ଗଞ୍ଜାମ,୧୩।୭(ଡି.ଏନ୍.ଏ.): ଗଞ୍ଜାମ ତହସିଲଦାରଙ୍କ ଅଶାଳୀନ ବ୍ୟବହାର ଓ କାର୍ଯ୍ୟଶୈଳୀକୁ ନେଇ ଗଞ୍ଜାମ ସହରରେ ରାଜନୀତି ଜୋର ଧରିଛି। ତହସିଲଦାର ହଟାଓ ଏବେ ଭିନ୍ନ ମୋଡ଼ରେ ଥିବା ପରିଲିକ୍ଷିତ ହେଉଛି। ସହରର ଗୋଟିଏ ପକ୍ଷ ତହସିଲଦାରଙ୍କ କାର୍ଯ୍ୟକଳାପ ଭଲ ନୁହେଁ କହି ବଜ଼ାର ବନ୍ଦ କରି ବ୍ଲକ ସମ୍ମୁଖରେ ଧରଣା ଦେଇଥିବା ବେଳେ ଆଉ ଗୋଟେ ଗୋଷ୍ଠୀ ତହସିଲଦାର ଆସିବା ଦିନଠାରୁ ଗଞ୍ଜାମରେ ଉନ୍ନତି ମୂଳକ କାର୍ଯ୍ୟକ୍ରମ ହୋଇଛି ବୋଲି ଯୁକ୍ତି ବାଢ଼ିଛନ୍ତି। ଗ୍ରାମକଣ୍ଟକ ଘରପଟ୍ଟା ବଣ୍ଟନ, ପୋତାଗଡ଼ ଉନ୍ନତି କାର୍ଯ୍ୟ, ରାଜସ୍ବ ଆଦାୟ ନେଇ ତାଙ୍କ ସପକ୍ଷରେ ଅନ୍ୟ ଏକ ଗୋଷ୍ଠୀ ବାଇକ ଧରି ନିରବ ଭାବେ ରାଲି କରୁଥିବାର ଦେଖିବାକୁ ମିଳିଛି। ଅନ୍ୟପଟେ ଗଞ୍ଜାମ ବନ୍ଦ ଡାକରାକୁ ସମର୍ଥନ କରି ନ ଥିବା ସାନ ବଜାର ବଣିକ ସଂଘ ପକ୍ଷରୁ ପ୍ରାୟ ଅଧିକାଂଶ ଦୋକାନ ଖୋଲାଯାଇଛି। ସାନବଜ଼ାର ବଣିକ ସଙ୍ଘ ବ୍ୟକ୍ତିଗତ ସ୍ବାର୍ଥ ପାଇଁ ବଜ଼ାର ବନ୍ଦ ହେବନି କହି ଏହି ବନ୍ଦ ପାଳନକୁ ସମର୍ଥନ କରିନାହିଁ। ଗୋଟିଏ ଗୋଷ୍ଠୀ ତହସିଲଦାର ବଦଳାଓ ଗଞ୍ଜାମ ବଞ୍ଚାଓ ଅଭିଯାନ କରୁଥିବା ବେଳେ ଅନ୍ୟ ଏକ ଗୋଷ୍ଠୀ ସହରରୁ ଦଲାଲ ହଟାଓ, ଗଞ୍ଜାମ ବଞ୍ଚାଓ ଅଭିଯାନ ଆରମ୍ଭ କରିଛି। ସୂଚନା ମୁତାବକ, ସହରର କିଛି ବ୍ୟକ୍ତିଙ୍କୁ ତହସିଲଦାର ବ୍ୟକ୍ତିଗତ ସହଯୋଗ କରୁ ନ ଥିବାରୁ ଶସ୍ତା ରାଜନୀତି କରୁଥିବା ଉକ୍ତ ଗୋଷ୍ଠୀ ଗଣମାଧ୍ୟମକୁ ସୂଚନା ଦେଇଛନ୍ତି। କିନ୍ତୁ ଏସବୁ ରାଜନୀତିକୁ ନେଇ ସ୍ଥାନୀୟ ଜନସାଧାରଣଙ୍କୁ ଅସୁବିଧାର ସମୁଖୀନ ହେବାକୁ ପଡୁଛି ବୋଲି ବୁଦ୍ଧିଜୀବୀ ମହଲରେ ଚର୍ଚ୍ଚା ହେଉଛି l