ଇମୋଲା (ଇଟାଲି), ୧୭ା୪-ରବିବାର ହେବାକୁ ଥିବା ଇମିଲିଆ ରୋମାଗ୍ନା ଗ୍ରାଁ ପ୍ରି ପାଇଁ ମର୍ସିଡିଜ୍ର ଲୁଇସ୍ ହାମିଲଟନ ପୋଲ୍ ପୋଜିଶନ ହାସଲ କରିଛନ୍ତି। ଶନିବାର ଅନୁଷ୍ଠିତ ରୋମାଞ୍ଚକ କ୍ୱାଲିଫାଇଙ୍ଗ ସେସନରେ ସେ ରେଡ୍ବୁଲ୍ର ସର୍ଗିଓ ପେରେଜଙ୍କୁ ମାତ୍ର ୦.୦୩୫ ସେକେଣ୍ଡ ଟାଇମିଂରେ ପଛରେ ପକାଇ ରେସ୍ ଜିତିଥିଲେ। ହାମିଲଟନଙ୍କ କ୍ୟାରିୟରର ଏହା ହେଉଛି ୯୯ତମ ପୋଲ୍ ପୋଜିଶନ। ପେରେଜ ନିଜ ଟିମ୍ମେଟ୍ ମାକ୍ସଭର୍ଷ୍ଟାପେନ୍ଙ୍କ ଆଗରେ ଦ୍ୱିତୀୟ ସ୍ଥାନ ଅଧିକାର କରିଥିଲେ। ଫେରାରିର ଚାଲର୍ସ ଲେକ୍ରେକ୍ ଚତୁର୍ଥ ହୋଇଥିଲେ। ୫ମରୁ ୧୦ମ ସ୍ଥାନ ଅଧିକାର କରିଥିବା ଅନ୍ୟମାନେ ହେଲେ ପିଏରେ ଗାସ୍ଲି (ଆଲ୍ଫା ତାଉରି), ଡାନିଏଲ ରିକାର୍ଡୋ (ମ୍ୟାକଲାରେନ), ଲାଣ୍ଡୋ ନୋରିସ (ମ୍ୟାକଲରେନ), ଭାଲଟୋରି ବୋଟାସ (ମର୍ସିଡିଜ୍),ଷ୍ଟିବାନ ଓକନ (ଆଲପାଇନ୍) ଓ ଲାନ୍ସ ଷ୍ଟୋଲ୍ (ଆଷ୍ଟନ ମାର୍ଟିନ)। ସୂଚନାଯୋଗ୍ୟ, ଇମିଲିଆ ରୋମାଗ୍ନା ଗ୍ରାଁ ପ୍ରି ହେଉଛି ଚଳିତ ଫର୍ମୁଲା ଓ୍ବାନ ସିଜନର ଦ୍ୱିତୀୟ ରେସ୍। ଗତ ମାସରେ ଅନୁଷ୍ଠିତ ବାହାରିନ ଗ୍ରଁା ପ୍ରିରେ ବିଶ୍ୱ ଚାମ୍ପିୟନ ଲୁଇସ୍ ହାମିଲଟନ ଟାଇଟଲ ବିଜୟୀ ହୋଇଥିଲେ।
