ଦାମନଯୋଡି,୨୫।୩(ମାନସ ରଞ୍ଜନ କର): ଏସ୍ଡିଜେଏମ୍ କୋର୍ଟ କୋରାପୁଟଙ୍କ ନିର୍ଦ୍ଦେଶ କ୍ରମେ ଦାମନଯୋଡ଼ି ଥାନା ପୋଲିସ ଅଁଳାବାଡି କଲୋନୀର ବିଜୟ ମୁଦୁଲିଙ୍କ ଘରେ ସ୍ଥାବର ଅସ୍ଥାବର ସମ୍ପତ୍ତି ବାଜ୍ୟାପ୍ତି ପାଇଁ ଲଟ୍କା ଜାରି କରିଛି।
୨୦୧୧ରେ ବିଜୟଙ୍କ ନାମରେ ଏକ ସଙ୍ଗୀନ ମାମଲା ରୁଜୁ ହୋଇଥିଲା। ଏନେଇ କୋର୍ଟଙ୍କ ପକ୍ଷରୁ ବାରମ୍ବାର ବିଜୟଙ୍କ ନାଁରେ ସମନ ସହ ଓ୍ବାରେଣ୍ଟ ଜାରି କରାଯାଇଥିଲା। କିନ୍ତୁ ସେ ଅଦାଲତଙ୍କ ନିର୍ଦ୍ଦେଶକୁ ଅବମାନନା କରିଆସୁଥିଲେ। ତେଣୁ ଅଦାଲତଙ୍କ ନିର୍ଦ୍ଦେଶ କ୍ରମେ ସିଆର୍ପିସି ସେକ୍ସନ ୮୨ ଆଧାରରେ ଦାମନଯୋଡ଼ି ଥାନା ପୋଲିସ ପକ୍ଷରୁ ଅଞ୍ଚଳବାସୀଙ୍କ ଉପସ୍ଥିତରେ ଡ଼ାକବାଜି ଯନ୍ତ୍ର ମାଧ୍ୟମରେ ପ୍ରଚାର କରାଯାଇ ଲଟ୍କା ଜାରି କରାଯାଇଛି।
ଆସନ୍ତା ୩୦ ଦିନ ଅର୍ଥାତ୍ ଏପ୍ରିଲ ୨୪ତାରିଖ ମଧ୍ୟରେ ବିଜୟ କୋର୍ଟରେ ଆତ୍ମସମର୍ପଣ ନ କରନ୍ତି ତେବେ ତାଙ୍କର ସମସ୍ତ ସ୍ଥାବର ଅସ୍ଥାବର ସମ୍ପତ୍ତି ବାଜ୍ୟାପ୍ତି କିମ୍ବା ନିଲାମ କରାଯିବ ବୋଲି ନିର୍ଦ୍ଦେଶନାମାରେ ଉଲ୍ଲେଖ ରହିଛି।
ସୂଚନାଯୋଗ୍ୟ, ବିଜୟ କୋରାପୁଟ ବ୍ଲକ ଅଧୀନ ମାଥାଲପୁଟ ପଞ୍ଚାୟତର ପୂର୍ବତନ ସରପଞ୍ଚ ଥିଲେ। ନାବାଳିକା ବଳାତ୍କାର ନେଇ ୨୦୧୧ରେ ତାଙ୍କ ନାମରେ ଏକ ମାମଲା ରୁଜୁ ହୋଇଥିଲା। ସେହିଦିନଠାରୁ ସେ ଫେରାର ଅଛନ୍ତି। ଅନ୍ୟପକ୍ଷେ ଗତ କିଛିବର୍ଷ ତଳେ ବିଜୟଙ୍କ ମୃତ୍ୟୁ ଘଟିଥିବା ଖବର ପ୍ରଚାରିତ ହୋଇଥିଲା। ତେବେ ବିଜୟଙ୍କ ମୃତ୍ୟୁକୁ ନେଇ ନିର୍ଦ୍ଦିଷ୍ଟ ଫଟୋ କିମ୍ବା ଠୋସ୍ ପ୍ରମାଣ ନ ଥିବାରୁ ସେବେଠାରୁ ଆଜି ପର୍ଯ୍ୟନ୍ତ ଲୋକଙ୍କ ମଧ୍ୟରେ ସନ୍ଦେହ ରହିଥିବା ବେଳେ ଏପର୍ଯ୍ୟନ୍ତ ପରିବାର ପକ୍ଷରୁ କୌଣସି ସ୍ପଷ୍ଟ କରି ନାହାନ୍ତି।