ମୁମ୍ବାଇ,୧୪।୭: ବଲିଉଡ୍ ଅଭିନେତ୍ରୀ କରିନା କାପୁର ଖାନ ଲେଖିଥିବା ‘ପ୍ରେଗନାନ୍ସି ବାଇବେଲ’ ବହିର ନାମ କରଣକୁ ନେଇ ବିବାଦ ଦେଖାଦେଇଛି। ବହିର ଏଭଳି ନାମ କରଣ ଉପରେ ଆପତ୍ତି ଉଠାଇବା ସହ ମହାରାଷ୍ଟ୍ରର ବିଡ୍ ସହରର ଶିବାଜୀନଗର ଥାନାରେ କରିନା ଓ ଅନ୍ୟ ଦୁଇ ଜଣଙ୍କ ନାମରେ ଅଭିଯୋଗ ଆଣିଛନ୍ତି ଆଲ୍ଫା ଖ୍ରୀଷ୍ଟିଆନ ମହାସଂଘର ସଭାପତି ଆଶିଷ ଶିନ୍ଦେ।
ଅଭିଯୋଗରେ ଶିନ୍ଦେ ଦର୍ଶାଇଛନ୍ତି, ଜଗରନଟ ବୁକ୍ସ ପକ୍ଷରୁ ପ୍ରକାଶିତ ‘ପ୍ରେଗନାନ୍ସି ବାଇବେଲ’ ପୁସ୍ତକରେ ବାଇବେଲ ଶବ୍ଦର ଅପବ୍ୟବହାର ହୋଇଛି। ଏହା ଖ୍ରୀଷ୍ଟିଆନ ସମ୍ପ୍ରଦାୟର ଧାର୍ମିକ ଭାବନାକୁ ଆଘାତ ଦେଇଛି। ଏଣୁ ଆଇପିସିର ଧାରା ୨୯୫-କ’ (ଜାଣିଶୁଣି ଧାର୍ମିକ ଭାବନାକୁ ଅସମ୍ମାନ କିମ୍ବା ଆଘାତ ଦେବା ଭଳି କାର୍ଯ୍ୟ ) ଅଧୀନରେ ବଲିଉଡ ଅଭିନେତ୍ରୀ କରିନା ଓ ଅନ୍ୟ ଦୁଇ ଲେଖକଙ୍କ ଉପରେ ମାମଲା ରୁଜୁ କରିବାକୁ ଦାବି ହୋଇଛି।
ଏ ସମ୍ପର୍କରେ ଅଭିଯୋଗ ଆସିଛି। କିନ୍ତୁ ମାମଲା ରୁଜୁ ହୋଇ ନାହିଁ। ଅଭିଯୋଗକାରୀଙ୍କୁ ମୁମ୍ବାଇରେ ମାମଲା ରୁଜୁ କରିବାକୁ ପରାମର୍ଶ ଦେଇଛି ବୋଲି ଶିବାଜୀନଗର ଥାନା ଅଧିକାରୀ ସାଇନାଥ ଥୋମ୍ବ୍ରେ କହିଛନ୍ତି।
