ବାଲେଶ୍ୱର ଅଫିସ, ୨୧।୩: ବାଲେଶ୍ୱର ସହରରେ ରାମନବମୀ ଉତ୍ସବ ଧୁମ୍ଧାମ୍ରେ ପାଳନ ହେଉଥିବା ବେଳେ ପୋଲିସ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥା ପାଇଁ ସୋମବାର ସହରରେ ଫ୍ଲାଗମାର୍ଚ୍ଚ କରାଯାଇଛି। ଜିଲା ଆରକ୍ଷୀ ଅଧୀକ୍ଷକ ସାଗରିକା ନାଥଙ୍କ ତତ୍ତ୍ୱାବଧାନରେ ରାପିଡ୍ ଆକ୍ସନ ଫୋର୍ସ ଏବଂ ଜିଲା ପୋଲିସ ମିଳିତ ଭାବେ ସହରରେ ଫ୍ଲାଗମାର୍ଚ୍ଚ କରିଥିଲେ।
ଜିଲା ଆରକ୍ଷୀ ଅଧୀକ୍ଷକ ସାଗରିକା ନାଥ କହନ୍ତି, ରାମନବମୀ ପରିପ୍ରେକ୍ଷୀରେ ସହରରେ ଥିବା ସମ୍ବେଦନଶୀଳ ଅଞ୍ଚଳଗୁଡ଼ିକ ପରିଦର୍ଶନ କରାଯାଉଛି। ଆଗାମୀ ଦିନରେ ଆସୁଥିବା ରାମନବମୀ ଉତ୍ସବ ଶାନ୍ତି ଓ ଶୃଙ୍ଖଳାର ସହ ପାଳନ କରାଯିବ। ରାପିଡ୍ ଆକ୍ସନ ଫୋର୍ସକୁ ନେଇ ବିଭିନ୍ନ ପ୍ରକାର ଅସୁବିଧା ସମ୍ମୁଖୀନ ହେବା ପାଇଁ ଥିବା କୌଶଳ ପ୍ରସ୍ତୁତ କରିବୁ, ଯେପରି ରାମନବମୀ ଉତ୍ସବ ବିନା ଗଣ୍ଡଗୋଳ ଓ ଅସୁବିଧାରେ ସମ୍ପନ୍ନ ହେବ। ଆସନ୍ତା ୨୨ ତାରିଖରେ ପ୍ରଶାସନ ପକ୍ଷରୁ ଶାନ୍ତି କମିଟି ବୈଠକ ଅନୁଷ୍ଠିତ ହେବ। ଜିଲାପାଳଙ୍କ ଉପସ୍ଥିତିରେ ସମସ୍ତ ବୁଦ୍ଧିଜୀବୀ, ଲାଇନ୍ ଡିପାର୍ଟମେଣ୍ଟ ଉପସ୍ଥିତ ରହି ବିଭିନ୍ନ ସମସ୍ୟା ଓ ସମାଧାନ ସମ୍ପର୍କରେ ଆଲୋଚନା କରାଯାଇ ନୀତି ସ୍ଥିର ହେବାର ପ୍ରକାଶ କରିଛନ୍ତି।
