ଯାଜପୁର ଅଫିସ,୧୭।୫ : ଯାଜପୁର ଜିଲା ଯାଜପୁର ରୋଡ ଥାନା ଅନ୍ତର୍ଗତ ଦଳା ଛକ ନିକଟରେ ଥିବା ସେନ୍କୋ ଜୁଏଲେରି ଶୋ’ରୁମରୁ ସୋମବାର ହୋଇଥିବା ଡକାୟତି ଘଟଣାରେ ପୋଲିସକୁ ଏକ ବଡ଼ ସୁରାକ ମିଳିଛି। ଶୋ’ରୁମର ଗୁପ୍ତ ସ୍ଥାନରେ ଲାଗିଥିବା ସିସିଟିଭି ଫୁଟେଜ୍ରୁ ୩ ଲୁଟେରାଙ୍କ ଫଟୋ ପୋଲିସ ପକ୍ଷରୁ ଜାରି କରାଯାଇଛି। ଯଦି କୌଣସି ବ୍ୟକ୍ତି ସେମାନଙ୍କୁ ଧରାଇ ଦେବାରେ ସହଯୋଗ କରନ୍ତି, ତାଙ୍କ ନାମ ଗୋପନ ରଖାଯିବା ସହ ପୁରସ୍କାର ଦିଆଯିବ ବୋଲି ଯାଜପୁର ରୋଡ ଥାନା ପୋଲିସ ପକ୍ଷରୁ ଘୋଷଣା କରାଯାଇଛି। ତେଣୁ ୯୪୩୮୨୦୨୪୧୫ ଏବଂ ୭୭୫୦୮୨୭୦୦୮ ନମ୍ବରରେ ଯୋଗାଯୋଗ କରିବାକୁ ପୋଲିସ ପକ୍ଷରୁ ଅନୁରୋଧ କରାଯାଇଛି। ଅନ୍ୟପକ୍ଷେ, ଲୁଟେରାମାନଙ୍କୁ ଧରିବାକୁ ଜିଲାର କେତେଜଣ ବଛାବଛା ପୋଲିସ ଅଧିକାରୀଙ୍କୁ ନିୟୋଜିତ କରାଯାଇଛି। ଏସ୍ପି ବିନିତ ଅଗ୍ରୱାଲ ଉକ୍ତ ତଦନ୍ତ ଉପରେ ନଜର ରଖିଛନ୍ତି। ଲୁଟେରାମାନଙ୍କ ମଧ୍ୟରୁ ଜଣଙ୍କ ମୋବାଇଲ ମଧ୍ୟ ମିଳିଥିବା ସୂଚନା ମିଳିଛି। ଲୁଟେରାମାନଙ୍କ ବିଷୟରେ ପୋଲିସକୁ କିଛି ସନ୍ଧାନ ମିଳିଥିବା ସୂଚନା ମିଳିଛି। ଖୁବଶୀଘ୍ର ପୋଲିସ ଚଢାଉ କରିବାକୁ ଯୋଜନା ପ୍ରସ୍ତୁତ କରୁଛି।
ସୂଚନାଯୋଗ୍ୟ, ସୋମବାର ଅପରାହ୍ନ ୧ଟା ୨୫ରେ ଲୁଟେରାମାନେ ଉକ୍ତ ଜୁଏଲେରିରେ ପଶି ଲୁଟ୍ କରିଥିଲେ ା ସେମାନେ ମାତ୍ର ୪୫ ମିନିଟ୍ରେ ପ୍ରାୟ ୧୫ କୋଟି ଟଙ୍କାର ସୁନା ,ହୀରା ଅଳଙ୍କାର ଲୁଟି ନେଇଥିଲେ। ତଳେ ହିରୋ ଶୋ’ରୁମ ଥିଲେ ମଧ୍ୟ ଉପର ମହଲାରେ ଏପରି ଘଟଣା ଘଟିଥିଲା ା ହେଲେ କେହି ବାହାର ଲୋକ ଏ ସମ୍ପର୍କରେ ଆଦୌ ସୁରାକ ପାଇ ପାରି ନ ଥିଲେ। ଗତ ୧୫ ବର୍ଷରେ ବ୍ୟାସନଗର ସହରରେ ଏହି ଲୁଟ୍ ଘଟଣାକୁ ମିଶାଇ ୩ ଥର ସୁନା ଅଳଙ୍କାର ଦୋକାନରେ ଡକାୟତି ହୋଇଛି। ଷ୍ଟେଟବ୍ୟାଙ୍କ ସମ୍ମୁଖ କ୍ରିଷ୍ଣା ଜୁଏଲେରିରୁ ୨୦୦୭ ଏବଂ ୨୦୧୧ରେ ସୁନା ଅଳଙ୍କାର ଲୁଟ୍ ହୋଇଥିଲା। ସେତେବେଳେ କିଛି ସୁନା ଅଳଙ୍କାର ଜବତ ହେବା ସହ ୩ ଜଣ ଗିରଫ ହୋଇଥିଲେ। ଏହାପରେ ପୋଲିସ ପକ୍ଷରୁ ଇନ୍ଦିରାଗାନ୍ଧୀ ମହିଳା କଲେଜ ନିକଟରେ ଏକ ଫାଣ୍ଡି ପ୍ରତିଷ୍ଠା କରାଯାଇଥିଲା। କିନ୍ତୁ ଏହି ଫାଣ୍ଡି ଏବେ ପ୍ରାୟ ନିଷ୍କ୍ରିୟ ହୋଇ ପଡିଛି। ଅଧିକାଂଶ ସମୟରେ ଫାଣ୍ଡିରେ ତାଲା ଝୁଲୁଥିବା ଦେଖିବାକୁ ମିଳୁଛି। ସୋମବାର ସେନ୍କୋ ଜୁଏଲେରିରୁ ଅଳଙ୍କାର ଧରି ଲୁଟେରାମାନେ ଉକ୍ତ ଫାଣ୍ଡି ରାସ୍ତା ଦେଇ ଦ୍ରୁତଗତିରେ ପଳାଇ ଯାଇଥିବା ଶୁଣିବାକୁ ମିଳୁଛି। ତେଣୁ ମହିଳା କଲେଜ ନିକଟସ୍ଥ ଫାଣ୍ଡିକୁ କାର୍ଯ୍ୟକ୍ଷମ କରିବା ଏବଂ ମୁଣ୍ଡୋମାଳ ନିକଟରେ ଅନ୍ୟ ଏକ ନୂତନ ଫାଣ୍ଡି ପ୍ରତିଷ୍ଠା କରିବାକୁ ସାଧାରଣରେ ଦାବି ହେଉଛି।
