ବ୍ରହ୍ମପୁର ଅଫିସ,୨୧ା୩: ବ୍ରହ୍ମପୁର ପୋଲିସର ଏକ ଟିମ୍ ସୋମବାର ଭବାନୀପାଟଣା ଜିଲା କାରାଗାରରେ ଥିବା ଜଣେ ଆନ୍ତଃ ରାଜ୍ୟ ଠକଙ୍କୁ ବ୍ରହ୍ମପୁର ଆଣିଥିଲା। ଅଭିଯୁକ୍ତ ଜଣଙ୍କ ହେଲେ ଟାଉନ ଥାନା ଅନ୍ତର୍ଗତ ବିଜିପୁରର ସୁମନ ଶେଖର ରାଉତ(୩୦)। ପୋଲିସ ସୁମନଙ୍କୁ ଏସ୍ଡିଜେଏମ୍ଙ୍କ କୋର୍ଟରେ ହାଜର କରିଥିଲା। ସୁମନଙ୍କ ନାମରେ ଗୋଷାଣୀନୂଆଗଁା ଥାନାରେ ନଂ. ୬୬/୨୩ ରେ ରୁଜୁ ହୋଇଥିବା ମାମଲାରେ କୋର୍ଟ ତାଙ୍କୁ ଜଡିତ କରିଥିଲେ। ସେହିପରି ପୋଲିସ ସୁମନଙ୍କୁ ଦୁଇଦିନିଆ ରିମାଣ୍ଡରେ ନେବା ପାଇଁ କୋର୍ଟରେ ଆବେଦନ କରିଥିଲେ, କୋର୍ଟ ଦୁଇଦିନ ରିମାଣ୍ଡ ମଞ୍ଜୁର କରିଛନ୍ତି। ଫଳରେ ପୋଲିସ ସୁମନଙ୍କୁ ସୋମବାର ଅପରାହ୍ନରୁ ରିମାଣ୍ଡରେ ନେଇଛି। ଆସନ୍ତା ବୁଧବାର ଅପରାହ୍ନରେ ସୁମନଙ୍କୁ ପୁଣିଥରେ କୋର୍ଟରେ ହାଜର କରିବାକୁ କୋର୍ଟ ପୋଲିସକୁ ନିର୍ଦ୍ଦେଶ ଦେଇଥିବା ବ୍ରହ୍ମପୁର ଏସ୍ଡିପିଓ ରାଜୀବ ଲୋଚନ ପଣ୍ଡା ସୂଚନା ଦେଇଛନ୍ତି। ସେହିପରି ସୁମନଙ୍କ ବିଭିନ୍ନ ବ୍ୟାଙ୍କରେ ଥିବା ଆକାଉଣ୍ଟ ଫ୍ରିଜ୍ କରାଯିବ ବୋଲି ସେ କହିଥିଲେ। ସୁମନ ମହାରାଷ୍ଟ୍ର ନାଗପୁରରେ ଏକ ଏନ୍ଜିଓ ସଂସ୍ଥାରୁ ୪କୋଟି ଓ ଭବାନୀପାଟଣାରୁ ୨କୋଟି ଟଙ୍କା ଠକେଇ କରିଥିଲେ। ସେହିପରି ବ୍ରହ୍ମପୁର ଗୋଷାଣୀନୂଆଗଁା ଥାନା ଅଞ୍ଚଳରେ ଥିବା ଏକ ସଂସ୍ଥାରୁ ୪୦ଲକ୍ଷ ୬୫ ହଜାର ଟଙ୍କା ଠକିଥିଲେ। ଗତ ଫେବୃୟାରୀ ୨୩ରେ ଭବାନୀପାଟଣା ପୋଲିସ ସୁମନଙ୍କୁ ନାଗପୁରରୁ ଗିରଫ କରିଥିଲା। ପରେ ତାଙ୍କୁ ଭବାନୀପାଟଣା ଜିଲା କାରାଗାରକୁ ପଠାଇ ଦିଆଯାଇଥିଲା। ସେଠାରେ ସେ ବିଚାରାଧୀନ ବନ୍ଦୀ ଭାବେ ଥିଲେ। କୋର୍ଟଙ୍କ ଅନୁମତିକ୍ରମେ ପୋଲିସର ଏକ ଟିମ୍ ଭବାନୀପାଟଣା ଯାଇଥିଲା। ସୋମବାର ଜିଲା କାରାଗାରରୁ ସୁମନଙ୍କୁ ଆଣି ସ୍ଥାନୀୟ ଏସ୍ଡିଜେଏମ୍ଙ୍କ କୋର୍ଟରେ ହାଜର କରାଯାଇଥିଲା ବୋଲି ସେ କହିଛନ୍ତି।
