ନୂଆଦିଲ୍ଲୀ,୧୮ ।୪: ରାଜନୀତିର ଚାଣକ୍ୟ ଭାବେ ପରିଚିତ ପ୍ରଶାନ୍ତ କିଶୋର ତାଙ୍କ ରାଜନୈତିକ ଯାତ୍ରା ମେ’ ପ୍ରଥମ ସପ୍ତାହରୁ ଆରମ୍ଭ କରିପାରନ୍ତି ବୋଲି ଅନୁମାନ କରାଯାଉଛି । ସେ କଂଗ୍ରେସରେ କେବେ ଓ କେମିତି ସାମିଲ ହେବେ ସେ ନିଷ୍ପତ୍ତି ସେ ସୋନିଆ ଗାନ୍ଧୀଙ୍କ ଉପରେ ଛାଡି ଦେଇଛନ୍ତି । ହେଲେ ଗୋଟିଏ କଥା କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀ, ପୂର୍ବତନ ଅଧ୍ୟକ୍ଷ ରାହୁଲ ଗାନ୍ଧୀ ଓ ମହାସଚିବ ପ୍ରିୟଙ୍କା ଗାନ୍ଧୀଙ୍କ ସମେତ ସମସ୍ତ ମୁଖ୍ୟ ନେତାଙ୍କ ସହ ହୋଇଥିବା ବୈଠକରେ ପିକେ ସ୍ପଷ୍ଟ କରିଛନ୍ତି କି ତାଙ୍କୁ ଦଳର କୌଣସି ପଦ ଦରକାର ନାହିଁ । ଏହାସହ ତାଙ୍କର କୌଣସି ସର୍ତ୍ତ ବି ରହିବ ନାହିଁ । ହେଲେ କଂଗ୍ରେସକୁ ୨୦୨୪ ଲୋକ ସଭା ନିର୍ବାଚନରେ ଭାରତୀୟ ଜନତା ପାର୍ଟି(ଭାଜପା) ବିପକ୍ଷରେ ମଜଭୁତ କରି ଲଢେଇ କରିବାକୁ ପ୍ରସ୍ତୁତ ହେବା ଲାଗି ଯେଉଁ ଯୋଜନା ସେ କରିଛନ୍ତି ସେଥିରେ କୌଣସି ସାଲିସ ସେ କରିବେ ନାହିଁ । ଏହାକୁ ନେଇ ଏବେ ସୋନିଆ ଅନ୍ତିମ ନିଷ୍ପତ୍ତି ନେବେ କି ରିଭାଇଭାଲ କଂଗ୍ରେସକୁ ପିକେଙ୍କ ପ୍ଲାନ ଲାଗୁ କରିବାକୁ ପାର୍ଟି କେଉଁ ପର୍ଯ୍ୟନ୍ତ ଯାଇପାରେ । ସୂଚନାଯୋଗ୍ୟ, ଶନିବାର ସୋନିଆ ଗାନ୍ଧୀଙ୍କ ୧୦ ଜନପଥରେ ଥିବା ଘରେ ସୋନିଆ, ରାହୁଲ, ପ୍ରିୟଙ୍କାଙ୍କ ସହ କଂଗ୍ରେସର ପ୍ରାୟ ୧୫ ଶୀର୍ଷ ନେତାଙ୍କ ସହ ପିକେଙ୍କର ଲମ୍ବା ୪ ଘଣ୍ଟାର ବୈଠକରେ ଦଳ ଭାଜପା ବିପକ୍ଷରେ ଲଢିବାକୁ ପ୍ରଶାନ୍ତଙ୍କ ଯୋଜନା ଉପରେ ଆଲୋଚନା ହୋଇଥିଲା ।