ବ୍ରହ୍ମପୁର ଅଫିସ,୨୫ା୨: ଭୁବନେଶ୍ୱରରେ ଫ୍ଲାଟ୍ ଦେବାକୁ ପ୍ରତିଶ୍ରୁତି ଦେଇ ଜଣେ ସୁନା ବ୍ୟବସାୟୀଙ୍କଠାରୁ ୨କୋଟି ଟଙ୍କା ଠକି ନେଇଥିବା ଅଭିଯୋଗରେ ବଡ଼ବଜାର ଥାନା ପୋଲିସ ଅଭିଯୁକ୍ତ ଡାକ୍ତର ଡି. ଉତ୍ତମ କୁମାର(୪୫)ଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ଅଭିଯୁକ୍ତ ଡାକ୍ତରଙ୍କୁ ୩ ଦିନିଆ ରିମାଣ୍ଡରେ ନେବା ପାଇଁ ପୋଲିସ ଚିଟ୍ଫଣ୍ଡ କୋର୍ଟରେ ଆବେଦନ କରିଥିଲା। ବିଚାରପତି ତନ୍ମୟ କୁମାର ମହାନ୍ତି ଆବେଦନର ଶୁଣାଣି କରି ୨ ଦିନିଆ ରିମାଣ୍ଡ ମଞ୍ଜୁର କରିଥିଲେ। ଏହି ଆଧାରରେ ପୋଲିସ ବ୍ରହ୍ମପୁର ବିଚାରାଧୀନ ବନ୍ଦୀ ଥିବା ଡା. ଉତ୍ତମ କୁମାରଙ୍କୁ ଶୁକ୍ରବାର ରିମାଣ୍ଡରେ ନେଇଛି। ରିମାଣ୍ଡ ଅବଧି ସରିବା ପରେ ରବିବାର ଅଭିଯୁକ୍ତଙ୍କୁ ହାଜର କରିବାକୁ ନିର୍ଦ୍ଦେଶ ଦେଇଛନ୍ତି। ଉକ୍ତ ଠକେଇ ଘଟଣାରେ କେଉଁମାନେ ସାମିଲ ରହିଛନ୍ତି, ସୁନା ଠକି ନେଇଥିବା ଟଙ୍କା ସେ କେଉଁ ବ୍ୟବସାୟରେ ଲଗାଇଥିଲେ, ଏହା ବ୍ୟତୀତ ସେ ଓ ତାଙ୍କ ଗ୍ୟାଙ୍ଗ କେତେ ଲୋକଙ୍କ ଟଙ୍କା ଠକିଛନ୍ତି, ସେ ନେଇ ଖୋଳତାଡ଼ କରିବ।
ପ୍ରକାଶ ଯେ, ବଡ଼ବଜାର ଥାନା ଅନ୍ତର୍ଗତ ଗୌଡ଼ସାହିର ସୁନା ବ୍ୟବସାୟୀ କେ.ସତିଶ କୁମାର ସୁବୁଦ୍ଧିଙ୍କ ଅଭିଯୋଗ ମୁତାବକ, ୨୦୧୮ରେ ସେ ଦାନ୍ତ ଡାକ୍ତର ଉତ୍ତମ କୁମାରଙ୍କ ସଂସ୍ପର୍ଶରେ ଆସିଥିଲେ। ତାଙ୍କର ୟୁଏମ୍ଏସ୍ ଡେଭ୍ଲପର୍ସ ପ୍ରାଇଭେଟ୍ ଲିମିଟେଡ୍ ନାମରେ ଏକ ସଂସ୍ଥା ଥିବା, ସେଥିରେ ଅନ୍ୟଦୁଇ ଜଣ ପାର୍ଟନର ଥିବା ଏବଂ ଉକ୍ତ ସଂସ୍ଥା ମାଧ୍ୟମରେ ଭୁବନେଶ୍ୱର ଓ ବ୍ରହ୍ମପୁରରେ ବହୁତଳ ବିଶିଷ୍ଟ ଆପାର୍ଟମେଣ୍ଟ ଗଢ଼ାଯାଇ ଗ୍ରାହକଙ୍କୁ ଯୋଗାଇ ଦିଆଯାଉଥିବା କହିଥିଲେ। ଭୁବନେଶ୍ୱରରେ ଏଭଳି ଏକ ବହୁତଳ ବିଶିଷ୍ଟ କୋଠା ନିର୍ମାଣ ଚାଲିଥିବା ବେଳେ ସେଥିରେ ହାଉସିଂ ପ୍ରୋଜେକ୍ଟ ପାଇଁ ଥିବା ସ୍କିମ୍ ମାଧ୍ୟମରେ ଗୋଟିଏ ଫ୍ଲାଟ୍ ସତିଶଙ୍କୁ ଯୋଗାଇ ଦେବେ, ଏଥିପାଇଁ ୨କୋଟି ଟଙ୍କା ସହ ନୋଟାରୀ ଆଫିଡେଭିଟ୍ ଓ ପ୍ରତିଶ୍ରୁତି ପତ୍ର ଆଦି ପାଇଁ ଅନ୍ୟ ଖର୍ଚ୍ଚ ଲାଗିବ ବୋଲି କହିଥିଲେ। ତାଙ୍କ କଥାକୁ ବିଶ୍ୱାସ କରି ସତିଶ୍ ଟଙ୍କା ଦେଇଥିଲେ। କିନ୍ତୁ ସତିଶଙ୍କୁ ସେ ଫ୍ଲାଟ ଦେବା ପରିବର୍ତ୍ତେ ପ୍ରଥମେ ବିଭିନ୍ନ ବାହାନା କରିଥିଲେ। ଟଙ୍କା ଫେରସ୍ତ ମାଗିବାରୁ ତାଙ୍କୁ ଗାଳିଗୁଲଜ କରିବା ସହ ଧମକ ଦେଇଥିଲେ। ଶେଷରେ ବ୍ୟବସାୟୀ ସତୀଶ
ଥାନାରେ ଅଭିଯୋଗ କରିଥିଲେ।