ଭୁବନେଶ୍ୱର, ୨୪।୪ (ବ୍ୟୁରୋ): ସାଇକେଲ ଚୋରି ସନ୍ଦେହରେ କମିଶନରେଟ ପୋଲିସ ଲୋକଙ୍କୁ ଥାନାକୁ ଟେକିନେଇ ମାଡ଼ ମାରୁଛି। କଥା ଆଦାୟ ପାଇଁ ଏମିତି ନିର୍ଯାତନା ଦେଉଛି ଯେ, ଶେଷରେ ଅଭିଯୁକ୍ତଙ୍କ ଜୀବନ ବି ଯାଉଛି। ହେଲେ ବଡ଼ବଡ଼ିଆଙ୍କୁ ଧରିବାକୁ ପୋଲିସ ସାହସ ଜୁଟାଇ ପାରୁନି। ଫେରାର ଦର୍ଶାଇ, ତଦନ୍ତ ଚାଲିଥିବା କହି ସମୟ ଗଡ଼ାବାରେ ଲାଗୁଛି। ଏବେ ଇଞ୍ଜିନିୟର ସ୍ବାମୀଙ୍କୁ ହତ୍ୟା ପାଇଁ ସ୍ତ୍ରୀ ସୁପାରି ଦେବା ଘଟଣାରେ ବିଭିନ୍ନ ମହଲରୁ ଏମିତି ପ୍ରତିକ୍ରିୟା ପ୍ରକାଶ ପାଉଛି। କାରଣ ପୋଲିସ କେବଳ ଡ୍ରାଇଭର ଅଶୋକ କୁମାର ସାହୁଙ୍କୁ ଗିରଫ କରିଥିବାବେଳେ ଇଞ୍ଜିନିୟରଙ୍କ ସ୍ତ୍ରୀ ସିଲ୍ସିଲା ବେହେରା, ସହଯୋଗୀ ଜିତେନ୍ଦ୍ର କୁମାର ପ୍ରଧାନ ଓ ଅନ୍ୟ କେତେଜଣଙ୍କ ନାମରେ ମାମଲା ରୁଜୁ କରି ଚୁପ୍ ବସିଛି। ପୋଲିସ କାର୍ଯ୍ୟାନୁଷ୍ଠାନ ନେଉ ନ ଥିବାରୁ ଅଭିଯୁକ୍ତା ସିଲ୍ସିଲା ବାରମ୍ବାର ଗଣମାଧ୍ୟମକୁ ଆସି ନିଜକୁ ନିର୍ଦ୍ଦୋଷୀ ବୋଲି କହିବା ସହ ଅଭିଯୋଗକାରୀ ସ୍ବାମୀଙ୍କ ନାଁରେ ମଧ୍ୟ ପାଲଟା ଅଭିଯୋଗ କରୁଛନ୍ତି। ଶୁକ୍ରବାର ଭଳି ଶନିବାର ମଧ୍ୟ ଏକ ବୈଦ୍ୟୁତିକ ଗଣମାଧ୍ୟମରେ ସମାନ ସଫେଇ ଦେଇଛନ୍ତି। ଗିରଫ ଡ୍ରାଇଭର ଅଶୋକ ତାଙ୍କ ପ୍ରେମିକ ବୋଲି ପୋଲିସର ବୟାନ ଆଧାରରେ ବିଭିନ୍ନ ଗଣମାଧ୍ୟମରେ ଖବର ପ୍ରକାଶ ପାଉଛି। ତେବେ ଏ ସମ୍ପର୍କରେ ସିଲ୍ସିଲା କହିଛନ୍ତି, ଅଶୋକଙ୍କ ସହ ମୋର କୌଣସି ଖରାପ ସମ୍ପର୍କ ନାହିଁ। ସମ୍ପର୍କ ଭାଇ-ଭଉଣୀ ପରି। ମୁଁ ତାଙ୍କୁ ରାଖୀ ପିନ୍ଧାଇଛି। ସେ କିଏ ମୁଁ ନିଜେ ମଧ୍ୟ ଜାଣି ନ ଥିଲି। ମୋ ସ୍ବାମୀଙ୍କ ପୁରୀ ଟ୍ରାନ୍ସଫର ପରେ ସେ ସ୍ତ୍ରୀ ପିଲାଙ୍କ ଯତ୍ନ ନେବା ଲାଗି ଅଶୋକଙ୍କୁ ଆଣିଥିଲେ। ମୋ ସ୍ବାମୀ ମନଗଢ଼ା କଥା କହୁଛନ୍ତି। ଗତ ୪ ବର୍ଷ ଧରି ସେ ପରକୀୟା ସମ୍ପର୍କରେ ରହି ଆସୁଛନ୍ତି। ଅନ୍ୟ ଯୁବତୀଙ୍କ ସହ ସମ୍ପର୍କ ଥିବା ନେଇ ପ୍ରମାଣ ମଧ୍ୟ ପୋଲିସକୁ ଦେଇଛି। ନିଜକୁ ଉଚ୍ଚ ଶିକ୍ଷିତା, ସମାଜସେବୀର ପରିଚୟ ଦେବା ସହ ଜଣେ ହିନ୍ଦୁ ମହିଳା କ’ଣ କେବେ ତାଙ୍କ ସ୍ବାମୀଙ୍କୁ ମାରିପାରେ ବୋଲି ସେ କହିଛନ୍ତି। ଏପଟେ କେତେକ ସୋସିଆଲ ମିଡିଆରେ ମଧ୍ୟ ସିଲ୍ସିଲାଙ୍କ କାର୍ନାମାକୁ ନେଇ ଖବର ଭାଇରାଲ ହେଉଥିବାରୁ ମାମଲାର ଗୁରୁତ୍ୱ ବଢ଼ି ଯାଇଛି।
