ଭଦ୍ରକ/ବନ୍ତ,୯ା୨(ସନାତନ ରାଉତ/ହରିନାରାୟଣ ମହାନ୍ତି): ଭଦ୍ରକ ଜିଲା ବନ୍ତ ଥାନା ଅଧୀନ ବନ୍ତ-ଆନନ୍ଦପୁର ରାସ୍ତାର ଶ୍ରୀବନ୍ତପୁର ଛକରେ ଗୁରୁବାର ପୂର୍ବାହ୍ନରେ ଦୁର୍ଘଟଣା ଘଟାଇ ଫେରାର ହୋଇଯାଉଥିବା ଏକ ବାଲି ବୋଝେଇ ହାଇୱାକୁ ଅଟକ ରଖିବାକୁ କେନ୍ଦ୍ରକରି ପୋଲିସ ଓ ଲୋକେ ମୁହଁାମୁହିଁ ହୋଇଛନ୍ତି। ବନ୍ତ ଥାନା ଛକଠାରେ ସ୍ଥାନୀୟ ଲୋକେ ଉକ୍ତ ହାଇୱାକୁ ଅଟକାଇ ଦିନବେଳେ ଭାରିଯାନ ଚଳାଚଳ ବନ୍ଦ ଥିବାବେଳେ ଏହା କିପରି ଚଳାଚଳ କଲା ବୋଲି ପୋଲିସକୁ ପ୍ରଶ୍ନ କରିଥିଲେ। ଏହାକୁ ନେଇ ଯୁକ୍ତିତର୍କ ହେବାରୁ ବନ୍ତ ଥାନାଧିକାରୀ ଶ୍ରୀବଲ୍ଲଭ ସାହୁ ଲୋକଙ୍କୁ ଧକ୍କା ମାରିବା ସହ ଫୋର୍ସ ଲଗାଇ ମାଡ଼ ମାରିଥିବା ଅଭିଯୋଗ ହୋଇଛି। ଏଥିରେ ୨ ଯୁବକ ଆହତ ହୋଇଛନ୍ତି।
ବନ୍ତ ବ୍ଲକ ଅଧୀନ ଚାଇଁପୁର ଗ୍ରାମର ଭୀମସେନ ସାହୁଙ୍କ ପୁଅ ଅମ୍ଳାନ ସ୍କୁଲ ଯାଉଥିବା ବେଳେ ଆନନ୍ଦପୁର ଆଡ଼ୁ ଆସୁଥିବା ବାଲି ବୋଝେଇ ହାଇୱା (ଓଡି ୨୨ ଆର୍ ୩୦୫୦) ତାଙ୍କୁ ଧକ୍କା ଦେଇଥିଲା। ସ୍ଥାନୀୟ ଲୋକେ ଆହତ ଅମ୍ଳାନଙ୍କୁ ଚିକିତ୍ସା ପାଇଁ ବନ୍ତ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ଏହି ଦୁର୍ଘଟଣା ପରେ ସ୍ଥାନୀୟ ଲୋକେ ବନ୍ତ ବଜାର ଥାନା ଛକଠାରେ ଉକ୍ତ ହାଇୱାକୁ ଅଟକାଇଥିଲେ। ଦୁର୍ଘଟଣାରେ ଆହତ ହୋଇଥିବା ଛାତ୍ରଙ୍କ ସ୍ବାସ୍ଥ୍ୟାବସ୍ଥା କଥା ନ ବୁଝି ବାଲି ବୋଝେଇ ଗାଡ଼ି କାହିଁକି ଅଟକାଇଛ ବୋଲି ପ୍ରଶ୍ନ କରି ଥାନାଧିକାରୀ ଲୋକଙ୍କୁ ଦୁର୍ବ୍ୟବହାର କରିଥିଲେ। ଏହି ସମୟରେ ଟିଲୋ ଦେବତାଗଢ଼ିଆ ଗ୍ରାମର ଶକ୍ତିଧର ରାଉତ ଓ ଗଣନାଥ ବେହେରାଙ୍କୁ ମାଡ଼ମାରିବା ସହ ସେ ଉକ୍ତ ଗାଡ଼ିକୁ ଛାଡ଼ି ଦେଇଥିଲେ। ପରେ ଗାଡ଼ିକୁ ଥାନାକୁ ଆଣି ଅଟକ ରଖାଯାଇଛି। ଏ ସମ୍ପର୍କରେ ଥାନାଧିକାରୀ ସାହୁ କହିଛନ୍ତି, ଭଦ୍ରକ-ଆନନ୍ଦପୁର ରାଜ୍ୟ ରାଜପଥକୁ ଅଧଘଣ୍ଟା ଧରି ଅବରୋଧ କରାଯାଇଥିଲା। ରାସ୍ତାରୋକୋ ହଟାଇବା ପାଇଁ ଏଭଳି ପଦକ୍ଷେପ ନେବାକୁ ପଡ଼ିଥିଲା। ଆହତ ଛାତ୍ରଙ୍କ ବାପା ଭୀମସେନ ଏବଂ ମାଡ଼ ଖାଇଥିବା ଦୁଇ ଯୁବକ ସନ୍ଧ୍ୟାରେ ଏସ୍ପିଙ୍କ ଅଫିସ୍କୁ ଆସି ଅତିରିକ୍ତ ଏସ୍ପି ବାମଦେବ ସିଂଙ୍କୁ ୨ଟି ଅଭିଯୋଗପତ୍ର ପ୍ରଦାନ କରିଛନ୍ତି। ଜଣେ ଡିଏସ୍ପିଙ୍କ ଦ୍ୱାରା ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଅତିରିକ୍ତ ଏସ୍ପି ପ୍ରତିଶ୍ରୁତି ଦେଇଛନ୍ତି।
ପ୍ରକାଶଥାଉ କି, ପୂର୍ବରୁ ଏପରି ଦୁର୍ଘଟଣା ନେଇ ସକାଳ ୬ରୁ ରାତି ୧୦ଟା ପର୍ଯ୍ୟନ୍ତ ଭାରିଯାନ ଚଳାଚଳ ବନ୍ଦ ଦାବିରେ ଅଞ୍ଚଳବାସୀ ରାସ୍ତାରୋକୋ କରିଥିଲେ। ପ୍ରଶାସନ ମଧ୍ୟ ଭାରିଯାନ ଚଳାଚଳ ବନ୍ଦ ପାଇଁ ନିର୍ଦ୍ଦେଶ ଦେଇଥିଲା। ପ୍ରଶାସନର ନିର୍ଦ୍ଦେଶକୁ ନ ମାନି ଦିନବେଳେ ଭାରିଯାନ ଚଳାଚଳକୁ କିପରି ବନ୍ତ ପୋଲିସ ଅନୁମତି ଦେଉଛି ବୋଲି ଲୋକେ ପ୍ରଶ୍ନ ଉଠାଇଛନ୍ତି। କିଛିଦିନ ତଳେ ଖବର ସଂଗ୍ରହ ପାଇଁ ଥାନାକୁ ଯାଇଥିବା ୨ଜଣ ଖବରଦାତାଙ୍କୁ ବନ୍ତ ଥାନାଧିକାରୀ ଦୁର୍ବ୍ୟବହାର କରିଥିବା ଏସ୍ପିଙ୍କ ନିକଟରେ ଅଭିଯୋଗ କରାଯାଇଥିଲା। ଏସ୍ପି ବରୁଣ ଗୁଣ୍ଟୁପାଲି ଜଣେ ଉଚ୍ଚପଦସ୍ଥ ଅଧିକାରୀଙ୍କ ଦ୍ୱାରା ଏହି ଘଟଣାର ତଦନ୍ତ କରିଥିଲେ। ଗତ ଜାନୁଆରୀ ୨୯ରେ ବନ୍ତ ଥାନାଧିକାରୀଙ୍କ ତିହିଡ଼ି ଥାନାକୁ ବଦଳି ନିର୍ଦ୍ଦେଶ ପ୍ରକାଶ ପାଇଥିବା ବେଳେ ୩୧ରେ ଏହାକୁ ବାତିଲ କରାଯାଇଥିଲା। ଏହି ବାତିଲ ପଛରେ କ’ଣ କାରଣ ରହିଛି ଏବଂ କାହା ଚାପରେ ବଦଳି ବାତିଲ କରାଯାଇଛି ବୋଲି ଚର୍ଚ୍ଚା ହେଉଛି।