ବମ୍ବେ: ସୁଶାନ୍ତ ସିଂ ରାଜପୁତଙ୍କ ମୃତ୍ୟୁକୁ ଦୁଇ ସପ୍ତାହରୁ ଅଧିକ ସମୟ ବିତିଗଲାଣି। ହେଲେ ପ୍ରଶଂସକମାନେ ତାଙ୍କୁ ନ୍ୟାୟ ଦେବା ଲାଗି ଦାବି କରି ଆସୁଛନ୍ତି।
ପ୍ରାଥମିକ ତଦନ୍ତରୁ ପୋଲିସ ସୁଶାନ୍ତଙ୍କ ମୃତ୍ୟୁ ଆତ୍ମହତ୍ୟାଜନିତ ବୋଲି କହୁଛି। ହେଲେ ପ୍ରଶଂସକ, ପରିବାରଲୋକେ, କିଛି ନେତା ଏବଂ ଅଭିନେତା ତାଙ୍କ ମୃତ୍ୟୁକୁ ହତ୍ୟା ବୋଲି ଦର୍ଶାଉଛନ୍ତି। ଏପରିକି ଏହି ମାମଲାର ସିବିଆଇ ଯାଞ୍ଚ କରାଯାଉ ବୋଲି ଦାବି ହେଉଛି। ଏବେ ପର୍ଯ୍ୟନ୍ତ ପୋଲିସ ପାଖାପାଖି ତିରିଶ ଜଣ ଲୋକଙ୍କୁ କରିଛି ପଚରାଉଚରା। ଏହି ସମୟରେ ଅନେକ ତଥ୍ୟ ପୋଲିସର ହସ୍ତଗତ ହୋଇଥିବା ପ୍ରକାଶ।
ଜୁନ ୧୪ରେ ସୁଶାନ୍ତଙ୍କ ମୃତ୍ୟୁ ଖବର ଜଣାପଡ଼ିଥିଲା। ଉକ୍ତ ଦିନ ରାତିରେ ପୋଷ୍ଟମର୍ଟମ ରିପୋର୍ଟରେ ତାଙ୍କ ମୃତ୍ୟୁକୁ ଆତ୍ମହତ୍ୟା କୁହାଯାଇଥିଲା। ରଶି ଲଗାଇବା ପରେ ଅଣନିଶ୍ୱାସୀ ହୋଇ ତାଙ୍କ ମୃତ୍ୟୁ ଘଟିଥିବା କୁହାଗଲା। ୧୬ ଦିନ ପରେ ଆସିଥିବା ଭିସ୍ରା ରିପୋର୍ଟରେ ମଧ୍ୟ ସମାନ କଥା ଆସିଥିଲା।
ଏସବୁ ମଧ୍ୟରେ ପୋଲିସ ପ୍ରଥମେ ଦିପେଶ ସାଓ୍ବନ୍ତଙ୍କୁ ପଚରାଉଚରା କରାଯାଇଥିଲା। ପରେ ରୋଷେୟା, ଚାବି ନିର୍ମାଣ କାରୀ, କ୍ରିଏଟିଭ୍ ମ୍ୟାନେଜର ସିଦ୍ଧାର୍ଥ ପିଠାନୀଙ୍କ ବୟାନ ରେକର୍ଡ କରାଯାଇଥିଲା। ସେହିଭଳି ପରିବାରଲୋକଙ୍କୁ ପଚରାଉଚରା କରାଯାଇଥିଲା। ଯେଉଁଥିରେ ରହିଥିଲେ ସୁଶାନ୍ତଙ୍କ ବାପା, ଦୁଇ ଭଉଣୀ। ସେତେବେଳେ ୬ମାସ ଧରି ସୁଶାନ୍ତ ଡିପ୍ରେଶନରେ ଥିବା ଜଣାପଡ଼ିଥିଲା। ତାଙ୍କୁ ଚିକିତ୍ସା କରୁଥିବା ଡାକ୍ତରଙ୍କ ବୟାନ ରେକର୍ଡ କରାଯାଇଥିଲା।
ଶେଷ ଥର ପାଇଁ ସୁଶାନ୍ତ ଫୋନ୍ କରିଥିବା ବନ୍ଧୁ ମହେଶ ସେଟ୍ଟୀ,ପିଆର୍ ଟିମ୍, ବ୍ୟବସାୟର ମ୍ୟାନେଜର, ପ୍ରେମିକା କୁହାଯାଉଥିବା ରିୟା ଚକ୍ରବର୍ତ୍ତୀ, ନିର୍ଦ୍ଦେଶକ ମୁକେଶ ଛାବଡ଼ା, ରିୟାଙ୍କ ଭାଇ ସୋବିଜ୍, ବନ୍ଧୁ ସନ୍ଦିପଙ୍କୁ ପଚରାଉଚରା କରିସାରିଛି। ଆଗାମୀ ଦିନରେ ସଞ୍ଜୟ ଲୀଲା ବନ୍ଶାଲୀଙ୍କୁ ମଧ୍ୟ ପଚରାଉଚରା କରାଯିବ ବୋଲି ଜଣାପଡ଼ିଛି।