ସାମାଜିକ କର୍ମୀର ପରିଚୟ ଦେଉଥିବା ସିଲ୍ସିଲା ଅନୁଗୋଳର ଏକ ପାରିବାରିକ କଳିର ସମାଧାନ ଲାଗି ନିଜକୁ ଏନଏଚ୍ଆର୍ସି ଅଧ୍ୟକ୍ଷା କହିବା ସହ ସଂପୃକ୍ତ ପରିବାରଠାରୁ ୩ ଲକ୍ଷ ଟଙ୍କା ଦାବି କରିଥିଲେ। ନ ଦେଲେ ମିଛ ମାମଲାରେ ଫସାଇଦେବାକୁ ଧମକ ଦେଇଥିଲେ। ଏନେଇ ସଂପୃକ୍ତ ପରିବାର ଗତ ୨୦୨୦ରେ ତାଳଚେର ଥାନା ଓ ଅନୁଗୋଳ ଏସ୍ପିଙ୍କ ନିକଟରେ ଅଭିଯୋଗ କରିଥିଲେ। ହେଲେ ପୋଲିସଠାରୁ କୌଣସି ନ୍ୟାୟ ନ ପାଇ ଉକ୍ତ ପରିବାର ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଘଟଣାକୁ ଗୁରୁତ୍ୱର ସହ ନେଇ ହାଇକୋର୍ଟ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ନିର୍ଦ୍ଦେଶ ଦେଇଥିଲା। ଏହାପରେ ପୋଲିସ ତଦନ୍ତ କରି ସିଲ୍ସିଲାଙ୍କ ସମେତ ୫ ଜଣଙ୍କ ନାଁରେ ଚାର୍ଜଶିଟ ବି ଦେଇଛି। ସେହିପରି ଏନ୍ଏଚ୍ଆର୍ସି ଗାଡିକୁ ନମ୍ବର ପ୍ଲେଟ ବଦଳାଇ ବ୍ୟବହାର କରୁଥିବା ମଧ୍ୟ ଅଭିଯୋଗ ଉଠୁଛି। ଏତେସବୁ ଘଟଣାରେ ସମ୍ପୃକ୍ତ ଥିବା ସିଲ୍ସିଲା ଏବେ ନିଜ ଇଞ୍ଜିନିୟର ସ୍ବାମୀଙ୍କୁ ହତ୍ୟା ଷଡ଼ଯନ୍ତ୍ର ମାମଲାରେ ଛନ୍ଦି ହୋଇଥିଲେ ମଧ୍ୟ ପୋଲିସ କାହିଁକି ସମୟ ଗଡ଼ାଉଛି ତାହାକୁ ନେଇ ମଧ୍ୟ ପ୍ରଶ୍ନ ଉଠୁଛି।
ମାମଲାରେ ସମ୍ପୃକ୍ତ ସମସ୍ତ ଅଭିଯୁକ୍ତଙ୍କୁ ଗିରଫ କରାଯିବ ବୋଲି ଘଟଣା ଦିନ ଡିସିପି ଉମାଶଙ୍କର ଦାସ କହିଥିଲେ। ଅଭିଯୁକ୍ତମାନେ ଫେରାର ଥିବା ନେଇ ଥାନା ପୋଲିସ କହିଥିଲା। ଇତିମଧ୍ୟରେ ତିନିଦିନ ବିତିଯାଇଥିଲେ ମଧ୍ୟ ପୋଲିସ ଆଉକାହାକୁ ଗିରଫ କରିବାରେ ସଫଳ ହୋଇନାହିଁ। ଗଣମାଧ୍ୟମରେ ଅଭିଯୁକ୍ତା ସିଲ୍ସିଲା ବୟାନ ଦେଉଥିବାବେଳେ ପୋଲିସ କାହିଁକି ଫେରାର ଥିବା କହୁଛି? ଏ ସମ୍ପର୍କରେ ମଞ୍ଚେଶ୍ୱର ଥାନା ଆଇଆଇସି ସୁଧୀର କୁମାର ସାହୁଙ୍କୁ ପଚାରିବାରୁ, ତଦନ୍ତ ଚାଲିଥିବାରୁ କିଛି କହିହେବ ନାହିଁ ବୋଲି ସେ କହିଛନ୍ତି।