ନୂଆଦିଲ୍ଲୀ,୨ା୪: ଦୁର୍ନୀତି, ମାତ୍ରାଧିକ କାର୍ଯ୍ୟାନୁଷ୍ଠାନ, ନିରପେକ୍ଷତାର ଅଭାବ ଓ ରାଜନେତାଙ୍କ ସହ ଘନିଷ୍ଠ ସମ୍ପର୍କ ଯୋଗୁ ପୋଲିସର ଛବି ଖରାପ ହୋଇଯାଇଛି। ତେଣୁ ଅସୁବିଧାରେ ପଡ଼ିଥିବା ଲୋକେ ଜରୁରୀ ସମୟରେ ପୋଲିସ ନିକଟକୁ ଯିବା ପାଇଁ କୁଣ୍ଠାବୋଧ କରୁଛନ୍ତି ବୋଲି ଶୁକ୍ରବାର ଭାରତର ପ୍ରଧାନ ବିଚାରପତି (ସିଜେଆଇ) ଏନ୍.ଭି. ରମନା କହିଛନ୍ତି। ସେହିପରି ସିବିଆଇ ଉପରେ ମଧ୍ୟ ସିଜେଆଇ ଅସନ୍ତୋଷ ବ୍ୟକ୍ତ କରିଛନ୍ତି। ସିବିଆଇର କାର୍ଯ୍ୟାନୁଷ୍ଠାନ ଓ ନିଷ୍କ୍ରିୟତା ଏହାର ବିଶ୍ୱସନୀୟତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ସିବିଆଇ ଭଳି ଏଜେନ୍ସିଗୁଡ଼ିକୁ ଗୋଟିଏ ଛାତ ତଳକୁ ଆଣିବା ପାଇଁ ଏକ ସ୍ବୟଂଶାସିତ ସଂସ୍ଥା ଗଠନ ଆବଶ୍ୟକ ବୋଲି ଜଷ୍ଟିସ୍ ରମନା ମତ ରଖିଛନ୍ତି।
ରୋଲ୍ ଆଣ୍ଡ୍ ରେସ୍ପନ୍ସିବିଲିଟିଜ୍ ଅଫ୍ ଇନ୍ଭେଷ୍ଟିଗେଟିଭ୍ ଏଜେନ୍ସିଜ୍’ ଶୀର୍ଷକ ଊନବିଂଶ ଡି.ପି. କୋହଲି ବକ୍ତୃତାମାଳାକୁ ସମ୍ବୋଧନ କରି ଜଷ୍ଟିସ୍ ରମନା କହିଛନ୍ତି, ଶାସନ ବଦଳିବା ପରେ ପୋଲିସ ଅଧିକାରୀମାନଙ୍କୁ ହଇରାଣ କରାଯାଉଥିବା ନେଇ ଅନେକ ସମୟରେ ସେମାନେ ଆମକୁ ଗୁହାରି କରିଥାଆନ୍ତି। ସେମାନେ ବୁଝିବା ଦରକାର ଯେ, ରାଜନୈତିକ କାର୍ଯ୍ୟନିର୍ବାହୀମାନେ ସମୟକ୍ରମେ ବଦଳିବେ। କିନ୍ତୁ ପୋଲିସ ଅଧିକାରୀମାନେ ସ୍ଥାୟୀ ଭାବେ ରହିଥିବେ। ୫୦ରୁ ଊର୍ଦ୍ଧ୍ୱ ବର୍ଷ ହେଲା ପୋଲିସ ସଂସ୍କାର ସରକାରଙ୍କ କାର୍ଯ୍ୟସୂଚୀରେ ରହିଆସିଛି। କିନ୍ତୁ ଅଦ୍ୟାବଧି ଏଦିଗରେ କିଛି ଅଗ୍ରଗତି ହୋଇନାହିଁ। ସ୍ବାଧୀନତା ପରବର୍ତ୍ତୀ ସମୟରେ ସମାଜରେ ନାଟକୀୟ ପରିବର୍ତ୍ତନ ଆସିଛି। ପୋଲିସ ବ୍ୟବସ୍ଥାରେ ସଂସ୍କାର ସାମ୍ପ୍ରତିକ ଦୃଶ୍ୟପଟ ଅନୁଯାୟୀ କରାଯିବା ଜରୁରୀ। ଗଣତାନ୍ତ୍ରିକ ପୋଲିସ ବ୍ୟବସ୍ଥା ପାଇଁ ରାଜନୈତିକ ଇଚ୍ଛାଶକ୍ତି ଆବଶ୍ୟକ। ପୋଲିସ ବାହିନୀର ଭିତ୍ତିଭୂମିରେ ବଡ଼ ପରିବର୍ତ୍ତନ ଲୋଡ଼ା ହେଉଥିବା ବିଷୟ ସରକାରୀ ରିପୋର୍ଟଗୁଡ଼ିକରେ ସ୍ବୀକାର କରାଯାଇଛି। କିନ୍ତୁ ଆମ ତଦନ୍ତକାରୀ ସଂସ୍ଥାଗୁଡ଼ିକ ଏକ ସାଧାରଣ ଆଇନ ଦ୍ୱାରା ପରିଚାଳିତ ହେଉନାହାନ୍ତି। ଅନୁଷ୍ଠାନ ହିସାବରେ ଆମକୁ ସାମାଜିକ ବୈଧତା ହାସଲ କରିବାକୁ ପଡ଼ିବ। ପୋଲିସ ଅପରାଧ ନିରାକରଣ ସହ ଆଇନଶୃଙ୍ଖଳା ବଜାୟ ରଖିବା ଉପରେ କାର୍ଯ୍ୟ କରୁ ବୋଲି ସିଜେଆଇ ପରାମର୍ଶ ଦେଇଛନ୍ତି।