କଟକ,୮ା୪(ଶିଳ୍ପା ପ୍ରିୟଦର୍ଶିନୀ):କଟକରେ ରାଜନୈତିକ ପାଣିପାଗ ଉଷ୍ମ ହେବାରେ ଲାଗିଛି। ବାରବାଟୀ-କଟକ ପାଇଁ ବିଜେଡି ପକ୍ଷରୁ ୨ ଦିନ ତଳେ ପ୍ରକାଶ ବେହେରାଙ୍କ ନାମ ଘୋଷଣା କରାଯାଇଛି। ହେଲେ ଏପର୍ଯ୍ୟନ୍ତ ଭାଜପା ଓ କଂଗ୍ରେସ ପକ୍ଷରୁ ପ୍ରାର୍ଥୀଙ୍କ ନାମ ଘୋଷଣା କରାଯାଇନାହିଁ। ବିଜେଡି ପ୍ରଥମେ କଟକ ଲୋକ ସଭା ପ୍ରାର୍ଥୀ ଭାବେ ସନ୍ତୃପ୍ତ ମିଶ୍ରଙ୍କ ନାମ ଘୋଷଣା କରିଥିଲା। ଏହାର ଗୋଟିଏ ଦିନ ପରେ ଭାଜପା କଟକ ଲୋକ ସଭା ପ୍ରାର୍ଥୀ ଭାବେ ଭର୍ତ୍ତୃହରି ମହତାବଙ୍କ ନାମ ଘୋଷଣା କରିଥିଲା। ହେଲେ କଂଗ୍ରେସ କାହାକୁ ଲୋକ ସଭା ପ୍ରାର୍ଥୀ କରିବ ସେ ସମ୍ପର୍କରେ ସ୍ପଷ୍ଟ ହୋଇନାହିଁ।
କଟକ ଜିଲାର ୯ଟି ନିର୍ବାଚନ ମଣ୍ଡଳୀ ମଧ୍ୟରୁ ୭ଟି(କଟକ-ସଦର, ଚୌଦ୍ୱାର-କଟକ, ବାଙ୍କୀ, ଆଠଗଡ, ନିଆଳି, ବଡମ୍ବା ଓ ମାହାଙ୍ଗା)ରେ ଭାଜପା ପକ୍ଷରୁ ପ୍ରାର୍ଥୀଙ୍କ ନାମ ଘୋଷଣା କରାଯାଇଥିଲା। ଠିକ୍ ଏହାର ପରଦିନ ବିଜେଡି ପକ୍ଷରୁ ସାଲେପୁର ଓ ବାରବାଟୀ-କଟକ ପାଇଁ ପ୍ରାର୍ଥୀଙ୍କ ନାମ ଘୋଷଣା କରାଯାଇଛି। ହେଲେ ଏପର୍ଯ୍ୟନ୍ତ ବାରବାଟୀ-କଟକ ପାଇଁ ଭାଜପା କାହିଁକି ପ୍ରାର୍ଥୀଙ୍କ ନାମ ଘୋଷଣା କରୁନାହିଁ ତାହାକୁ ନେଇ ଲୋକେ ତର୍ଜମା କରୁଛନ୍ତି। ଅପରପକ୍ଷରେ ନାମ ଘୋଷଣା ପରେ ଦୁଇଦିନ ହେବ ପ୍ରକାଶ ବେହେରା ଦଳର ନେତୃବୃନ୍ଦଙ୍କୁ ଭେଟି ନିର୍ବାଚନ ସମ୍ପର୍କରେ ଆଲୋଚନା ଚଳାଇଛନ୍ତି। ପୂର୍ବରୁ ଭାଜପାରେ ଥିବା ପ୍ରକାଶଙ୍କୁ ବିଜେଡି ଆମଦାନୀ କରି ବାରବାଟୀ-କଟକରେ ଲଢ଼ିବା ପାଇଁ ପ୍ରସ୍ତୁତ କରୁଥିବାବେଳେ ଏହି ପ୍ରକ୍ରିୟାକୁ ଭାଜପା ଆପଣାଇପାରେ ବୋଲି ସାଧାରଣରେ ଚର୍ଚ୍ଚା ହେଉଛି। ଏନେଇ ଭାଜପା କଟକ ନଗର ସଭାପତି ଲଲାଟେନ୍ଦୁ ବଡୁ କହିଛନ୍ତି, ବାରବାଟୀ-କଟକ ପାଇଁ ନେତା କିପରି ହେବ ସେ ସମ୍ପର୍କରେ ଭୋଟର ନିଷ୍ପତ୍ତି ନିଅନ୍ତି। ବିଜେଡିର କୌଣସି ଧାରାକୁ ଭାଜପା ଆପଣାଇ ନାହିଁ। ଖୁବ୍ଶୀଘ୍ର ବାବରାଟୀ-କଟକ ପାଇଁ ପ୍ରାର୍ଥୀଙ୍କ ନାମ ଘୋଷଣା କରାଯିବ। ଭାଜପା କୌଣସି ମତେ ନେତାଙ୍କୁ ଆମଦାନୀ କରି ବାରବାଟୀ-କଟକରେ ଲଢିବାକୁ ଦେବନାହିଁ। ଖୋଦ୍ କଟକିଆ ନେତାଙ୍କୁ ଭାଜପା ଏଠାରେ ପ୍ରାର୍ଥୀ କରିବ। ପୂର୍ବରୁ ଯିଏ ଭୋଟରଙ୍କ ନିକଟତର ହୋଇରହିଛନ୍ତି।
ସୂଚନାନୁଯାୟୀ, ବାରବାଟୀ-କଟକ ଭାଜପାର ବିଧାନସଭା ଟିକେଟକୁ ନେଇ ଦ୍ୱନ୍ଦ୍ୱ ଲାଗିରହିଛି। ଭାଜପାରେ ପୂର୍ବରୁ ଆଶାୟୀଙ୍କ ଲମ୍ବା ତାଲିକା ରହିଥିବାବେଳେ ଦଳରେ ନୂଆ କରି ଅରିନ୍ଦମ ରାଏ ଓ ଅନୁଭବ ମହାନ୍ତି ଯୋଗଦେଇଛନ୍ତି। ଅରିନ୍ଦମଙ୍କୁ ପ୍ରଚାରରେ ଅନ୍ୟ ସ୍ଥାନରେ ଦେଖିବାକୁ ମିଳିଥିବାବେଳେ ଦଳରେ ଯୋଗଦେବା ପରେ ଗାଏବ ହୋଇ ଯାଇଛନ୍ତି ଅନୁଭବ। ଅପରପକ୍ଷରେ କଂଗ୍ରେସ ବରିଷ୍ଠ ନେତା ଇଂ. ମହମ୍ମଦ ମୋକିମ ତୃଣମୂଳସ୍ତରରେ ଲୋକଙ୍କ ସହିତ ଯୋଡି ହୋଇ କାମ କରୁଛନ୍ତି। ତେଣୁ କଂଗ୍ରେସ ପକ୍ଷରୁ ତାଙ୍କୁ ଟିକେଟ୍ ମିଳିବା ନେଇ ଚର୍ଚ୍ଚା ହେଉଛି।
