ନୂଆଦିଲ୍ଲୀ, ୧୭।୭: ୟୁପିଏସ୍ସି ଦ୍ୱାରା ପରିଚାଳିତ ସିଭିଲ ସର୍ଭିସ ପରୀକ୍ଷାରେ ଉତ୍ତୀର୍ଣ୍ଣ ହେବା ପାଇଁ ଜାଲିଆତି ଦିବ୍ୟାଙ୍ଗ ପ୍ରମାଣପତ୍ର ଦାଖଲ କରିଥିବା ଅଭିଯୋଗ ଆସିବା ପରେ ପ୍ରୋବେଶନାରି ଆଇଏଏସ୍ ଅଧିକାରୀ ପୂଜା ଖେଡ୍କରଙ୍କ ଟ୍ରେନିଂକୁ ରଦ୍ଦ କରିଦିଆଯାଇଛି। ତାଙ୍କୁ ମହାରାଷ୍ଟ୍ରର ଡିଷ୍ଟ୍ରିକ୍ଟ ଟ୍ରେନିଂ ପ୍ରୋଗ୍ରାମରୁ ବାଦ୍ ଦିଆଯିବା ସହ ତୁରନ୍ତ ମସୁରୀ ଟ୍ରେନିଂ ଏକାଡେମୀରେ ହାଜର ହେବାକୁ କୁହାଯାଇଛି। ମହାରାଷ୍ଟ୍ର ସରକାରଙ୍କ ଆଡିଶନାଲ ଚିଫ୍ ସେକ୍ରେଟାରି ପୂଜାଙ୍କୁ ଚିଠି ଲେଖି ଓ୍ବାଶିମ ଜିଲାରୁ ଫେରିଯିବାକୁ ତାଙ୍କୁ ନିର୍ଦ୍ଦେଶ ଦେଇଛନ୍ତି। ଆସନ୍ତା ୨୩ ଜୁଲାଇ ସୁଦ୍ଧା ସେ ମସୁରୀ ଟ୍ରେନିଂ ଏକାଡେମୀରେ ହାଜର ହେବେ।
ସୂଚନାଯୋଗ୍ୟ, ପୂଜା କ୍ଷମତାର ଅପବ୍ୟବହାର. ଜାଲ୍ ଦିବ୍ୟାଙ୍ଗ ପ୍ରମାଣପତ୍ର ଦାଖଲ ଆଦି ପ୍ରସଙ୍ଗକୁ ନେଇ ବିବାଦ ଘେରରେ ରହିଥିଲେ। ସେ ପୁଣେର ଆସିଷ୍ଟାଣ୍ଟ କଲେକ୍ଟର ଭାବେ ଯୋଗଦେବା ପୂର୍ବରୁ ସରକାରୀ ଗାଡ଼ି, ଭିଆଇପି ନମ୍ବର ପ୍ଲେଟ୍, ରହିବା ପାଇଁ ଘର, ପର୍ଯ୍ୟାପ୍ତ ଷ୍ଟାଫ୍ ଓ ଜଣେ କନ୍ଷ୍ଟେବଳ ଦାବି କରି ବିବାଦ ଘେରକୁ ଆସିଥିଲେ। କ୍ଷମତାର ଏପରି ଅପବ୍ୟବହାର ଯୋଗୁ ପୂର୍ବରୁ ତାଙ୍କୁ ଓ୍ବାଶିମ୍ ଜିଲାର ଆସିଷ୍ଟାଣ୍ଟ କଲେକ୍ଟର ଭାବେ ବଦଳି କରାଯାଇଥିଲା।