ଆଲିଗଡ଼, ୧୬।୯: ଉତ୍ତର ପ୍ରଦେଶର ଆଲିଗଡ଼ରେ ୫ ଦିନ ତଳେ ଗୋଟିଏ ଅଳଙ୍କାର ଶୋରୁମ୍ରୁ ୪୦ ଲକ୍ଷ ଟଙ୍କାର ଗହଣା ଚୋରି କରିନେଇଥିବା ଗ୍ୟାଙ୍ଗକୁ ପୋଲିସ ଏନ୍କାଉଣ୍ଟର କରିଛି। ସେକ୍ଟର-୨୦ ଥାନା ପୋଲିସ ଅପରାଧିଙ୍କୁ ଘେରି ଯାଇଥିଲା। ଏହାପରେ ଉଭୟ ପକ୍ଷ ମଧ୍ୟରେ ଗୁଳି ବିନିମୟ ହୋଇଥିଲା। ଏହି ସମୟରେ ୩ଜଣ ଅପରାଧୀ ଆହତ ହୋଇଥିବା ଜଣାପଡ଼ିଛି।
ଡକାୟତମାନେ ୫ ଦିନ ତଳେ ଆଲିଗଡ଼ର ବନାଦେବୀ ପୋଲିସ ଥାନା ଅନ୍ତର୍ଗତ ସାରସୋଲ ଛକ ନିକଟରେ ଥିବା ସୁନ୍ଦର ଜୁଏଲାରୀ ଶୋରୁମ୍ରୁ ମାତ୍ର ୩୦ ସେକେଣ୍ଡରେ ୪୦ ଲକ୍ଷ ଟଙ୍କାର ଅଳଙ୍କାର ଚୋରି କରି ନେଇଯାଇଥିଲେ। ଗ୍ରାହକ ବେଶରେ ଆସିଥିବା ଏହି ୩ଜଣ ଡକାୟତ ପ୍ରଥମେ ହାତ ସାନିଟାଇଜର କରି ଶୋରୁମ ଭିତରକୁ ପ୍ରବେଶ କରିବା ପରେ ହତିଆର ବାହାର କରି କର୍ମଚାରୀଙ୍କୁ ଭୟଭୀତ କରିଥିଲେ। ଏହାପରେ ୪୦ ଲକ୍ଷ ଟଙ୍କାର ଗହଣା ସମେତ ୫୦ ହଜାର ଟଙ୍କା ଚୋରି କରି ଫେରାର୍ ହୋଇଯାଇଥିଲେ। ଏଥିରେ ୮୦୦ ଗ୍ରାମ ସୁନା ଗହଣା ରହିଥିବା ଜଣାପଡ଼ିଛି। ବୁଧବାର କିନ୍ତୁ ପୋଲିସକୁ ଏହି ଘଟଣାରେ ସଫଳତା ମିଳିଥିଲା। ୩ ଡକାୟତଙ୍କୁ ଏନ୍କାଉଣ୍ଟର କରି ପୋଲିସ ଚୋରି ହୋଇଥିବା ଗହଣା ଉଦ୍ଧାର କରିଥିଲା।