ଦିଗପହଣ୍ଡି,୩୦/୧୨(ଅଶେଷ ନାଥ ମିଶ୍ର):ଦିଗପହଣ୍ଡି ପୋଲିସ ଗଞ୍ଜାମ ଜିଲା ବୁଗୁଡ଼ା ରାଣୀ ସାହିର ଗଣେଶ ବେହେରାଙ୍କୁ ରବିବାର ଗିରଫ କରି କୋର୍ଟ ଚାଲାଣ କରିଛି। ଥାନା ମାମଲା ନଂ.୫୦୭/୨୪ ଅନୁଯାୟୀ ଜାମିନ ଆବେଦନ ନାମଞ୍ଜୁର ହେବାରୁ ଅଭିଯୁକ୍ତଙ୍କୁ ଦିଗପହଣ୍ଡି ସବ୍ ଜେଲ ହାଜତକୁ ପଠାଇ ଦିଆଯାଇଛି। ଦିଗପହଣ୍ଡି ଥାନା ଏଏସ୍ଆଇ ଅଜୟ କୁମାର ନାୟକ ସଦଳବଳେ ଶନିବାର ସନ୍ଧ୍ୟା ପ୍ରାୟ ୭ଟାରେ ସ୍ଥାନୀୟ ପୁଞ୍ଜିକଂୟା ଚାରିଛକରେ ରାସ୍ତାରେ ଚଳପ୍ରଚଳ କରୁଥିବା ବାଇକ ଗୁଡ଼ିକୁ ଚେକିଂ କରୁଥଲେ। ଘରୋଇ ଅର୍ଥ ଲଗାଣକାରୀ ସଂସ୍ଥା କୀର୍ତ୍ତନ ଫାଇ ଫାଇନାନ୍ସ ଦିଗପହଣ୍ଡି ଶାଖାର କର୍ମଚାରୀ ଗଣେଶ ହୋଣ୍ଡା ବାଇକ୍ (ନଂ. ଓଡ଼ି ୩୨ ଡି-୧୪୬୪) ଯୋଗେ ବିନା ହେଲମେଟରେ ଦିଗପହଣ୍ଡି ବସଷ୍ଟାଣ୍ଡରୁ ପୁଞ୍ଜିକଂୟା ଛକକୁ ଦୃତଗତିରେ ଆସୁଥିଲେ। ପୋଲିସ ଏଏସଆଇ ରାସ୍ତାରେ ତାଙ୍କୁ ଅଟକାଇ ବାଇକର ନଥିପତ୍ର ଦେଖାଇବାକୁ କହିଥିଲେ। ସେ ମନା କରିବାରୁ ଜଣେ ପୋଲିସ କର୍ମଚାରୀ ବାଇକର ଚାବି ନେଇଯାଇଥିଲେ। ଏଥିରେ ଉତ୍ତେଜିତ ହୋଇ ଗଣେଶ କର୍ତ୍ତବ୍ୟରତ ଏଏସ୍ଆଇଙ୍କୁ ଆପତ୍ତିଜନକ ଭାଷାରେ ଗାଳି କରିବାସହ ତାଙ୍କ ସାର୍ଟ କଲର ଧରି ଆକ୍ରମଣ କରିଥିଲେ। ଘଟଣାସ୍ଥଳରେ ପ୍ରବଳ ଜନଗହଳି ହୋଇଥିଲା। ଖବରପାଇ ଥାନା ଏସ୍ଆଇ ଜ୍ୟୋତି ରଞ୍ଜନ ବେହେରା ସଦଳବଳେ ଘଟଣାସ୍ଥଳରେ ପହଞ୍ଚି ସ୍ଥିତି ନିୟନ୍ତ୍ରଣ କରିବା ସହ ଅଭିଯୁକ୍ତଙ୍କୁ ବାଇକ ସହ ଥାନାକୁ ନେଇଥିଲେ।
