ଟେନ୍ସା,୨୩।୭(ଡି.ଏନ୍.ଏ.): ସୁନ୍ଦରଗଡ଼ ଜିଲା କୋଇଡା ବସ୍ଷ୍ଟାଣ୍ଡରୁ ଶନିବାର କୋଇଡା ପୋଲିସ ୯ଜଣ ଶିଶୁ ଶ୍ରମିକଙ୍କୁ ଉଦ୍ଧାର କରିଛି। ଉଦ୍ଧାର ପରେ ସମସ୍ତ ଶିଶୁଙ୍କୁ ଘରକୁ ପଠାଇ ଦିଆଯାଇଛି। ଘଟଣାରେ ସମ୍ପୃକ୍ତ ଅଭିଯୁକ୍ତଙ୍କ ସମ୍ପର୍କରେ କୌଣସି ସୂଚନା ମିଳିପାରି ନାହିଁ।
ଉଦ୍ଧାର ଶିଶୁ ଶ୍ରମିକ କୋଇଡା ବ୍ଲକ ପାଟମୁଣ୍ଡା ପଞ୍ଚାୟତ ଅଞ୍ଚଳର ୮ ଜଣ ହୋଇଥିବା ବେଳେ କେନ୍ଦୁଝର ଜିଲାର ଗୁଆଲି ଅଞ୍ଚଳର ଜଣେ, ଯାହାଙ୍କ ବୟସ ୧୪ରୁ ୧୭ ବର୍ଷ ମଧ୍ୟରେ ହେବ। ସେମାନଙ୍କୁ କୋଇଡା ବସଷ୍ଟାଣ୍ଡରୁ ବସ ଯୋଗେ ଭୁବନେଶ୍ୱର ନେଇ ବାହାର ରାଜ୍ୟକୁ ନିଆଯାଇଥାନ୍ତା। ଶିଶୁମାନଙ୍କୁ ପ୍ରଥମେ ବସ୍ଷ୍ଟାଣ୍ଡରେ ବୁଲୁଥିବା ଦେଖି ଲୋକେ ଏକ ସ୍ବେଚ୍ଛାସେବୀ ସଙ୍ଗଠନକୁ ଖବର ଦେଇଥିଲେ । ପରେ କୋଇଡା ପୋଲିସ ବସ୍ଷ୍ଟାଣ୍ଡରେ ପହଞ୍ଚି ପଚରାଉଚରା ପରେ ଘଟଣା ସମ୍ନାକୁ ଆସିଥିଲା । କେହି ଜଣେ ଶ୍ରମିକ ଦଲାଲ କୋଇଡା ଅଞ୍ଚଳରୁ ଶିଶୁମାନଙ୍କୁ ନେଇ ଦାଦନ ଶ୍ରମିକ ଭାବେ ବାହାର ରାଜ୍ୟକୁ ପଠାଉଥିଲା । ଏହାର ସୂଚନା କୋଇଡା ପୋଲିସ ଜାଣିବାକୁ ପାଇଥିଲା। ଘଟଣା ସ୍ଥଳରେ ସ୍ଥାନୀୟ ସିଡିପିଓ ମିନତି ମହାପାତ୍ର ପହଞ୍ଚି ଶିଶୁଙ୍କ ବିଷୟରେ ପଚରାଉଚରା କରିବା ପରେ ସ୍ଥାନୀୟ ପୋଲିସ ସହିତ ଆଲୋଚନା କରିଥିଲେ । ଉଦ୍ଧାର ୯ ଶିଶୁଙ୍କୁ କୋଇଡା ପୋଲିସ ସହାୟତାରେ ସେମାନଙ୍କ ଘରେ ଛଡ଼ାଯାଇଛି । ପୋଲିସ ତଦନ୍ତ କରି ତୁରନ୍ତ ଅଭିଯୁକ୍ତଙ୍କୁ ଧରିବାକୁ କୋଇଡାବାସୀ ଦାବି କରିଛନ୍ତି।