ଜେନେଭା, ୨୩।୬ : ଲଣ୍ଡନର ଏକ ସିଓ୍ବେଜ ନମୁନାରେ ପୋଲିଓ ଭାଇରସ ଚିହ୍ନଟ ହୋଇଛି। ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲୁଏଚଓ) ଏବଂ ବ୍ରିଟିଶ ସ୍ବାସ୍ଥ୍ୟ ଅଧିକାରୀମାନେ ଏହି ସୂଚନା ଦେଇଛନ୍ତି। ଏଥିସହ ଏହି ଘଟଣାର ତଦନ୍ତ ଜାରି ରହିଛି ବୋଲି ସ୍ବାସ୍ଥ୍ୟ ଅଧିକାରୀମାନେ କହିଛନ୍ତି। ଏନେଇ ଡବ୍ଲୁଏଚଓ ପକ୍ଷରୁ ବ୍ରିଟେନରେ ଏକ ସତର୍କ ସୂଚନା ଜାରି କରାଯାଇଛି।
ପ୍ରାୟ ଦୁଇ ଦଶନ୍ଧି ପୂର୍ବରୁ ବ୍ରିଟେନରୁ ପୋଲିଓ ଦୂର ହୋଇଯାଇଥିଲା। ସେବେଠାରୁ ପୋଲିଓର କୌଣସି ଗୋଟିଏ ମାମଲା ରୁଜୁ ହୋଇନାହିଁ। ଡବ୍ଲୁଏଚଓ ଏକ ବିବୃତ୍ତିରେ କହିଛି ଯେ ବ୍ରିଟେନର ରାଜଧାନୀ ଲଣ୍ଡନରେ ସିଓ୍ବେଜ ନମୁନାରେ ୍ପୋଲିଓ ଭାଇରସ ଟାଇପ-୨ର ସନ୍ଧାନ ମିଳିଛି। ଦ ନ୍ୟୁ ଇଣ୍ଡିଆନ ଏକ୍ସପ୍ରେସ୍ ରିପୋର୍ଟ ଅନୁଯାୟୀ, ଡବ୍ଲୁଏଚଓ ଏକ ବିବୃତ୍ତି ଜାରି କରି କହିଛି ଯେ ଏଥିପ୍ରତି ଧ୍ୟାନ ଦେବା ଜରୁରୀ।
୧୯୮୮ଠାରୁ ୧୨୫ ଟି ଦେଶରେ ପୋଲିଓ ସଂକ୍ରମଣ ହୋଇଥିଲା ଏବଂ ସାରା ବିଶ୍ୱରେ ୩୫୦,୦୦୦ ମାମଲା ଚିହ୍ନଟ ହୋଇଥିଲା। ତେବେ ମାମଲାରେ ୯୯ ପ୍ରତିଶତ ହ୍ରାସ ପାଇଛି। ପୋଲିଓ ଭାଇରସର ବିପଜ୍ଜନକ ନମୁନା ବର୍ତ୍ତମାନ କେବଳ ଆଫଗାନିସ୍ତାନ ଏବଂ ପାକିସ୍ଥାନରେ ବିଦ୍ୟମାନ ଅଛି। ୨୦୦୩ରେ, ବ୍ରିଟେନକୁ ପୋଲିଓ ମୁକ୍ତ ଦେଶ ଘୋଷିତ କରାଯାଇଥିଲା। ସେବେଠାରୁ ଏଠାରେ କୌଣସି ନୂଆ ମାମଲା ଆସିନାହିଁ।
ତେବେ ପୋଲିଓ ସମେତ ଅନ୍ୟାନ୍ୟ ବିପଜ୍ଜନକ ରୋଗ ଉପରେ ଦୀର୍ଘ ସମୟ ଧରି ନଜର ରଖାଯାଉଛି। ବ୍ରିଟେନ ସ୍ବାସ୍ଥ୍ୟ ସୁରକ୍ଷା ଏଜେନ୍ସି ଫେବୃଆରୀ ଏବଂ ମେ ମାସରେ ସମାନ କ୍ରମରେ ଜଳ ନିଷ୍କାସନର ନମୁନା ନେଇଥିଲେ। ସେଥି ମଧ୍ୟରୁ ଏହି ଭୂତାଣୁ ଚିହ୍ନଟ ହୋଇଛି। ଡବ୍ଲୁଏଚଓ କହିଛି ଯେ ଲଣ୍ଡନରେ ପୋଲିଓ ଟିକାକରଣ କଭରେଜ ପ୍ରାୟ ୮୭ ପ୍ରତିଶତ ରହିଛି। ଏବେ ଦେଶରେ ସତର୍କ ସୂଚନା ଜାରି କରାଯାଇଛି।