ଷ୍ଟିରିଆ,୧୨।୭: ଅଷ୍ଟ୍ରିଆର ଷ୍ଟିରିଆରେ ଚାଲିଥିବା ବର୍ଷା ବାଧାପ୍ରାପ୍ତ ଫର୍ମୁଲା-୧ ରେସ୍ରେ ବିଶ୍ୱ ଚାମ୍ପିୟନ ଲୁଇସ୍ ହାମିଲଟନ ପୋଲ୍ ପୋଜିଶନ ହାସଲ କରିଛନ୍ତି। ଏଥି ସହିତ ମର୍ସିଡିଜ୍ ଡ୍ରାଇଭର ହାମିଲଟନ କ୍ୟାରିୟରରେ ରେକର୍ଡ ୮୯ତମ ପୋଲ ପୋଜିଶନ ହାସଲ କରିଛନ୍ତି। ଶନିବାର ପୋଲ ପୋଜିଶନ ପାଇଁ ଅନୁଷ୍ଠିତ ରେସ୍ରେ ହାମିଲଟନ ଗ୍ରୀଡ୍ ୧ରେ ୧:୧୯.୨୭୩ ସେକେଣ୍ଟ ସମୟ ନେଇ ପ୍ରଥମ ସ୍ଥାନରେ ରହିଥିଲେ। ତାଙ୍କଠାରୁ ୧.୨୧୬ ସେକେଣ୍ଟ ସମୟ ଅଧିକ ନେଇ ରେଡ୍ ବୁଲ୍ର ମ୍ୟାକ୍ସ ଭେର୍ଷ୍ଟାପେନ ଦ୍ୱିତୀୟ ସ୍ଥାନରେ ରହିଛନ୍ତି। ଭେର୍ଷ୍ଟାପେନ ୧:୨୦.୪୮୯ ସେକେଣ୍ଡ ସମୟ ନେଇଥିଲେ। ସେହିପରି ମ୍ୟାକ ଲରେନ୍ର କାର୍ଲୋସ ସାଇଞ୍ଜ୍ ଜୁନିୟର ୧:୨୦.୬୭୧ ସେକେଣ୍ଡ ସମୟ ନେଇ ତୃତୀୟ ସ୍ଥାନରେ ରହିଥିଲେ। ସେହିପରି ମର୍ସିଡିଜର ଭାଲଟେରୀ ବୋଟ୍ଟାସ୍ ୧:୨୦.୭୦୧ ଓ ରିନଲ୍ଟର ଏଷ୍ଟେବାନ୍ ଓକନ ୧:୨୦.୯୨୨ ସେକେଣ୍ଡ ସମୟ ନେଇ ପଞ୍ଚମ ସ୍ଥାନରେ ରହିଛନ୍ତି। ନିଜ ପ୍ରଦର୍ଶନରେ ହାମିଲଟନ ଖୁସି ଜାହିର କରିଛନ୍ତି। ମୋର ପ୍ରଦର୍ଶନରେ ଉନ୍ନତି ହୋଇଛି। ସକାଳେ ଜୋର ବର୍ଷା ହୋଇଥିଲା। କୋଭିଡ୍-୧୯ ମହାମାରୀ କାରଣରୁ ଖାଲି ଷ୍ଟାଡିୟମରେ ରେସ୍ ଆୟୋଜିତ ହୋଇଥିଲା। ଉଲ୍ଲେଖଥାଉ କି, ବ୍ରିଟେନର ଲୁଇସ୍ ହାମିଲଟନ ୬ଥର ବିଶ୍ୱ ଚାମ୍ପିୟନଶିପ୍ ଜିତିଛନ୍ତି। ସେ ୨୦୦୮, ୨୦୧୪, ୨୦୧୫, ୨୦୧୭, ୨୦୧୮ ଓ ୨୦୧୯ରେ ଏହି ସଫଳତା ପାଇଥିଲେ।