ଚଣ୍ଡିଖୋଲ,୧୦।୧(ଡି.ଏନ.ଏ.): ଯାଜପୁର ଜିଲା ବଡ଼ଚଣା ଥାନା ଅଧୀନ କୁନ୍ଦଳ ଛକରେ ଏକ ବେନାମୀ ସସ୍ କାରଖାନା ଚାଲୁଥିଲା। ଏହି ଖବର ମିଳିବା ପରେ ଶୁକ୍ରବାର ରାତିରେ ଯାଜପୁର ଏସ୍ଡିପିଓ ଚିନ୍ମୟ ନାୟକଙ୍କ ନେତୃତ୍ୱରେ ଚଢ଼ାଉ କରାଯାଇଥିଲା। ଚଢ଼ାଉ ସମୟରେ ସସ୍ ତିଆରି ହେଉଥିବା ଦ୍ରବ୍ୟର ଗୁଣବତ୍ତା ପରୀକ୍ଷା ପାଇଁ ପୋଲିସ ନମୁନା ସଂଗ୍ରହ କରିଥିଲା। ଏଥିସହିତ ଗୋଦାମକୁ ସିଲ୍ କରାଯାଇଥିଲା। ଏକ ବଡ଼ ହଲ୍ ମଧ୍ୟରେ ସସ୍ କାରଖାନା ଚାଲୁଥିଲା ବେଳେ ଏଥିରେ ବ୍ୟବହୃତ ଜିନିଷ ଅସଲି କି ନକଲି ତାହା ଜଣାପଡି ନ ଥିଲା। ସେଥିପାଇଁ ସେଠାରେ ପ୍ରସ୍ତୁତ କରୁଥିବା କମ୍ପାନୀ କର୍ତ୍ତୃପକ୍ଷଙ୍କୁ ପୋଲିସ ନୋଟିସ ଦେଇ ଛାଡ଼ିବା ସହିତ ସମ୍ପୂର୍ଣ୍ଣ କାଗଜପତ୍ର ଦାଖଲ ପାଇଁ ସମୟ ଦେଇଛି। ଖାଦ୍ୟ ନିରୀକ୍ଷକ ପ୍ରସ୍ତୁତ ହେଉଥିବା ସସ୍କୁ ପରୀକ୍ଷା କରିଛନ୍ତି କି ନାହିଁ ସେ ସମ୍ପର୍କରେ କାଗଜପତ୍ର ମାଗିଥିଲେ ମଧ୍ୟ ପ୍ରସ୍ତୁତକାରୀ କମ୍ପାନୀ କୌଣସି କାଗଜ ଦେଖାଇ ପାରି ନ ଥିଲେ। ପୋଲିସ ଗୋଦାମକୁ ସିଲ୍ କରିବା ସହ ପ୍ରସ୍ତୁତ ସସ୍ର ନମୁନା ପରୀକ୍ଷା ପାଇଁ ପଠାଇଛି। ଯଦି ଏହା ନକଲି ଜଣାପଡ଼େ ତେବେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ଏସ୍ଡିପିଓ କହିଛନ୍ତି। ଦର୍ପଣ ତହସିଲଦାର ବରଣେନ୍ଦୁ ମହାନ୍ତି, ବଡ଼ଚଣା ଥାନାଧିକାରୀ ପ୍ରିୟବ୍ରତ ରାଉତ ପ୍ରମୁଖ ଚଢ଼ାଉରେ ସାମିଲ ହୋଇଥିଲେ।