ଇସଲାମାବାଦ୍, ୨୩।୪ : ପାକିସ୍ତାନ ପ୍ରଧାନମନ୍ତ୍ରୀ ଶାହାବାଜ ସରିଫ ଶନିବାର କହିଛନ୍ତି ଯେ ୧୫ ମାସ ପରେ ଦେଶରେ ପୋଲିଓ ପୁଣି ଚିହ୍ନଟ ହୋଇଛି। ଏନେଇ ଶୀଘ୍ର ପୋଲିଓ ବିଲୋପ ପାଇଁ ନ୍ୟାଶନାଲ ଟାସ୍କ ଫୋର୍ସ ସହିତ ଏକ ଜରୁରୀ ବୈଠକ ଅନୁଷ୍ଠିତ ହେବ ବୋଲି ସେ କହିଛନ୍ତି। ଉତ୍ତର ୱାଜିରିସ୍ତାନର ୧୫ ମାସର ଜଣେ ଶିଶୁଙ୍କଠାରେ ପୋଲି ଭାଇରସ ଚିହ୍ନଟ ହୋଇଛି।
ଜାନୁଆରୀ ୨୦୨୧ରେ ପାକିସ୍ତାନରେ ଶେଷ ପୋଲିଓ ମାମଲା ରିପୋର୍ଟ ହୋଇଥିଲା। ପାକିସ୍ତାନର ନୂତନ ପ୍ରଧାନମନ୍ତ୍ରୀ ଶାହବାଜ ସରିଫ ଟୁଇଟ୍ କରି କହିଛନ୍ତି, ଦେଶରେ ପୋଲିଓ ପୁଣି ଫେରିଥିବା ନେଇ ସେ ଚିନ୍ତିତ। ପୋଲିଓ ବିଲୋପ ଏକ ପ୍ରମୁଖ ସଫଳତା ଯାହା ସ୍ଥାୟୀ ଉଦ୍ୟମ ଦ୍ୱାରା ସମ୍ଭବ ହୋଇପାରିଥିଲା। ଇସଲାମାବାଦ ସ୍ଥିତ ନ୍ୟାଶନାଲ ଇନଷ୍ଟିଚୂ୍ୟଟ ଅଫ ହେଲଥ ପକ୍ଷରୁ ସୂଚନା ପ୍ରଦାନ କରାଯାଇଛି ଯେ ଶୁକ୍ରବାର ପାକିସ୍ତାନର ଉତ୍ତର ୱାଜିରିସ୍ତାନରେ ଜଣେ ୧୫ ମାସର ଶିଶୁପୁତ୍ରଙ୍କଠାରେ ଟାଇପ -୧ ୱାଇଲ୍ଡ ପୋଲିଓଭାଇରସ ମାମଲା ଚିହ୍ନଟ ହୋଇଛି।
ପାକିସ୍ତାନର ପୋଲିଓ ବିଲୋପ କାର୍ଯ୍ୟକ୍ରମର ଜାତୀୟ ଜରୁରୀକାଳୀନ ଅପରେଶନ ସେଣ୍ଟରର ସଂଯୋଜକ ଶାହାଜାଦ ବାଗ ଶୁକ୍ରବାର ସାରେ ଟୁଇଟ କରି କହିଛନ୍ତି ଯେ ଉତ୍ତର ୱାଜିରିସ୍ତାନରେ ଜଣେ ଶିଶୁ ଏଥିରେ ସଂକ୍ରମିତ ଖବର ପାଇ ଅତ୍ୟନ୍ତ ଦୁଃଖିତ।
ନ୍ୟୁଜ ଏଜେନ୍ସି ଏଏନ୍ଆଇ ଅନୁଯାୟୀ ପାକିସ୍ତାନର ସ୍ବାସ୍ଥ୍ୟ ସଚିବ ଆମୀର ଅସରଫ ଶନିବାର କହିଛନ୍ତି ଯେ ଏହି ମାମଲା ଶିଶୁ ତଥା ତାଙ୍କ ପରିବାର ପାଇଁ ଏକ ଦୁଃଖଦ ଘଟଣା ଏବଂ ଏହା ପାକିସ୍ତାନ ପାଇଁ ଅତ୍ୟନ୍ତ ଦୁର୍ଭାଗ୍ୟଜନକ ତଥା ସାରା ବିଶ୍ୱରେ ପୋଲିଓ ବିଲୋପ ପାଇଁ ଜାରି ରହିଥିବା ଉଦ୍ୟମ କ୍ଷେତ୍ରରେ ଚିନ୍ତା ସୃଷ୍ଟି କରିଛି।