ରାଜକନିକା,୧୭ା୪ (ଡି.ଏନ୍.ଏ.): ମୁଣ୍ଡ ଗୁଞ୍ଜିବାକୁ ଘରଖଣ୍ଡେ ନାହିଁ କି ଚାଷ କରି ଚଳିବାକୁ ଜମି ଗୁଣ୍ଠେ ନାହିଁ। ସେପଟେ ସ୍ବାମୀ ମୂଲପାତି ଲାଗି ଆମକୁ ଦି’ଓଳି ଦି’ମୁଠା ଖାଇବାକୁ ଦେବାକୁ ସାମର୍ଥ୍ୟ ବି ନାହିଁ। ସଂସାର ମଧ୍ୟରେ ସତେଯେମିତି ଭଗବାନ ଆମ ପାଇଁ ନିଷ୍ଠୁର ପାଲଟି ଯାଇଛନ୍ତି। ଏଭଳି ଦେଖିବାକୁ ମିଳିଛି ରାଜକନିକା ବ୍ଲକ କାଟଣା ବଣିଆଁ ପଞ୍ଚାୟତ ପତରପୁର ନିକଟ ପଦମପୁର ଗାଁରେ। ତ୍ରିଲୋଚନ ସାହୁ (୫୫)ଙ୍କ ନିଜର ଘରଡିହ କି ଜମିବାଡ଼ି କିଛି ନାହିଁ। ବିଦେଶରେ ରହି ଏକ ଘରୋଇ କମ୍ପାନୀରେ କାମ କରୁଥିଲେ। ହଠାତ ତାଙ୍କ ସ୍ତ୍ରୀ ଅଜଣା ରୋଗରେ ଆକ୍ରାନ୍ତ ହୋଇ ଆରପାରିକୁ ଚାଲିଗଲେ। ସଂସାରକୁ ଆଗକୁ ନେବାକୁ ଝରଣାଙ୍କୁ ଦ୍ୱିତୀୟ ବିବାହ କରିଥିଲେ। ମୂଲ ଲାଗି ତ୍ରିଲୋଚନଙ୍କ ସଂସାର ଚାଲି ଥିଲା। ଏଥି ମଧ୍ୟରେ ଏକ କନ୍ୟା ସନ୍ତାନ ଜନ୍ମ ହୋଇଥିଲା। ହେଲେ ଜନ୍ମରୁ ଝିଅ ପୋଲିଓ ଆକ୍ରାନ୍ତ ଥିବାରୁ ହାତ ଗୋଡ଼ ଅଚଳ। ଏଭଳି ପରିସ୍ଥିତିରେ ଦିବ୍ୟାଙ୍ଗ ଝିଅକୁ ଧରି କାଟଣା ବଜାରର ଏକ ଭଡ଼ା ଘରେ ରହି ଆସୁଥିଲେ। ହେଲେ ଦଇବ ଦାଉ ସାଧିଲା, ତ୍ରିଲୋଚନ ସପ୍ତାହ ତଳେ ପକ୍ଷାଘାତ ରୋଗରେ ଶିକାର ହୋଇ ଶଯ୍ୟାଶାୟୀ ହୋଇଗଲେ। ଝିଅର ଦୁଃଖଠାରୁ ବଳିଗଲା ସ୍ବାମୀଙ୍କ ଦୁଃଖ। ଘରେ ଖାଇବାକୁ କିଛି ନାହିଁ କି ଡାକ୍ତରଖାନା ନେବାକୁ ପଇସାଟିଏ ବି ପାଖରେ ନାହିଁ ବୋଲି ଝରଣା କହିଛନ୍ତି। ଶଯ୍ୟାଶାୟୀ ୨ ଜଣଙ୍କୁ ଟେକା ଉଠା କରିବାକୁ ଦେହରେ ଆଉ ବଳ ବି ନାହିଁ। କେବଳ ଝିଅକୁ ବିକଳାଙ୍ଗ ଭତ୍ତା ୭ଶହ ଟଙ୍କା ହିଁ ଆମ ଭରସା ବୋଲି ଝରଣା କହିଛନ୍ତି। ଝରଣା ଦୁଃଖର ସଂସାରକୁ ଆଗକୁ କିଭଳି ନେବେ, କେମିତି ଦିନକୁ ଦି’ଓଳି ଖାଇବେ ଓ ସଂସାର ଚଳିବ ସେହି ଚିନ୍ତା ଏବେ ଘାରିଛି। ପାଖରେ ବି ତାଙ୍କ ଲୋକବଳ ନାହାନ୍ତି। ଏପରିସ୍ଥଳେ ପରିବାରକୁ ବଞ୍ଚାଇ ଦିଅ ବୋଲି ସରକାରଙ୍କୁ ଝରଣା ଆକୁଳ ନିବେଦନ କରିଛନ୍ତି। ଏତଦ୍ ବ୍ୟତୀତ ସ୍ବେଚ୍ଛାସେବୀ ଓ ବଦାନ୍ୟ ବ୍ୟକ୍ତି ଯଦି ସାହାଯ୍ୟ କରନ୍ତେ ତେବେ ସ୍ବାମୀଙ୍କ ଚିକିତ୍ସା ସହ ଝିଅର ମୁହଁରେ ଦାନା ଗଣ୍ଡେ ଦେଇପାରନ୍ତେ ବୋଲି ସେ କହିଛନ୍ତି।