ସୁନ୍ଦରଗଡ,୧୭ା୩(ଜୟ ନାରାୟଣ ମେଣ୍ଡୁଳି): ବିବାହ ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ରଖିଲେ। ଯୁବତୀ ଜଣକ ଏକ ପୁତ୍ର ସନ୍ତାନ ଜନ୍ମ ଦେଇଥିଲେ। ହେଲେ ଶେଷରେ ପ୍ରେମିକାଙ୍କୁ ଛାଡି ଅନ୍ୟତ୍ର ବିବାହ କରିବାକୁ ମନସ୍ଥ କରିଥିଲେ ଯୁବକ। ବରବେଶରେ ଯାଉଥିବା ବେଳେ ଥାନାକୁ ଉଠାଇ ନେଲା ପୋଲିସ। ଏଭଳି ଘଟଣା ଘଟିଛି ସୁନ୍ଦରଗଡ଼ ଜିଲା ଧରୁଆଡିହି ଥାନା ଅଞ୍ଚଳରେ।
ମିଳିଥିବା ସୂଚନା ମୁତାବକ, ଧରୁଆଡିହି ଥାନା ସଲଙ୍ଗାବୁଡ ଗ୍ରାମର ଜଣେ ଯୁବତୀଙ୍କ ସହିତ ସମ୍ବଲପୁର ଜିଲା ବାମରା ଖୋଖୋପଡାର ଜଣେ ଯୁବକଙ୍କ ୭ବର୍ଷ ହେବ ପ୍ରେମ ସମ୍ପର୍କ ଥିଲା। ବିବାହର ପ୍ରତିଶ୍ରୁତି ଦେଇ ଯୁବକ ଜଣକ ସଲଙ୍ଗାବୁଡ ଆସି ଯୁବତୀଙ୍କ ଘରେ ରହିଥିଲେ। ତାଙ୍କ ସହିତ ଶାରିରୀକ ସମ୍ପର୍କ ମଧ୍ୟ ରଖିଥିଲେ। ଫଳରେ ଯୁବତୀ ଜଣକ ଏକ ପୁତ୍ର ସନ୍ତାନ ଜନ୍ମ ଦେଇଥିଲେ। ଗତ ୫ବର୍ଷ ହେବ ଯୁବକ ଜଣକ କାମ କରିବାକୁ ଚେନ୍ନାଇ ଚାଲିଯାଇଥିଲେ। ଏପରିକି ନିଜର ଫୋନ ନମ୍ବର ବଦଳାଇ ଦେଇଥିବାରୁ ଯୁବତୀ ଜଣକ ଯୋଗାଯୋଗ କରିପାରି ନ ଥିଲେ।
ଗତ ଏକ ସପ୍ତାହ ହେବ ପ୍ରେମିକ ଘରକୁ ଆସି ଧରୁଆଡିହିରେ ନିଜ ମାମୁଁଙ୍କ ଝିଅଙ୍କୁ ବିବାହ କରୁଥିବା ଖବର ପାଇଥିଲେ ଯୁବତୀ ଜଣକ। ଏନେଇ ସେ ପ୍ରଥମେ ଗୋବିନ୍ଦପୁର ଥାନାରେ ଅଭିଯୋଗ କରିଥିଲେ। ହେଲେ ଧରୁଆଡିହି ଥାନାରେ ଅଭିଯୋଗ କରିବାକୁ ପୋଲିସ କହିଥିଲେ। ରବିବାର ଯୁବକ ଜଣଙ୍କ ବରବେଶରେ କନ୍ୟା ପିତାଙ୍କ ଘରକୁ ଆସୁଥିବା ବେଳେ ଧରୁଆଡିହି ଥାନା ପୋଲିସ ବରଙ୍କୁ ଉଠାଇ ନେଇଥିଲା। ପ୍ରେମିକାଙ୍କ ଏବେ ଏକ ୫ବର୍ଷର ସନ୍ତାନ ଅଛି। ପୋଲିସ କାର ସହିତ ଉଭୟଙ୍କୁ ଥାନାରେ ଅଟକ ରଖି ପଚରାଉଚରା ଚଳାଇଛି।