ପ୍ରକାଶ ଯେ, ବ୍ରହ୍ମପୁର ବିଜିପୁର ଟ୍ୟାଙ୍କ ରୋଡ୍ରେ ଶିକ୍ଷା ଓ ଅର୍ଥନୈତିକ ବିକାଶ ସମିତି ନାମରେ ଏକ ବେସରକାରୀ ସଂସ୍ଥା ରହିଛି। ଏଥିରେ ବ୍ରହ୍ମପୁର ବିଜିପୁର ଟ୍ୟାଙ୍କ ରୋଡ୍ର ଜଣେ ଯୁବକ ମହାରାଷ୍ଟ୍ର ନାଗପୁରରେ ଆକାଉଣ୍ଟାଣ୍ଟ ଭାବେ କାର୍ଯ୍ୟ କରୁଥିଲେ। ଦୀର୍ଘ ମାସ ଧରି କାମ କରିବା ପରେ ସେ ବିଭିନ୍ନ ଆର୍ଥିକ କାରବାର ବୁଝାବୁଝି କରୁଥିଲେ। ଗତ ବର୍ଷ ଡିସେମ୍ବର ୧୫ରେ ସଂସ୍ଥାର ଦିଲ୍ଲୀସ୍ଥିତ ଷ୍ଟେଟବ୍ୟାଙ୍କ ଆକାଉଣ୍ଟରୁ ଉକ୍ତ ଯୁବକ ଜଣଙ୍କ ଚଞ୍ଚକତା କରି ନିଜ ବ୍ୟାଙ୍କ ଆକାଉଣ୍ଟକୁ ୪୦ ଲକ୍ଷ ଟଙ୍କା ଟ୍ରାନ୍ସଫର କରି ନେଇଯାଇଥିଲେ। ସେହିପରି ଚଳିତବର୍ଷ ଜାନୁୟାରୀ ୧୧ରେ ପୁଣିଥରେ ୬୫ ହଜାର ଟଙ୍କା ନିଜ ଆକାଉଣ୍ଟକୁ ଟ୍ରାନ୍ସଫର କରି ନେଇଥିଲେ। ତେବେ ମୋଟ ୪୦ ଲକ୍ଷ ୬୫ ହଜାର ଠକେଇ କରିବା ପୂର୍ବରୁ ଯୁବକ ଜଣଙ୍କ ସଂସ୍ଥାର ମୋବାଇଲ ନମ୍ବର ବଦଳରେ ବ୍ୟାଙ୍କରେ ନିଜ ମୋବାଇଲ ନମ୍ବର ଦାଖଲ କରିଥିଲେ। ଯେଉଁଥିପାଇଁ ସଂସ୍ଥା କର୍ତ୍ତୃପକ୍ଷ ଉକ୍ତ ଟଙ୍କା ଟ୍ରାନ୍ସଫର ବିଷୟରେ ଜାଣିପାରି ନ ଥିଲେ। ପରେ ସଂସ୍ଥାର ବ୍ୟାଙ୍କ ଆକାଉଣ୍ଟରୁ ଟଙ୍କା ଖାଲି ହୋଇଯାଇଥିବା କଥା ଜଣାପଡିବା ପରେ ଖୋଳତାଡ ଆରମ୍ଭ ହୋଇଥିଲା। ସୁମନ ଉକ୍ତ ଟଙ୍କା ହଡପ କରିଥିବା ଜଣାପଡ଼ିବା ପରେ ସଂସ୍ଥା ପକ୍ଷରୁ ଏଚ୍. ରଞ୍ଜନ ନାୟକ ଗୋଷାଣୀନୂଆଗାଁ ଥାନାରେ ଅଭିଯୋଗ କରିଥିଲେ। ତାଙ୍କ ଅଭିଯୋଗକୁ ଭିତ୍ତିକରି ନଂ.୬୬/୨୩ରେ ଏକ ମାମଲା ରୁଜୁକରି ଘଟଣାର ତଦନ୍ତ ଆରମ୍ଭ କରିଥିଲା।