ଭୁବନେଶ୍ୱର,୧୯।୧୧(ବ୍ୟୁରୋ): ରାସ୍ତା ସମ୍ପ୍ରସାରଣ ପାଇଁ ବସ୍ତି ଉଚ୍ଛେଦକୁ ବିରୋଧ କରି ସାଲିଆସାହିରେ ଶୁକ୍ରବାରଠାରୁ ଉତ୍ତେଜନା ଲାଗି ରହିଛି। ସକାଳେ ବିଡିଏ ଓ ବିଏମ୍ସିର ମିଳିତ ଟିମ୍ ୧୧ ପ୍ଲାଟୁନ ପୋଲିସ ଫୋର୍ସ ଓ ଜେସିବି ସହ ଘଟଣାସ୍ଥଳରେ ପହଞ୍ଚତ୍ଥିଲା। ଏହା ଜାଣିବା ପରେ ବସ୍ତିର ହଜାର ହଜାର ପୁରୁଷ, ମହିଳା ଓ ପିଲା ବିରୋଧ ଆରମ୍ଭ କରିଥିଲେ। ଉଚ୍ଛେଦ ବଦଳରେ ସ୍ଥାୟୀ ପଟ୍ଟା ଦିଆଯାଉ ବୋଲି ଦାବି କରି ବିକ୍ଷୋଭ ପ୍ରଦର୍ଶନ କରିଥିଲେ। ରାସ୍ତାରେ ଶୋଇ ବାଟ ଓଗାଳିବା ସହ ସ୍କ୍ବାଡ୍ ଓ ପୋଲିସ ଗାଡ଼ିକୁ ଛାଡ଼ି ନ ଥିଲେ। କେତେଜଣଙ୍କ ହାତରେ ଠେଙ୍ଗା, ବାଡ଼ି ମଧ୍ୟ ଦେଖିବାକୁ ମିଳିଥିଲା। ଫଳରେ ଦୀର୍ଘ ସମୟ ଧରି ପୋଲିସ ଓ ବସ୍ତି ବାସିନ୍ଦାଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ଲାଗି ରହିବାରୁ ଉଚ୍ଛେଦ କାର୍ଯ୍ୟ ସେପରି ଆଗେଇପାରି ନ ଥିଲା। ବରିଷ୍ଠ ପୋଲିସ ଓ ପ୍ରଶାସନିକ ଅଧିକାରୀମାନେ ବସ୍ତି ବାସିନ୍ଦାଙ୍କୁ ବୁଝାଶୁଝା କରିଥିଲେ ମଧ୍ୟ କିଛି ସୁଫଳ ମିଳି ନ ଥିଲା। ଶେଷରେ ମିଳିତ ଟିମ୍ କେବଳ ରାସ୍ତାପାର୍ଶ୍ୱର ଜଙ୍ଗଲିଆ ସ୍ଥାନକୁ ସଫା କରି ଫେରିଥିଲେ। ସାଲିଆସାହି ଦେଇ ରାସ୍ତା ନେବାକୁ ପ୍ରଶାସନ ଜିଦ୍ରେ ଥିବାବେଳେ ବସ୍ତିବାସିନ୍ଦା ନିଜ ଦାବିକୁ ନେଇ ଅଟଳ। ଶନିବାର ପୁଣି ଉଚ୍ଛେଦ ଉଦ୍ୟମ ହେଲେ ତୀବ୍ର ବିରୋଧ କରାଯିବା ସହ ଭୟଙ୍କର ପରିସ୍ଥିତି ସୃଷ୍ଟି ହେବ ବୋଲି ସାଲିଆସାହି ଆଞ୍ଚଳିକ କମିଟି ଚେତାବନୀ ଦେଇଛି।
ସିଆରପି ଛକରୁ ସାଲିଆସାହି ଦେଇ ଇନ୍ଫୋସିସ୍ ପର୍ଯ୍ୟନ୍ତ ୨୦୦ ଫୁଟିଆ ରାସ୍ତା ନିର୍ମାଣ କାର୍ଯ୍ୟ ଆରମ୍ଭ ହୋଇଛି। ୨୦୦୬ ଜଙ୍ଗଲ ଅଧିକାର ଆଇନ ଉଲ୍ଲଂଘନର ପ୍ରତିବାଦ ଓ ସାଲିଆସାହି ଦେଇ ରାସ୍ତା ଯିବାକୁ ବିରୋଧ କରୁଛନ୍ତି ଦୀର୍ଘବର୍ଷ ଧରି ରହୁଥିବା ସ୍ଥାନୀୟ ବାସିନ୍ଦା। ଜୟଦେବ ବିହାର ମୌଜା ଖାତା ନଂ. ୧୪୨୭ର ଜଙ୍ଗଲ କିସମ ଜମିରେ ଜଙ୍ଗଲ ଅଧିକାର କାର୍ଯ୍ୟକାରୀ କରିବା, ଜାଗା ମିଶନ ମାଧ୍ୟମରେ ୨୦ରୁ ୩୦ ଫୁଟର ଜମିପଟ୍ଟା ଦେବାକୁ ଦାବିକରି ସେମାନେ ବାରମ୍ବାର ଆନ୍ଦୋଳନକୁ ଓହ୍ଲାଇଛନ୍ତି। ଏଥିସହ ଏନେଇ ରାଷ୍ଟ୍ରପତି, ପ୍ରଧାନମନ୍ତ୍ରୀ, ରାଜ୍ୟପାଳ ଓ ମୁଖ୍ୟମନ୍ତ୍ରୀଙ୍କ ସମେତ ସମ୍ପୃକ୍ତ କର୍ତ୍ତୃପକ୍ଷଙ୍କୁ ବାରମ୍ବାର ଦାବିପତ୍ର ପ୍ରଦାନ କରାଯାଇଛି। ବିଏମ୍ସି କର୍ତ୍ତୃପକ୍ଷ ତାହାକୁ ଅଣଦେଖା କରି ବସ୍ତିରେ ଉତ୍ତେଜନାମୂଳକ ପରିସ୍ଥିତି ସୃଷ୍ଟି କରୁଛନ୍ତି ବୋଲି କମିଟି ସଦସ୍ୟ ସାଲ ମାରାଣ୍ଡି କହିଛନ୍ତି।
