କଟକ ଅଫିସ,୨୦ା୧୨: ଜଗତ୍ପୁର ଶିଳ୍ପାଞ୍ଚଳ ଫେଜ୍-୨ରେ ଥିବା ମାହେକ୍ ଇଣ୍ଡଷ୍ଟ୍ରିଜ ପ୍ରାଇଭେଟ ଲିମିଟେଡ ନାମକ ଏକ ନକଲି ସୋୟାବଡି କାରଖାନାକୁ ଶନିବାର ପୋଲିସ ଠାବ କରିଛି। ଦୀର୍ଘଦିନ ଧରି ସେଠାରେ ବେଆଇନ ଭାବେ ଉକ୍ତ କାରଖାନା ଚାଲୁଥିଲା। ଖବରପାଇ ଅପରାହ୍ନରେ ମାଲଗୋଦାମ ଓ ଜଗତ୍ପୁର ପୋଲିସ ମିଳିତ ଭାବେ ସେଠାରେ ଚଢାଉ କରିଥିଲା। ଚଢାଉବେଳେ ସେଠାରୁ ନାମୀଦାମୀ କମ୍ପାନୀର ଲୋଗୋ, ଯନ୍ତ୍ରାଂଶ ସମେତ ୧୦ଲକ୍ଷ ଟଙ୍କାର ସାମଗ୍ରୀ ଜବତ କରାଯାଇଛି। ଜବତ ସାମଗ୍ରୀ ମଧ୍ୟରେ ପ୍ରାୟ ୫୦୦ ବସ୍ତା ସୋୟାବଡି, ୧୫୦ ବସ୍ତା ରାସାୟନିକ ସାମଗ୍ରୀ, ୪୦ ବସ୍ତା ଚାଉଳ ଗୁଣ୍ଡ ରହିଛି। ଏହି ଘଟଣାରେ ପୋଲିସ କାରଖାନା ମାଲିକ ଓ ତାଙ୍କର ଜଣେ ସହଯୋଗୀଙ୍କୁ ଅଟକ ରଖି ପଚରାଉଚରା ଚଳାଇଛି। ଏ ନେଇ ଜଗତ୍ପୁର ଥାନାରେ ଏକ ମାମଲା(ନଂ.୫୩୧/୨୦) ରୁଜୁ ହୋଇଥିବା ଥାନାଧିକାରୀ ରବୀନ୍ଦ୍ର ମେହେର କହିଛନ୍ତି। ଏହି ଚଢ଼ାଉରେ କଟକ କମିଶନରେଟ ପୋଲିସର ଜୋନ-୧ ଏସିପି ଅମରେନ୍ଦ୍ର ପଣ୍ଡା ଓ ମାପ ଓଜନ ଅଧିକାରୀ ଉତ୍କଳ କେଶରୀ ମହାନ୍ତି ସାମିଲ ହୋଇଥିଲେ।
ସୂଚନାଯୋଗ୍ୟ, କଟକର ବିଭିନ୍ନ କାରଖାନାରେ ନକଲି ସାମଗ୍ରୀ ପ୍ରସ୍ତୁତ କରାଯାଇ ରାଜ୍ୟର ବିଭିନ୍ନ ସ୍ଥାନକୁ ବିକ୍ରି ପାଇଁ ପଠାଯାଉଛି। ଦୀର୍ଘଦିନ ହେବ ଏଭଳି ବେଆଇନ କାର୍ଯ୍ୟ ଚାଲୁଥିଲେ ମଧ୍ୟ ପୋଲିସ ଏ ସମ୍ପର୍କରେ ସୁରାକ ପାଇପାରୁନାହିଁ। ଯାହାକୁ ନେଇ ପୋଲିସର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ଅଭିଯୋଗ ପାଇବା ପରେ ପୋଲିସ କେତେକ କାରଖାନା ଉପରେ ଚଢାଉ କରୁଛି। ହେଲେ ଏଭଳି ବେଆଇନ କାର୍ଯ୍ୟକୁ ସମ୍ପୂର୍ଣ୍ଣ ମାତ୍ରାରେ ରୋକିବାରେ ବିଫଳ ହୋଇଛି। ଆଗାମୀ ଦିନରେ ଏଭଳି ନକଲି ଓ ଅପମିଶ୍ରଣ ସାମଗ୍ରୀ ତିଆରି ହେଉଥିବା କାରଖାନା ଉପରେ ପୋଲିସ ଏବଂ ପ୍ରଶାସନ ଚଢାଉ ଜାରି ରଖିବା ପାଇଁ ସହରବାସୀ ଦାବି କରିଛନ୍ତି।