କୋରେଇ,୧୫।୪(ଡି.ଏନ.ଏ.):କଳିଙ୍ଗନଗର ଶିଳ୍ପାଞ୍ଚଳର ମୁଖଶାଳା କୋରେଇ ବ୍ଲକ ଅଧୀନସ୍ଥ ପଥରପଦା ପଞ୍ଚାୟତର ଖସାଗଡ଼ିଆ ମୌଜାରେ ଥିବା ଜୟ ଜଗନ୍ନାଥ କୋକ ଇଣ୍ଡଷ୍ଟ୍ରି କଳାଧୂଆଁ ସାଜି ଲୋକଙ୍କ ପାଇଁ ଖଳନାୟକ ସାଜିଛି। ଏହି କୋକ ଇଣ୍ଡଷ୍ଟ୍ରି ଦୀର୍ଘ ବର୍ଷ ହେବ ବିନା କାଗଜପତ୍ରରେ ଚାଲିଛି। ଏନେଇ ପ୍ରଭାବିତ ଲୋକେ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ(ଏସପିସିବି)ର କଳିଙ୍ଗନଗର ଆଞ୍ଚଳିକ ଅଧିକାରୀ ଏବଂ ଜିଲା ପ୍ରଶାସନ ନିକଟରେ ଅଭିଯୋଗ କରିଛନ୍ତି। ସୋମବାର ଅଞ୍ଚଳବାସୀ କୋରେଇ ଜନଶୁଣାଣୀରେ ମଧ୍ୟ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି।
ଅଭିଯୋଗ ଅନୁଯାୟୀ କେତେକ ପ୍ରଭାବଶାଳୀ ନେତାଙ୍କୁ ହାତ କରି ଇଣ୍ଡଷ୍ଟ୍ରି ମାଲିକ ପଥରପଦା ପଞ୍ଚାୟତ ଖସାଗଡ଼ିଆ ମୌଜାର ଖାତା ନଂ.୯୪ ଏବଂ ପ୍ଲଟ ନଂ ୭୬, ୩୧୧, ୩୧୨, ୩୧୯, ୨୨/୫୭୫ ପାଖାପାଖି ୩୦ ଏକର ଜମିରେ କୋଇଲା ଡମ୍ପ କରି ରାଜ୍ୟ ବାହାରକୁ ଚାଲାଣ କରୁଛନ୍ତି। ହଜାରରୁ ଊର୍ଦ୍ଧ୍ୱ ଟ୍ରିପ କୋଇଲା ଜମା କରିବା ଫଳରେ ନିକଟସ୍ଥ ଗ୍ରାମ ଗୁଡ଼ିକରେ ବାସ କରୁଥିବା ପରିବାର ଅନେକ ଅସୁବିଧାରେ ପଡୁଛନ୍ତି। ସାମାନ୍ୟ ପବନ ବୋହିଲେ କୋଇଲା ଗୁଣ୍ଡ ଉଡି ପିଇବା ପାଣିରେ ପଡୁଛି । ଏହି ପାଣି ପିଇ ପରିବାରର ସଦସ୍ୟ ଏବଂ ପିଲାଛୁଆମାନେ ବିଭିନ୍ନ ପ୍ରକାର ରୋଗରେ ଆକ୍ରାନ୍ତ ହେଉଥିବା ସହ ସାମାନ୍ୟ କାଶ ହେଲେ ପାଟିରୁ କଳା ରଙ୍ଗର କଫ ବାହାରୁଥିବା ପଥରପଦା ଗ୍ରାମର ପ୍ରଦୀପ ପରିଡ଼ା ଓ ମମତା ମହାପାତ୍ର କହିଛନ୍ତି । ଝରକା କବାଟ ଖୋଲାଥିଲେ ଏହି କୋଇଲା ଗୁଣ୍ଡ ଘର ଭିତରକୁ ପଶି ଯାଉଛି । ନିକଟସ୍ଥ ଘରଗୁଡ଼ିକର ଝରକା କବାଟ କାନ୍ଥ ଆଦି ହାତ ମାରିଲେ କଳା ରଙ୍ଗର ପାଉଁଶ ଛାଡୁଥିବା ଦେଖିବାକୁ ମିଳିଛି। ଦୟନୀୟ ଅବସ୍ଥାରେ ସ୍ଥାନୀୟ ପରିବାରଗୁଡ଼ିକ କାଳାତିପାତ କରୁଥିବା ଗ୍ରାମର ରଘୁନାଥ ଦାସ ପ୍ରକାଶ କରିଛନ୍ତି। ଏଥିସହିତ ଆଖପାଖ ଚାଷ ଜମିରେ ଏହି କୋଇଲା ଗୁଣ୍ଡ ପଡୁଥିବାରୁ ଚାଷୀମାନେ ମଧ୍ୟ କ୍ଷତିଗ୍ରସ୍ତ ହେଉଥିବା ଚାଷୀ କରୁଣାକର ମାଝି ଅଭିଯୋଗ କରିଛନ୍ତି । ପାଣିକୋଇଲି ଅମୃତିଆ ଗ୍ରାମ ଉନ୍ନୟନ ରାସ୍ତାକୁ ଲାଗି ଏହି ବେଆଇନ କୋଇଲା ଡ଼ିପୋ ଚାଲିଥିବାରୁ ପ୍ରତିଦିନ ଏହି ରାସ୍ତା ଦେଇ ଯାତାୟାତ କରୁଥିବା ହଜାର ହଜାର ପଥଚାରୀ ମଧ୍ୟ ବହୁ ସମସ୍ୟାରେ ପଡୁଛନ୍ତି । ସେହିପରି ଆରଡ଼ି ରାସ୍ତାରେ କୋଇଲା ପରିବହନ କରୁଥିବା ଗାଡ଼ିଗୁଡ଼ିକ ୨୦ ରୁ ୨୫ ଟନ ଓଭର ଲୋଡିଂ ନେଇ ରାସ୍ତାରେ ଯାତାୟାତ କରୁଛନ୍ତି । ଯାହା ଫଳରେ ରାସ୍ତାଟି ଯେତେ ମରାମତି ହେଲେ ମଧ୍ୟ ଖୁବକମ ଦିନ ମଧ୍ୟରେ ବ୍ୟପର୍ଯ୍ୟସ୍ତ ହୋଇପଡୁଛି। ସବୁଠାରୁ ବଡ଼କଥା ହେଉଛି ଏହି ଇଣ୍ଡଷ୍ଟ୍ରି ଅତି ନିକଟରେ ନବୋଦୟ ସ୍କୁଲ ରହିଛି । ସେଠାରେ ଅଧ୍ୟୟନ କରୁଥିବା ଛାତ୍ରୀଛାତ୍ର ମଧ୍ୟ ସମାନ ପରିସ୍ଥିତି ଦେଇ ଗତି କରୁଛନ୍ତି। ତାଳଚେର ପଟୁ ଆସୁଥିବା କୋଇଲା ଗାଡ଼ିଗୁଡ଼ିକ ସହିତ ବୁଝାମଣା କରି ବିନା କାଗଜପତ୍ର ଏବଂ କମ ଦରରେ ଶତାଧିକ ଟ୍ରିପ କୋଇଲା କିଣି ବ୍ୟବସାୟ କରୁଥିବା ଅଭିଯୋଗ ହୋଇଛି। ଏନେଇ ଖଣି ବିଭାଗ ମଧ୍ୟ ଜାଣି ନୀରବ ରହିଥିବା ଲୋକଙ୍କୁ ବିସ୍ମିତ କରିଛି। ନିରୁପାୟ ହୋଇ ଅଭିଯୋଗକାରୀ ପରିବାରଗୁଡିକ ଗତ ୧୦ ତାରିଖ ସୋମବାର କୋରେଇ ବ୍ଲକ ଅଧୀନରେ ଚାଲୁଥିବା ଜିଲାପାଳ ଓ ଆରକ୍ଷୀ ଅଧୀକ୍ଷକଙ୍କ ମିଳିତ ଜଣାଶୁଣାଣୀରେ ଉପସ୍ଥିତ ରହି ଏନେଇ ଅଭିଯୋଗ କରିଛନ୍ତି। ଏନେଇ କଳିଙ୍ଗନଗର ଆଞ୍ଚଳିକ ପ୍ରଦୂଷଣ ନିୟନ୍ତ୍ରଣ ବୋର୍ଡ ଅଧିକାରୀ ପ୍ରମୋଦ କୁମାର ବେହେରାଙ୍କୁ ପଚାରିବାରେ ସେ କହିଛନ୍ତି ସେମିତି କିଛି ଅଭିଯୋଗ ଆସିନାହିଁ। ଅଭିଯୋଗ ହେଲେ କାର୍ଯ୍ୟାନୁଷ୍ଠାନ ନିଆଯିବ ।