ଡୁଙ୍ଗୁରିପାଲି,୧୨ା୮(ଦୀନବନ୍ଧୁ ସୁନା): ସୁବର୍ଣ୍ଣପୁର ଜିଲା ଡୁଙ୍ଗୁରିପାଲି ଏଫସିଆଇ ଗେଟ ସମ୍ମୁଖରେ ଥିବା ଏକ ଦୋକାନରେ ସ୍ଥାନୀୟ ପୋଲିସ ଶୁକ୍ରବାର ଚଢାଉ କରି ୩୩ କୁଇଣ୍ଟାଲ ୪୫ କେଜି ଚାଉଳ ଜବତ କରିଛି। ଜବତ ଚାଉଳର ଆନୁମାନିକ ମୂଲ୍ୟ ୧ ଲକ୍ଷରୁ ଊର୍ଦ୍ଧ୍ୱ ହେବ ବୋଲି କୁହାଯାଉଛି। ମିଳିଥିବା ସୂଚନା ଅନୁଯାୟୀ, ପୂର୍ବାହ୍ନ ପ୍ରାୟ ୧୦ଟାରେ ଡୁଙ୍ଗୁରିପାଲି ଥାନା ଅଧିକାରୀ ସତ୍ୟନାରାୟଣ ପଧାନ ଓ ତାଙ୍କ ଟିମ୍ କୌଣସି ସୂତ୍ରରୁ ଖବର ପାଇ ଡୁଙ୍ଗୁରିପାଲି ୨୬ ନମ୍ବର ଜାତୀୟ ରାଜପଥ ଏଫସିଆଇ ଗେଟ ସମ୍ମୁଖ ଦୋକାନରେ ଚଢାଉ କରିଥିଲେ। ଦୋକାନ ଭିତରୁ ବେଆଇନ ଭାବେ ଗଚ୍ଛିତ ଥିବା ଚାଉଳ ପୋଲିସ ଜବତ କରି ବ୍ଲକ ଯୋଗାଣ ନିରୀକ୍ଷକ ସୁବ୍ରତ ପାଣିଙ୍କୁ ଖବର ଦେଇଥିଲା। ଯୋଗାଣ ନିରୀକ୍ଷକ ପାଣି ଘଟଣାସ୍ଥଳରେ ପହଞ୍ଚତ୍ ଯାଞ୍ଚ କରିଥିଲେ। ବର୍ତ୍ତମାନ ଡୁଙ୍ଗୁରିପାଲି ବ୍ଲକର ପ୍ରତି ପଞ୍ଚାୟତରେ ରାଶନ କାର୍ଡ ହିତାଧିକାରୀମାନଙ୍କୁ ଭିଟାମିନଯୁକ୍ତ ଚାଉଳ ସରକାରଙ୍କ ତରଫରୁ ବଣ୍ଟନ କରାଯାଉଛି। କିନ୍ତୁ ଜବତ ଚାଉଳ ପଞ୍ଚାୟତରେ ରାଶନକାର୍ଡଧାରୀଙ୍କୁ ଦିଆଯାଉଥିବା ଭିଟାମିନ ଯୁକ୍ତ ଚାଉଳ ନୁହେଁ ବୋଲି ବ୍ଲକ ଯୋଗାଣ ନିରୀକ୍ଷକ ପାଣି କହିଥିବା ଥାନା ଅଧିକାରୀ ପ୍ରକାଶ କରିଛନ୍ତି। ତେବେ ଏତେ ପରିମାଣର ଚାଉଳ ଦେକାନକୁ ଆସିଲା କେମିତି ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଚାଉଳ ଓ କିଛି ଖାଲି ଥିବା ବସ୍ତା ପୋଲିସ ଜବତ କରି ଥାନାରେ ରଖିଛି। ଦୋକାନର ମାଲିକ ରଞ୍ଜନ ସ୍ବାଇଁଙ୍କୁ ପୋଲିସ ଥାନାରେ ଅଟକ ରଖି ପଚରାଉଚରା କରୁଛି। ତାଙ୍କ ନାମରେ ନଂ୧୩୫/୨୩ ରେ ଏକ ମାମଲା ରୁଜୁ କରି ତଦନ୍ତ ଜାରି ରଖିଥିବା ଥାନା ଅଧିକାରୀ ପ୍ରଧାନ ପ୍ରକାଶ କରିଛନ୍ତି।