତ ଥିବା ତାଙ୍କ ସ୍ବାମୀଙ୍କୁ ପୋଲିସ ଖୋଜୁଥିବା ସୂଚନା ମିଳିଛି।
