ଭଣ୍ଡାରିପୋଖରୀ, ୨୯।୧୨ (ରବିନାରାୟଣ ଖିଲାର): ରାଜନୀତିକୁ ବ୍ୟବସାୟୀକରଣ କରାଯାଉଛି। ସରକାରୀ ଅର୍ଥକୁ ବିପୁଳ ଭାବେ ଅପବ୍ୟୟ କରାଯାଉଛି। ଆଜିର ଦିନରେ ରାଜ୍ୟରେ ସାମାଜିକ, ଗଣତାନ୍ତ୍ରିକ, ଅର୍ଥନୈତିକ, ନ୍ୟାୟର ସୁରକ୍ଷା ପାଇଁ କଂଗ୍ରେସ ସବୁବେଳେ ଲଢ଼େଇ ଜାରି ରଖିଛି। ଭଣ୍ଡାରିପୋଖରୀର ଦୁଃଖ କଣ୍ଟିଘାଇ ହୋଇଥିବା ବେଳେ ବୈତରଣୀର ନଦୀବନ୍ଧକୁ ଭଦ୍ରକ ଜିଲା ପାର୍ଶ୍ୱରେ ସୁଦୃଢ଼ କରା ନ ଯାଇ ଅପରପାର୍ଶ୍ୱକୁ ଉଚ୍ଚ କରିବା ସହ କଂକ୍ରିଟ ଢଳେଇ ଦିଆଯାଇ ସୁଦୃଢ କରାଯାଉଛି। ଫଳରେ ବୈତରଣୀରେ ବନ୍ୟା ଆସିଲେ ଭଣ୍ଡାରିପୋଖରୀ, ଧାମନଗର, ଚାନ୍ଦବାଲି ଓ ତିହିଡ଼ି ଅଞ୍ଚଳର ଜନସାଧାରଣ କ୍ଷତି ସହୁଛନ୍ତି। ନଦୀର ଉଭୟ ପାର୍ଶ୍ୱ ନଦୀବନ୍ଧକୁ ସମାନ ଭାବେ ସୁଦୃଢ଼ କରିବା ଆବଶ୍ୟକ ବୋଲି ପୂର୍ବତନ ପିସିସି ସଭାପତି ନିରଞ୍ଜନ ପଟ୍ଟନାୟକ ଶୁକ୍ରବାର ଭଣ୍ଡାରିପୋଖରୀ ନିକଟସ୍ଥ ରାଜୀବ ଭବନଠାରେ ଏକ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି। କଂଗ୍ରେସ ନେତା ସୁବ୍ରତ ଦାସ, ମହିଳା ଜିଲା କଂଗ୍ରେସ ସଭାନେତ୍ରୀ ସବିତା ଚାନ୍ଦ, ପ୍ରାକ୍ତନ ବ୍ଲକ ଅଧ୍ୟକ୍ଷ ପୀତାମ୍ବର ନାୟକ, ବ୍ଲକ ସଭାପତି ରଜନୀକାନ୍ତ ଚାନ୍ଦ, ଗୋଲକ ଚନ୍ଦ୍ର ବେହେରା, ଅଜୟ ସାହୁ, ରମେଶ ଭାରତୀ, ସୁବୋଧ ସାମଲ, ପବିତ୍ର ପାଣିଗ୍ରାହୀ, ବାପୁନ ମହାପାତ୍ର, ଶ୍ୟାମସୁନ୍ଦର ମହାପାତ୍ର, ବସନ୍ତ ରାଉତ ପ୍ରମୁଖ ଖବରଦାତା ସମ୍ମିଳନୀରେ ଉପସ୍ଥିତ ଥିଲେ।
