ଭୁବନେଶ୍ୱର,୨୬।୧(ବ୍ୟୁରୋ): ବିଭିନ୍ନ କ୍ଷେତ୍ରରେ ଉତ୍ତମ କାର୍ଯ୍ୟ ଓ ଉଲ୍ଲେଖନୀୟ ସେବା ପାଇଁ କେନ୍ଦ୍ର ସରକାରଙ୍କ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ବିଭିନ୍ନ ବର୍ଗରେ ୯୩୯ ଜଣଙ୍କୁ ପୋଲିସ ପଦକ ଦିଆଯିବ ବୋଲି ମଙ୍ଗଳବାର ଘୋଷଣା କରାଯାଇଛି। ବୁଧବାର ସାଧାରଣତନ୍ତ୍ର ଦିବସରେ ଏହି ପଦକ ପ୍ରଦାନ କରାଯିବ। ଚଳିତ ବର୍ଷ ଓଡ଼ିଶାରୁ ମୋଟ ୨୨ ଜଣଙ୍କୁ ପୋଲିସ ପଦକ ମିଳିବ। ୨ ଜଣଙ୍କୁ ରାଷ୍ଟ୍ରପତି ପୋଲିସ ପଦକ, ୧୧ ଜଣଙ୍କୁ ପ୍ରଶଂସନୀୟ ସେବା ଏବଂ ୯ ଜଣଙ୍କୁ ସାହସିକତା କ୍ଷେତ୍ରରେ ପୋଲିସ ପଦକ ପାଇଁ ମନୋନୀତ କରାଯାଇଛି।
ଭୁବନେଶ୍ୱର ଅତିରିକ୍ତ ଡିସିପି ପ୍ରାଣକୃଷ୍ଣ ରାଉତ, କଟକର କନଷ୍ଟେବଳ ପ୍ରଦୀପ ମହାନ୍ତିଙ୍କୁ ରାଷ୍ଟ୍ରପତି ପୋଲିସ ପଦକରେ ସମ୍ମାନିତ କରାଯିବ।
ପ୍ରଶଂସନୀୟ ସେବା ପାଇଁ ପୋଲିସ ଆଇଜି (ଭିଜିଲାନ୍ସ ନିର୍ଦ୍ଦେଶାଳୟ) ସଞ୍ଜୟ କୁମାର କୌଶଲ, ଡିଏସ୍ପି ସୁଜାତା ଖଣ୍ଡୁଆଳ, ଡିଏସ୍ପି କମଳ ଲୋଚନ ଭୂୟାଁ, ଡିଏସ୍ପି ରଘୁନାଥ ପ୍ରସାଦ ନାୟକ, ଏସିପି ଅରୁଣ ସ୍ବାଇଁ, ଡ୍ରାଇଭର ହାବିଲଦାର ଶେଖ୍ ଆତାୱାଲ୍ଲା, ଏସ୍ଆଇ କୃତ୍ତିବାସ ପଣ୍ଡା, ଏସ୍ଆଇ ମଧୁସୂଦନ ବେହେରା, ଏସ୍ଓଜି ଡେପୁଟି କମାଣ୍ଡାଣ୍ଟ ପୱନ ଦୟାଲ ବା, ଡିଏସ୍ପି ଅଜୟ କୁମାର ମିଶ୍ର ଓ କନଷ୍ଟେବଳ ମାଇଲି ମୋହନଙ୍କୁ ପୋଲିସ ପଦକ ଦିଆଯିବ। ସାହସିକତା ପାଇଁ ଏସ୍ପି ଋଷିକେଶ ଦ୍ୟାନଦେଓ, ଓଏପିଏଫ୍ ସ୍ବର୍ଗତ ଜୟରାମ କବାସି, ରାମୁ ଦୁରୁଆ, କନଷ୍ଟେବଳ ବନ୍ଧୁ ହାନ୍ତାଳ, ଘେନୁ ହାନ୍ତାଳ, ଜୀବନ ସାହି, ଔଷାଧିନାଥ ବେହେରା, ହାବିଲଦାର ପ୍ରବୀଣ ଥାପା ଏବଂ ରାଜେଶ ବିଶ୍ୱକର୍ମାଙ୍କୁ ପଦକ ମିଳିବ।
ବେସାମରିକ ପ୍ରତିରକ୍ଷା, ହୋମଗାର୍ଡ ଓ ଜେଲ ବିଭାଗରେ ରାଜ୍ୟର ୭ ଅଧିକାରୀ ଓ କର୍ମଚାରୀଙ୍କୁ ପଦକ ପ୍ରଦାନ କରାଯିବ। କେନ୍ଦ୍ର ସରକାରଙ୍କ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଏନେଇ ଘୋଷଣା କରାଯାଇଛି। ପ୍ରଶଂସନୀୟ ସେବା ପାଇଁ ହୋମଗାର୍ଡ କମାଣ୍ଡର ଜୟନ୍ତ ପଟେଲ, ହୋମଗାର୍ଡ ମାୟାଧର ସୂତାର, ହୋମଗାର୍ଡ ରବିନ୍ଦ୍ର ମଲ୍ଲିକ, ବେସାମରିକ ପ୍ରତିରକ୍ଷା ସ୍ବେଚ୍ଛାସେବୀ ବି. ରାଜକିଶୋର ସିଂ,ସୁରଜ ହେମ୍ବ୍ରମଙ୍କୁ ପଦକ ମିଳିବ। ଜେଲ ବିଭାଗରୁ ଭୁବନେଶ୍ୱର ଝାରପଡ଼ା ଜେଲ ସୁପରିଣ୍ଟେଣ୍ଡେଣ୍ଟ ସତ୍ୟପ୍ରକାଶ ସ୍ବାଇଁଙ୍କୁ ରାଷ୍ଟ୍ରପତି ପଦକ, ଜେଲର ଦିଲ୍ଲୀପ କେରକେଟାଙ୍କୁ ଉତ୍କୃଷ୍ଟ ସେବା ପାଇଁ ପଦକ ପ୍ରଦାନ କରାଯିବ।