ପାଟନା,୭ ।୧୧: ବିହାର ବିଧାନସଭାର ୭୮ ଆସନ ପାଇଁ ତୃତୀୟ ବା ଚୁଡାନ୍ତ ପର୍ଯ୍ୟାୟ ଭୋଟ ଗ୍ରହଣ ଆରମ୍ଭ କରାଯାଇଛି । ୧୬ ଜିଲାରେ ହେଉଥିବା ଏହି ଭୋଟ ଗ୍ରହଣ ସକାଳ ୭ଟାରୁ ଆରମ୍ଭ ହୋଇଛି । ଏଥର ପାଖାପାଖି ୨.୩୫ କୋଟି ଭୋଟର ୧,୨୦୪ ଜଣ ପ୍ରାର୍ଥୀଙ୍କ ଭାଗ୍ୟ ନିର୍ଦ୍ଧାରଣ କରିବେ । ତୃତୀୟ ପର୍ଯ୍ୟାୟରେ ରାଷ୍ଟ୍ରୀୟ ଜନତା ଦଳ(ଆର୍ଜେଡି)ର ସର୍ବାଧିକ ୪୬ ଜଣ ପ୍ରାର୍ଥୀ ଥିବା ବେଳେ ଲୋକ ଜନଶକ୍ତି(ଏଲ୍ଜେପି)ର ୪୨, ଜନତା ଦଳ(ୟୁନାଇଟେଡ)ର ୩୭, ଭାରତୀୟ ଜନତା ପାର୍ଟି(ଭାଜପା)ର ୩୫ ଓ କଂଗ୍ରେସର ୨୫ ପ୍ରାର୍ଥୀ ରହିଛନ୍ତି । ଏହାସହ ସ୍ୱାଧୀନ ଓ ଆଉ କିଛି ପାର୍ଟିର ପ୍ରାର୍ଥୀ ମଧ୍ୟ ରହିଛନ୍ତି । କରୋନାକୁ ଦୃଷ୍ଟିରେ ରଖି ପୋଲିଂ ବୁଥ୍ରେ ସମସ୍ତ ପ୍ରକାର ବ୍ୟବସ୍ଥା କରାଯାଇଥିବା ବେଳେ ଭୋଟରମାନେ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଛି । ଏହାସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବହୁ ସଂଖ୍ୟାରେ ମତଦାନ କରିବାକୁ ଭୋଟରଙ୍କୁ ଅନୁରୋଧ କରିଛନ୍ତି ।