ଦେବଗଡ଼,୧୪।୨(ଡି.ଏନ୍.ଏ.): ଦେବଗଡ଼ ଜିଲା କୁଣ୍ଢେଇଗୋଳା ଥାନା ଅଞ୍ଚଳରେ ଅସଲି ସୁନା ଦେଖାଇ ନକଲି ସୁନା ବିକ୍ରି କରି ଫେରାର ହେବା ଘଟଣାରେ ପୋଲିସକୁ ସଫଳତା। ଦୀର୍ଘ ୪ମାସ ପରେ ଧରା ପଡିଛନ୍ତି ଠକ ଗ୍ୟାଙ୍ଗର ୨ ସଦସ୍ୟ। ଗିରଫ ଅଭିଯୁକ୍ତ ହେଲେ ଗଞ୍ଜାମ ଜିଲା ଆସିକା ଥାନା ଅନ୍ତର୍ଗତ କର୍ତାଳୀ ଆଲିପୁର ଗ୍ରାମର ଶଙ୍କର ଦାସ ଏବଂ କୋଟିଣ୍ଡା ଥାନା ନାରାୟଣପୁର ଗ୍ରାମର ସିଦ୍ଦୁ ଦାଶ l ସେମାନଙ୍କ ନିକଟରୁ ପୋଲିସ ୫ ଗୋଟି ଅସଲି ସୁନା ବଲ, ୨୮ ଟି ନକଲି ସୁନା ବଲ, ୨ ଟି ମୋବାଇଲ ଓ ନଗଦ ୧୬୦୦ ଟଙ୍କା ଜବତ କରାଯାଇଛି। ଉଭୟଙ୍କୁ ମଙ୍ଗଳବାର ପୋଲିସ କୋର୍ଟ ଚାଲାଣ କରିଛି l ତେବେ ଏହି ଗ୍ୟାଙ୍ଗର ମୁଖ୍ୟ ଫେରାର ହେବାରେ ସଫଳ ହୋଇଥିବା ଜଣାପଡିଛି l
ସୂଚନାନୁଯାୟୀ, କୁଣ୍ଢେଇଗୋଳା ଥାନା ଅନ୍ତର୍ଗତ ପୁଟବୁଲ ଗ୍ରାମକୁ ଗତ ଅକ୍ଟୋବର ୮ ତାରିଖ ଦିନ ୩ ଜଣ ପୁରୁଷ ଓ ୨ ଜଣ ମହିଳା ଚାଲୁଣି ବିକିବା ବାହାନାରେ ପହଞ୍ଚି ଖଗେଶ୍ୱର କିସାନ ନାମକ ଜଣେ ବ୍ୟକ୍ତିଙ୍କ ଘରେ ରହିଥିଲେ l ସେହି ଗ୍ରାମରେ ସନ୍ତୋଷ କୁମାର ସାହୁ ନାମକ ଜଣେ ବ୍ୟକ୍ତି କିରାନା ଦୋକାନ କରିଥିବା ବେଳେ ୯ ତାରିଖ ଦିନ ସେମାନେ ତାଙ୍କ ଦୋକାନକୁ ଆସି କିଛି ସୁନା ଦେଖାଇ ଟ୍ରେନରୁ ପାଇଥିବା ଏବଂ ବିକ୍ରି କରିବାକୁ ଚାହୁଁଥିବା କହିଥିଲେ l ସନ୍ତୋଷ ସେହି ସୁନା କିଣିବାକୁ ରାଜି ହେବା ସହ ସେଥିରୁ କିଛି ସାମ୍ପୁଲ ନେଇ ଗାଁ ସୁନା ଦୋକାନୀକୁ ପରୀକ୍ଷା ପାଇଁ କହିଥିଲେ l ପରୀକ୍ଷା ପରେ ସୁନା ଅସଲି ଥିବା ଦୋକାନୀ କହିଥିଲେ। ଏହାପରେ ସନ୍ତୋଷ ଓ ତାଙ୍କ ସ୍ତ୍ରୀ ଅକ୍ଟୋବର ୧୨ ତାରିଖ ସାରେ ୧ ଲକ୍ଷ ୯୦ ହଜାର ଟଙ୍କା ନେଇ ଠକ ଦଳ ରହୁଥିବା ଠିକଣାକୁ ଯାଇ ସେମାନଙ୍କୁ ଦେବା ସହ ତାଙ୍କ ଠାରୁ ୨୫୦ ଗ୍ରାମ ଓଜନର ସୁନା ନେଇ ଘରକୁ ଫେରିଥିଲେ l ସେମାନେ ପୁଣିଥରେ କିଣିଥିବା ସବୁ ସୁନା ଧରି ଗାଁ ବଣିଆ ନିକଟରେ ନେଇ ଦେଖାଇବା ବେଳେ ସବୁ ସୁନା ନକଲି ଥିବା ଜାଣିବାକୁ ପାଇଥିଲେ l ଏହା ଜାଣି ସନ୍ତୋଷ ତୁରନ୍ତ ଯୋଗାଯୋଗ କରିବାକୁ ଚାହିଁଥିଲେ ହେଁ ସେଠାରୁ ଠକ ଦଳ ଫେରାର ହୋଇସାରିଥିଲେ l ଠକାମୀର ଶିକାର ହୋଇଥବା ଜାଣି ସନ୍ତୋଷ କୁଣ୍ଢେଇଗୋଳା ଥାନାରେ ଲିଖିତ ଅଭିଯୋଗ କରିଥିଲେl ଅଭିଯୋଗ ଆଧାରରେ ପୁଲିସ ୫ ଅଜ୍ଞାତ ଲୋକଙ୍କ ବିରୋଧରେ ଏକ ଠକେଇ ମାମଲା ରୁଜୁ କରି ଘଟଣାର ତଦନ୍ତ କରୁଥିଲା। ତେବେ ପ୍ରାୟ ୪ ମାସ ପରେ ଉକ୍ତ ଠକ ଦଳ ସୋମବାର ପୁଣିଥରେ ସେହି ଗ୍ରାମକୁ ଆସିଥିବା ନେଇ ଗ୍ରାମବାସୀଙ୍କ ସୂଚନା ଆଧାରରେ ପୋଲିସ ସେହି ଗ୍ରାମରେ ପହଞ୍ଚି ୨ ଜଣ ଠକଙ୍କୁ କାବୁ କରିଥିବା ବେଳେ ଅନ୍ୟ ଜଣେ ଫେରାର ହୋଇଯାଇଥିଲେ।
