ମାଲକାନଗିରି,୨୩ା୫(ଦୁର୍ଯ୍ୟୋଧନ ପାତ୍ର)/ ରାଉରକେଲା, ୨୪ା୫(ସଙ୍ଗୀତା ଜେନା):ଛତିଶଗଡ଼ ନାରାୟଣପୁର-ବିଜାପୁର ଜିଲା ସୀମାନ୍ତରେ ପୋଲିସ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଛି। ଏଥିରେ ୭ ମାଓବାଦୀ ନିହତ ହୋଇଛନ୍ତି। ବିଜାପୁର ଆବୁଜମାଡ ଜଙ୍ଗଲରେ ଡିଆର୍ଜି, ଏସ୍ଟିଏଫ୍ର ପ୍ରାୟ ୮୦୦ରୁ ଊର୍ଦ୍ଧ୍ୱ ଯବାନ ନାରାୟଣପୁର ଏସ୍ପି ପ୍ରତାପ କୁମାରଙ୍କ ନେତୃତ୍ୱରେ ଗତ ୨ଦିନ ଧରି ସର୍ଚ୍ଚ ଅପରେଶନ ଜାରି ରଖିଥିଲେ। ଯବାନମାନଙ୍କୁ ଦେଖି ମାଓବାଦୀମାନେ ଗୁଳି ଚଳାଇଥିଲେ ା ଯବାନଙ୍କ ପାଲଟା ଆକ୍ରମଣକୁ ସାମ୍ନା କରି ନ ପାରି ସେମାନେ ଜଙ୍ଗଲ ଭିତରେ ଛତ୍ରଭଙ୍ଗ ଦେଇଥିଲେ ା ଗୁଳି ବିନିମୟ ପରେ ଯବାନମାନେ ସର୍ଚ୍ଚ ଅପରେଶନ ସମୟରେ ୭ ମାଓବାଦୀଙ୍କ ମୃତଦେହ ଠାବ ସହ ବିପୁଳ ପରିମାଣର ଅସ୍ତ୍ରଶସ୍ତ୍ର ଓ ବନ୍ଧୁକ ଇତ୍ୟାଦି ଜବତ କରିଥିଲେ।
ସେହିପରି ଓଡ଼ିଶା- ଝାଡଖଣ୍ଡ ସୀମାନ୍ତ କରାଇକେଲା ଅଞ୍ଚଳରେ ଗୁରୁବାର ସୁରକ୍ଷାକର୍ମୀ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଥିଲା। ଏଥିରେ ଝାଡଖଣ୍ଡ ଚାଇଁବାସାର ବୁଧରାମ ମୁଣ୍ଡା(୨୬) ନିହତ ହୋଇଛନ୍ତି। ନିଷିଦ୍ଧ ଘୋଷିତ ଏକ ମାଓବାଦୀ ସଙ୍ଗଠନର ସଦସ୍ୟ ଅମିତ ମୁଣ୍ଡା ସମର୍ଥକଙ୍କ ସହ ଖୁଣ୍ଟି, ସରାଇକେଲା ଆଦି ଅଞ୍ଚଳରେ ସକ୍ରିୟ ଥିବା ଜଣାପଡିବା ପରେ ସୁରକ୍ଷାକର୍ମୀ ବୁଧବାର କୋମ୍ବିଂ ଅପରେଶନ୍ କରିଥିଲେ। ଗୁରୁବାର ସୀମାନ୍ତ କରାଇକେଲା ଅଞ୍ଚଳରେ ସୁରକ୍ଷାବଳ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ହୋଇଥିଲା। ପ୍ରାୟ ୨୦ମିନିଟ୍ ଗୁଳିବିନିମୟ ପରେ ମାଓବାଦୀମାନେ ଛତ୍ରଭଙ୍ଗ ଦେଇଥିଲେ। ପରେ ସୁରକ୍ଷାବଳ ଦ୍ୱାରା ଉକ୍ତ ସ୍ଥାନରେ ଯାଞ୍ଚ କରାଯାଇଥିଲା। ସେଠାରୁ ଜଣେ ମାଓବାଦୀଙ୍କ ମୃତଦେହ ଉଦ୍ଧାର କରାଯାଇଥିଲା। ଏଥିସହ ୧ଟି ପିସ୍ତଲ, ମ୍ୟାଗାଜିନ୍, ୨୦ଟି ଅଫୁଟା ଗୁଳି, ପିସ୍ତଲ ପାଉଚ, ୭.୬୨ ଏସ୍ଏଲଆର୍ ୧୩୪ଟି ଗୁଳି, ୱାକିଟକି, ରେଡ଼ିଓ, ମାଓବାଦୀ ପୋଷାକ ଓ ବିସ୍ଫୋଟକ ଜବତ ହୋଇଥିଲା।