ଢେଙ୍କାନାଳ ଅଫିସ, ୧୮।୭ – ଓଡ଼ିଶାର ଦ୍ୱିତୀୟ ବୃହତ୍ତମ ନଦୀ ‘ବ୍ରାହ୍ମଣୀ’ ବିପଦରେ। ନଦୀ ତଟବର୍ତ୍ତୀ ଅଞ୍ଚଳରେ ଗଢ଼ି ଉଠିଥିବା କଳକାରଖାନାର ବର୍ଜ୍ୟଜଳ ଏହାର ପାଣିକୁ ଅତିମାତ୍ରାରେ ପ୍ରଦୂଷିତ କରିଦେଇଛି। ପ୍ରଦୂଷଣ ପ୍ରଭାବ ଏତେ ବଢ଼ିଗଲାଣି ଯେ, ଦୀର୍ଘ ଆୟୁବିଶିଷ୍ଟ କଇଁଛ ଭଳି ଜଳଚର ଜୀବ, ବିଭିନ୍ନ ପ୍ରଜାତିର ମାଛ ମରି ଭାସୁଛନ୍ତି। ଏଥିରୁ ପ୍ରଦୂଷଣ କେତେ ବିପଜ୍ଜନକସ୍ତରରେ ରହିଛି, ତାହା ସ୍ପଷ୍ଟ ଅନୁମେୟ। ମଧୁର ଜଳ କଇଁଛଙ୍କ ପ୍ରାକୃତିକ ଅନ୍ତୁଡ଼ିଶାଳ ଭାବେ ପରିଚିତ ଢେଙ୍କାନାଳରେ ପ୍ରବାହିତ ବ୍ରାହ୍ମଣୀ ନଦୀଶଯ୍ୟାରେ ଏଭଳି ଦୃଶ୍ୟ ପରିବେଶବିତ୍ଙ୍କୁ ବ୍ୟଥିତ କରିଛି। ତୁରନ୍ତ ଏ ଦିଗରେ ପଦକ୍ଷେପ ନିଆ ନ ଗଲେ ବର୍ଷ କେଇଟାରେ ବ୍ରାହ୍ମଣୀ ଜଳଜ ଜୀବଙ୍କ କବରସ୍ଥଳୀ ପାଲଟିବ ବୋଲି ସେମାନେ ଆଶଙ୍କା ବ୍ୟକ୍ତ କରିଛନ୍ତି।
ସଦର ରେଞ୍ଜ୍ ଅଧୀନ ବଣସିଂହ, ରାଧାଦେଈପୁର, କାମାକ୍ଷାନଗର ରେଞ୍ଜ୍ ରାଙ୍କିଆ, ବୁଢ଼ୀବିଲି ନିକଟ ବ୍ରାହ୍ମଣୀ ନଦୀଶଯ୍ୟା ଗତକିଛି ବର୍ଷ ହେଲା ମଧୁର ଜଳ କଇଁଛଙ୍କ ଗଣ ଅଣ୍ଡାଦାନର ଠିକଣା ପାଲଟିଛି। ପ୍ରତିବର୍ଷ ନଭେମ୍ବରରୁ ସେମାନେ ଏଠାକୁ ଆସି ଅଣ୍ଡାଦାନ କରିଥାଆନ୍ତି। କଇଁଛଙ୍କ ସମାଗମ ବଢୁଥିବାରୁ ଅଣ୍ଡାଦାନ ସ୍ଥଳ ଉପରେ ବନ ବିଭାଗ କଡ଼ା ନଜର ରଖିଛି। ବ୍ରାହ୍ମଣୀ କଇଁଛ ସୁରକ୍ଷା ସମିତି ପକ୍ଷରୁ କଇଁଛ ଏବଂ ଅଣ୍ଡାକୁ ସୁରକ୍ଷା ପ୍ରଦାନ କରାଯାଉଛି। ଗତବର୍ଷ ୯୦୦ରୁ ୧୦୦୦ ଅଣ୍ଡାଦାନ ହୋଇଥିବାବେଳେ ବହୁସଂଖ୍ୟାକ କଇଁଛ ଶାବକ ଅଣ୍ଡାରୁ ଫୁଟି ନଦୀକୁ ଯାଇଛନ୍ତି। ତେବେ ଜଳ ପ୍ରଦୂଷଣ କାରଣରୁ ଏବେ କଇଁଛମାନେ ମରୁଛନ୍ତି। ଓଡ଼ାପଡ଼ା ବ୍ଲକ କୁଶୁପଙ୍ଗା ଗ୍ରାମ ନଦୀ କୂଳରେ ରବିବାର ୩୦ କେଜିରୁ ଊର୍ଦ୍ଧ୍ୱ ଓଜନର ଏକ ବଡ଼ କଇଁଛ ମରି ପଡ଼ିଥିବା ଦେଖିବାକୁ ମିଳିଥିଲା। ସ୍ଥାନୀୟ ଅଞ୍ଚଳର କେତେଜଣ ଯୁବକ ଗାଧୋଇବାକୁ ଯାଇଥିବାବେଳେ ଏହାକୁ ଦେଖିଥିଲେ। ଦୂଷିତ ଜଳ ଯୋଗୁ କଇଁଛଟିର ମୃତ୍ୟୁ ଘଟିଥିବା ଅନୁମାନ କରାଯାଉଥିବାବେଳେ ସମ୍ପୃକ୍ତ ଯୁବକମାନେ ଏହାକୁ ନଦୀରେ ଭସାଇ ଦେଇଥିଲେ। ଲଗାତର ଭାବେ ଏଭଳି କଇଁଛଙ୍କ ମୃତ୍ୟୁ ଘଟୁଥିବା ସ୍ଥାନୀୟ ଲୋକେ କହୁଥିବାବେଳେ ବନ ବିଭାଗ ନିକଟରେ ଏହାର ସୂଚନା ନ ଥିବା ଆଲୋଚନାର ବିଷୟ ହୋଇଛି।
ଏ ସଂକ୍ରାନ୍ତରେ ବ୍ରାହ୍ମଣୀ କଇଁଛ ସୁରକ୍ଷା ସମିତି ଆବାହକ ରାଜେନ୍ଦ୍ର ପାଣିଗ୍ରାହୀ କୁହନ୍ତି, ମାଛ ଧରିବା ପାଇଁ ନଦୀରେ ଡିନାମାଇଟ ବିସ୍ଫୋରଣ କରାଯାଉଛି। ନଦୀ ନିକଟବର୍ତ୍ତୀ ଶିଳ୍ପାନୁଷ୍ଠାନର ଦୂଷିତ ଜଳ ସିଧାସଳଖ ପାଣିରେ ମିଶୁଛି। ଫଳରେ କଇଁଛ ଏବଂ ଅନ୍ୟ ଜଳଚର ଜୀବଙ୍କ ମୃତ୍ୟୁ ଘଟୁଥିବା ସନ୍ଦେହ କରାଯାଉଛି। ଜିଲା ବନଖଣ୍ଡ ଅଧିକାରୀ ଡ. ପ୍ରକାଶଚାନ୍ଦ ଗୋଗିନେନି କୁହନ୍ତି, ଏ ସମ୍ପର୍କରେ ତାଙ୍କ ନିକଟରେ କୌଣସି ସୂଚନା ନାହିଁ। ବନ ଅଧିକାରୀ ଓ କର୍ମଚାରୀଙ୍କୁ ଘଟଣାର ଅନୁଧ୍ୟାନ କରିବା ପାଇଁ ନିର୍ଦ୍ଦେଶ ଦିଆଯିବ।