ଭୂମିକାଟି ଆକ୍ସନ ହେଉ କି କମେଡି, ସେଗୁଡ଼ିକୁ ବେଶ୍ ସୂଚାରୁ ରୂପରେ ତୁଲାଇବା ସହ ବଲିଉଡ୍ରେ ନିଜକୁ ଜଣେ ନାମୀ ଅଭିନେତାର ପରିଚୟ ଦେଇସାରିଛନ୍ତି ଅକ୍ଷୟ କୁମାର। ଏବେ ତାଙ୍କୁ ନେଇ ଚର୍ଚ୍ଚା। କାରଣ ସେ ଅଭିନୟ କରିଥିବା ତଥା ରିଲିଜ ଅପେକ୍ଷାରେ ଥିବା ସିନେମା ‘ସୂର୍ଯ୍ୟବଂଶୀ’ରେ ତାଙ୍କୁ ଦର୍ଶକ ପୁଣି ଥରେ ପୋଲିସ ଅବତାରରେ ଦେଖିବାକୁ ପାଇବେ। ପୁଣି ଏହି ରୋଲ୍ ତାଙ୍କ କ୍ୟାରିୟର ପାଇଁ ମାଇଲେଜ ସାବ୍ୟସ୍ତ ହେବ ବୋଲି ଅନୁମାନ କରାଯାଉଛି। ଏଥିରେ ସେ ଡିସିପି ବୀର ସୂର୍ଯ୍ୟବଂଶୀ ଭୂମିକାରେ ଅଭିନୟ କରିଛନ୍ତି। ଏଭଳି ଏକ ଆକ୍ସନଭିତ୍ତିକ ସିନେମାର କାହାଣୀ ରଚନା ସହ ନିର୍ଦ୍ଦେଶନା ଦେଇଛନ୍ତି ରୋହିତ ସେଟ୍ଟି। ଏହି ଫିଲ୍ମଟି ଆସନ୍ତା ମାସ ୫ରେ ରିଲିଜ ହେବାକୁ ଯାଉଛି। ଏଥିରେ ଅକ୍ଷୟ କୁମାରଙ୍କ ବ୍ୟତୀତ କ୍ୟାଟ୍ରିନା କୈଫ, ଅଜୟ ଦେବଗନ ଏବଂ ରଣବୀର ସିଂଙ୍କୁ ମଧ୍ୟ ଦେଖିବାକୁ ମିଳିବ। ଏହି ସିନେମାର ନୂଆ ପୋଷ୍ଟର ନିକଟରେ ରିଲିଜ ହୋଇ ବେଶ୍ ଭାଇରାଲ ହୋଇଛି।
