ଭୋପାଳ,୨୧।୮: ମଧ୍ୟପ୍ରଦେଶର ଇନ୍ଦୋର ସହର ଲଗାତାର ୪ର୍ଥ ଥର ସ୍ବଚ୍ଛତା ପାଇଁ ଭାରତର ସବୁଠୁ ସ୍ବଚ୍ଛ ସହର ଭାବେ ମାନ୍ୟତା ହାସଲ କରିଛି। ସହର ପରେ ଏବେ ଇନ୍ଦୋର ପୋଲିସ କିଛି ଏଭଳି କାର୍ଯ୍ୟ କରିଛି, ଯେଉଁଥିପାଇଁ ତାଙ୍କୁ ବେଶ୍ ପ୍ରଶଂସା କରାଯାଉଛି। ନିକଟରେ ୨ଜଣ ଅପରାଧୀଙ୍କୁ ପୋଲିସ ଧରି ରାସ୍ତା ଉପରେ ସମସ୍ତଙ୍କ ସମ୍ମୁଖରେ ବସଉଠ୍ କରାଇବା ସହ ଭୂଇଁରେ ମୁଣ୍ଡ ନୁଆଇଁ କ୍ଷମା ମଗାଇଥିଲେ। ଏହାର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
ସୂଚନାଯୋଗ୍ୟ, ଇନ୍ଦୋର ଦ୍ୱାରିକାପୁରୀରେ ୨ଜଣ ଅପରାଧୀ ରାସ୍ତା ମଝିରେ ସମସ୍ତଙ୍କ ସାମ୍ନାରେ ବସଉଠ୍ କରିଥିଲେ। ବସଉଠ୍ କରିବା ପରେ ଉକ୍ତ ଦ୍ୱୟ ଅପରାଧୀଙ୍କୁ ପୋଲିସ ଭୂଇଁରେ ମୁଣ୍ଡ ନୁଆଁଇ କ୍ଷମା ମାଗିବାକୁ କହିଥିଲେ। ଏହାକୁ ଦେଖି ଘର ବାହାରେ ଓ ବାଲକୋନିରେ ଠିଆହୋଇଥିବା ଲୋକେ ପୋଲିସଙ୍କୁ ପ୍ରଶଂସା କରିବା ସହ ତାଳି ବଜାଇଥିଲେ। ଶୁକ୍ରବାର ସକାଳେ ଏହି ଭିଡିଓକୁ ପୋଷ୍ଟ କରାଯାଇଥିବା ବେଳେ ଏବେ ଭାଇରାଲ ହେବାରେ ଲାଗିଛି। ଶେୟାର ହେବାର ମାତ୍ର ୬ଘଣ୍ଟା ଭିତରେ ଏହାକୁ ୬ହଜାରରୁ ଊର୍ଦ୍ଧ୍ୱ ଲୋକ ଦେଖିବା ସହ ୪୦୦ରୁ ଊର୍ଦ୍ଧ୍ୱ ଲାଇକ ମଧ୍ୟ କରିଛନ୍ତି। ପୋଲିସର ଏଭଳି କାର୍ଯ୍ୟକୁ ଲୋକେ ପ୍ରଶଂସା କରିବା ସହ ପ୍ରତିକ୍ରିୟା ରଖିଛନ୍ତି।