ସେଣ୍ଟ. ଜୋନ୍ସ(ଆଣ୍ଟିଗୁଆ),୧।୧: ଅଧିନାୟକ ଭାବେ ଓ୍ବେଷ୍ଟଇଣ୍ଡିଜ ଟି୨୦ ଦଳକୁ କରିନ ପୋଲାର୍ଡ ପ୍ରତ୍ୟାବର୍ତ୍ତନ କରିଛନ୍ତି। ଇଂଲଣ୍ଡ ଓ ଆୟର୍ଲାଣ୍ଡ ବିପକ୍ଷ ଆଗାମୀ ଟି୨୦ ସିରିଜରେ ସେ ଦଳର ନେତୃତ୍ୱ ନେବେ। ଇଂଲଣ୍ଡ ସିରିଜ ପୂର୍ବରୁ ଘରୋଇ ମାଟିରେ ଓ୍ବେଷ୍ଟଇଣ୍ଡିଜ ଆୟର୍ଲାଣ୍ଡ ବିପକ୍ଷରେ ୩ଟି ଦିନିକିଆ ମ୍ୟାଚ୍ ଖେଳିବ ଓ ଗୋଟିଏ ଟି୨୦ ମ୍ୟାଚ୍ ଖେଳିବ। ଜାମାଇକାର ସାବିନା ପାର୍କରେ ଜାନୁୟାରୀ ୮ରୁ ୧୬ ତାରିଖ ମଧ୍ୟରେ ଏହି ସିରିଜ ଆୟୋଜନ ହେବ। ଶୁକ୍ରବାର ଇଂଲଣ୍ଡ ଓ ଆୟର୍ଲାଣ୍ଡ ବିପକ୍ଷ ଏହି ସିରିଜ ପାଇଁ ଓ୍ବେଷ୍ଟଇଣ୍ଡିଜ ଦଳ ଘୋଷଣା କରିଛି। ସେହିପରି ଜାନୁୟାରୀ ୨୨ରୁ ୩୦ ତାରିଖ ମଧ୍ୟରେ ବାର୍ବାଡୋସର କେନସିଂଟନ ଓଭାଲ ଗ୍ରାଉଣ୍ଡରେ ଓ୍ବେଷ୍ଟଇଣ୍ଡିଜ ଓ ଇଂଲଣ୍ଡ ୫ଟି ଟି୨୦ ଅନ୍ତର୍ଜାତୀୟ ମ୍ୟାଚ୍ ଖେଳିବେ।
ଏକ ସନ୍ତୁଳିତ ଦଳ ଚୟନ କରିବାକୁ ଆମେ ପ୍ରୟାସ କରିଛୁ ବୋଲି ଓ୍ବେଷ୍ଟଇଣ୍ଡଜ କୋଚ୍ ଫିଲ ସିମନ୍ସ କହିଛନ୍ତି। ହାମଷ୍ଟ୍ରିଙ୍ଗ୍ ଇଞ୍ଜୁରି କାରଣରୁ ପୋଲାର୍ଡ ପାକିସ୍ତାନ ଗସ୍ତରେ ଯାଇପାରି ନ ଥିଲେ। ସେ ଟି୨୦ ବିଶ୍ୱକପ୍ ଖେଳିବା ଅବସରରେ ଇଞ୍ଜୁରିର ସମ୍ମୁଖୀନ ହୋଇଥିଲେ।
ଘୋଷିତ ଓ୍ବେଷ୍ଟଇଣ୍ଡିଜ ଟି୨୦ ଦଳ: କିରନ ପୋଲାର୍ଡ (ଅଧିନାୟକ), ନିକୋଲାସ ପୁରନ, ଫବିଆନ ଆଲେନ (କେବଳ ଇଂଲଣ୍ଡ), ଡାରେନ ବ୍ରାଭୋ (କେବଳ ଇଂଲଣ୍ଡ), ରୋଷ୍ଟନ ଚେଜ, ଶେଲଡନ କଟ୍ରେଲ, ଡୋମିନିକ ଡ୍ରେକ୍ସ, ସାଇ ହୋପ, ଅକିଲ ହୋସେନ, ଜାସନ ହୋଲ୍ଡର, ବ୍ରାଣ୍ଡନ କିଙ୍ଗ୍, କାଏଲ ମେୟର୍ସ, ରୋଭମ୍ୟାନ ପାଓ୍ବେଲ, ରୋମାରିଓ ଶେଫେର୍ଡ, ଓଡିନ ସ୍ମିଥ, ହେଡେନ ଓ୍ବାଲ୍ସ ଜୁନିୟର।
ଆୟର୍ଲାଣ୍ଡ ବିପକ୍ଷ ଓ୍ବେଷ୍ଟଇଣ୍ଡିଜ ଦିନିକିଆ ଦଳ: କରିନ ପୋଲାର୍ଡ (ଅଧିନାୟକ), ସାଇ ହୋପ, ଶମରା ବ୍ରୁକ୍ସ, ରୋଷ୍ଟନ ଚେଜ, ଜଷ୍ଟିନ ଗ୍ରେଭ୍ସ, ଜାସନ ହୋଲ୍ଡର, ଅକିଲ ହୋସେନ, ଜେଡେନ ସିଲ୍ସ, ନିକୋଲାସ ପୁରନ, ରୋମାରିଓ ଶେଫର୍ଡେ, ଓଡିନ ସ୍ମିଥ୍ ଓ ଡେଭନ ଥୋମାସ।
