ଖୋର୍ଦ୍ଧା ଅଫିସ,୨୨ା୮: କୋଲକାତାରୁ ବାଲେଶ୍ୱର, ଜଳେଶ୍ୱର ଅଞ୍ଚଳରୁ ଗଳାବାଟ ଦେଇ ବ୍ରାଉନସୁଗାର ଖୋର୍ଦ୍ଧାରେ ପହଞ୍ଚୁଛି। ଏଠାରୁ ବିଭିନ୍ନ ଗ୍ରାମାଞ୍ଚଳ ଏବଂ ପଡ଼ୋଶୀ ଜିଲା ପୁରୀ ନିକଟବର୍ତ୍ତୀ ଅଞ୍ଚଳକୁ ପଠାଯାଉଛି। ସ୍ବଳ୍ପ ସମୟରେ ଅଧିକ ଟଙ୍କା ରୋଜଗାର ଲାଳସାରେ ଯୁବପିଢି ଏଥିରେ ସାମିଲ ହୋଇ ବିପଦଗାମୀ ହେଉଛନ୍ତି। ତେବେ ଖୋର୍ଦ୍ଧାରେ ବାରମ୍ବାର ଚଢାଉ ସତ୍ତ୍ୱେ ଏହି କାରବାର ରୋକାଯାଇପାରୁନାହିଁ। ବ୍ରାଉନସୁଗାର କାରବାରର ମାଷ୍ଟର ମାଇଣ୍ଡକୁ ପୋଲିସ ଧରିବାରେ ବିଫଳ ହେଉଛି। ପୂର୍ବରୁ ଗୁରୁଜଙ୍ଗରେ ଟାଉନ ପୋଲିସ ଚଢ଼ାଉ ବେଳେ ଦୁଇଥର ବଡ ବେପାରୀ ଖସିଯିବା ଘଟଣା ପୋଲିସର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଥିଲା। ଖୋର୍ଦ୍ଧାରେ କେତେକ ପରିବା ଦୋକାନ, ଗ୍ରୋସେରି, ଫୁଟଫାଥ ଦୋକାନରେ ଚୋରା ନିଶା କାରବାର ଚାଲିଛି। ଖୋର୍ଦ୍ଧାରେ ଏକ ବଡ ନେଟୱର୍କ କାମ କରୁଛି। ସାମନ୍ତରାପୁର, ଠେଙ୍ଗାହାଟ, ଜବରଦସ୍ତିପୁର, ଗୁରୁଜଙ୍ଗ ସମେତ ଜଟଣୀ ବାଇପାସ, ୫୭ ଓ ୧୬ ନମ୍ବର ଜାତୀୟ ରାଜପଥ ଏମାନଙ୍କ ପାଇଁ ଗଳାବାଟ ପାଲଟିଛି।
ଏସ୍ଡିପିଓ ସୁଶିଲ ମିଶ୍ର କହିଛନ୍ତି, ନିଶା କାରବାର ରୋକିବା ଲାଗି ପୋଲିସ ପକ୍ଷରୁ ପଦକ୍ଷେପ ନିଆଯାଉଛି। ଗତ ଦୁଇବର୍ଷ ମଧ୍ୟରେ ଏକାଧିକ ବେପାରୀଙ୍କୁ ଗିରଫ କରାଯାଇଛି। ଗତବର୍ଷ ସାମନ୍ତରାପୁରର ଦୁଇଜଣ ନିଶା ବେପାରୀଙ୍କ ଲକ୍ଷାଧିକ ଟଙ୍କାର ସମ୍ପତ୍ତି ବାଜ୍ୟାପ୍ତି କରିଥିଲା।