ବାରିପଦା ଅଫିସ,୨୪ା୨: ମୟୂରଭଞ୍ଜ ଜିଲା ବାରିପଦାସ୍ଥିତ ପିଆର୍ଏମ୍ ମେଡିକାଲରୁ ବୁଧବାର ସନ୍ଧ୍ୟାରେ ନବଜାତ ଶିଶୁକୁ ଚୋରି କରିନେବା ଘଟଣାରେ ପୋଲିସ ୨ ମହିଳାଙ୍କୁ ଗିରଫ କରିଛି। ସେମାନଙ୍କଠାରୁ ଶିଶୁକୁ ଉଦ୍ଧାର କରାଯାଇଛି। ଗିରଫ ମହିଳା ଦ୍ୱୟ ହେଲେ ବାଲେଶ୍ୱର ଜିଲା ଶୋଭାରାମପୁର ଅଞ୍ଚଳର ସୀମା ସିଂ ଓ ଚାନ୍ଦୁଆ ଥାନା ନାଗଶୋଳ ଅଞ୍ଚଳର ମୀନାକ୍ଷୀ ବେହେରା। ପୋଲିସ ଏକ ମାମଲା (ନଂ.୧୬୨/୨୧) ରୁଜୁ କରି ଅଧିକ ତଦନ୍ତ ଚଳାଇଛି। ସୂଚନା ଅନୁଯାୟୀ, ଝାରପୋଖରିଆ ଥାନା ଅଧୀନ ବାଲିଡ଼ିହି ଗ୍ରାମର ରାଇମଣି ଟୁଡୁ ୪ ଦିନ ତଳେ ଏକ ଶିଶୁକନ୍ୟାକୁ ଜନ୍ମ ଦେଇ ଡାକ୍ତରଖାନାରେ ଚିକିତ୍ସାଧୀନ ଥିଲେ। ବୁଧବାର ସନ୍ଧ୍ୟାରେ ୨ ମହିଳା ଶିଶୁ ବିଭାଗ ୱାର୍ଡରେ ପହଞ୍ଚି ଉକ୍ତ ଶିଶୁକୁ କୋଳେଇବା ବାହାନାରେ ଚତୁରତାର ସହ ଚୋରି କରି ନେଇଥିଲେ। ଏନେଇ ପରିବାର ଲୋକେ ଶିଶୁକୁ ଖୋଜାଖୋଜି କରିଥିଲେ। ହେଲେ ପାଇ ନ ଥିଲେ। ଏନେଇ ରାଇମଣିଙ୍କ ସ୍ବାମୀ ଡାକ୍ତରଖାନା ଫାଣ୍ଡିରେ ଅଭିଯୋଗ କରିଥିଲେ। ଅଭିଯୋଗ ପରେ ପୋଲିସ ଚଢ଼ାଉ କରି ଅଧଘଣ୍ଟା ମଧ୍ୟରେ ଷ୍ଟେଶନ ବଜାର ନିକଟ ବାଗଡ଼ିହା ଅଞ୍ଚଳରୁ ଶିଶୁଙ୍କୁ ଉଦ୍ଧାର କରିବା ସହ ୨ ମହିଳାଙ୍କୁ ଗିରଫ କରିଥିଲା।