ସାଂଘାଇ,୩୦।୧୧: ଚାଇନାରେ ଜିରୋ-କୋଭିଡ୍ ନୀତିକୁ ବିରୋଧ କରି ବିଭିନ୍ନ ସହରରେ ଆନ୍ଦୋଳନ ଜାରି ରହିଥିବାବେଳେ ରାଜନୈତିକ ସ୍ବାଧୀନତା ପ୍ରଦାନ ସହ ଲକ୍ଡାଉନ୍ କଟକଣା ହଟାଇବା ଦାବିରେ ଦେଶବ୍ୟାପୀ ର଼୍ୟାଲି ନିମନ୍ତେ ଆହ୍ବାନ ଦିଆଯାଇଛି। ଏହାକୁ ଦୃଷ୍ଟିରେ ରଖି ଶି ଜିନ୍ପିଙ୍ଗ୍ ସରକାର ବେଜିଂ, ସାଂଘାଇ ସମେତ ବିଭିନ୍ନ ସହରକୁ ପୋଲିସ ଓ ସୁରକ୍ଷା ବଳ ଛାଉଣିରେ ପରିଣତ କରିଛନ୍ତି। କୋଭିଡ୍ କଟକଣା ଓ ଲକ୍ଡାଉନ୍କୁ ନେଇ ଚାଇନାରେ ଉତ୍ତେଜନା ଦେଖାଦେଇଛି। ଉତ୍ତ୍ୟକ୍ତ ଲୋକେ ରାଜନୈତିକ ପରିବର୍ତ୍ତନ ନିମନ୍ତେ ଆହ୍ବାନ ଦେଇଛନ୍ତି। ଚାଇନାର କମ୍ୟୁନିଷ୍ଟ ଶାସକ ବହୁ ଦଶନ୍ଧି ମଧ୍ୟରେ କେବେ ଏଭଳି ବିରୋଧର ସମ୍ମୁଖୀନ ହୋଇ ନ ଥିଲେ। ଆନ୍ଦୋଳନକୁ ଜାତିସଂଘ, ଆମେରିକା ଓ ଅନ୍ୟ ରାଷ୍ଟ୍ର ସମର୍ଥନ ଜଣାଇବା ପରେ ଜିନ୍ପିଙ୍ଗ୍ ସରକାର ଲକ୍ଡାଉନ୍ ପ୍ରଭାବ କମ୍ କରିବାକୁ ପଦକ୍ଷେପ ନେବେ ବୋଲି ମଙ୍ଗଳବାର କହିଛନ୍ତି। ପରିବର୍ତ୍ତିତ ସ୍ଥିତି ସହ ଜିରୋ-କୋଭିଡ୍ ନୀତିକୁ ବଦଳାଇବାକୁ ଉଦ୍ୟମ ହେଉଛି। ଲୋକଙ୍କ ସ୍ବାସ୍ଥ୍ୟ ସୁରକ୍ଷିତ ରଖି ଲକ୍ଡାଉନ୍ ଯେପରି ସାମାଜିକ-ଅର୍ଥନୈତିକ ବିକାଶ ଉପରେ ପ୍ରଭାବ ନ ପକାଇବ ସେଥିପାଇଁ ପଦକ୍ଷେପ ନିଆଯାଉଛି ବୋଲି ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଝାଓ ଲିଜିଆନ୍ କହିଛନ୍ତି।
କଠୋର କୋଭିଡ୍ କଟକଣାକୁ ନେଇ ଦୀର୍ଘଦିନ ହେଲା ଜନ ଅସନ୍ତୋଷ ଲାଗି ରହିଥିଲା। ଗତ ସପ୍ତାହରେ ଉରୁମ୍କି ଅଗ୍ନିକାଣ୍ଡରେ ୧୦ ଜଣଙ୍କ ମୃତ୍ୟୁ ଘଟିଥିଲା। କୋଭିଡ୍ କଟକଣା ଯୋଗୁ ନିଆଁଲିଭା ଓ ଉଦ୍ଧାର କାର୍ଯ୍ୟ ବାଧାପ୍ରାପ୍ତ ହେବାରୁ ୧୦ ଜଣଙ୍କ ଜୀବନ ଗଲା ବୋଲି ଅଭିଯୋଗ କରି ଲୋକେ ରାସ୍ତାକୁ ଓହ୍ଲାଇଥିଲେ।
