ବମ୍ବେ: ରାତିରେ ମୋ’ ଭିଡିଓ ଦେଖନ୍ତି, ସକାଳେ ମୋତେ ଟ୍ରୋଲ କରନ୍ତି। କିଛି ଏଭଳି ଢଙ୍ଗରେ ନିଜର ଟ୍ରୋଲରଙ୍କୁ ଜବାବ ଦେଇଛନ୍ତି ମଡେଲ ତଥା ଅଭିନେତ୍ରୀ ପୁନମ ପାଣ୍ଡେ। ଯେଉଁମାନେ ଅଙ୍ଗ ପ୍ରଦର୍ଶନ କରୁଛନ୍ତି ବୋଲି ନିଲ୍ଲଜ କୁହନ୍ତି, ସେମାନଙ୍କୁ ପାଲଟା ଜବାବ ଦେଇଛନ୍ତି ପୁନମ। ଯଦି କେହି ଅନ୍ୟକୁ କଟାକ୍ଷ କରନ୍ତି, ଖରାପ ଲାଗିବା ଭଳି କାମ କରନ୍ତି, ସେମାନେ ହିଁ ନିଲ୍ଲଜ ବୋଲି ପୁନମ କହିଛନ୍ତି।
ବଲିଉଡ୍ ଅଭିନେତ୍ରୀ କଙ୍ଗନା ରାଣାଓ୍ବତଙ୍କ ରିଆଲିଟି ଶୋ’ ‘ଲକ୍ ଅପ୍’ରେ ପ୍ରତିଯୋଗୀ ଭାବେ ଭାଗ ନେଇଛନ୍ତି ପୁନମ। ଏଥିରେ ସେ ବ୍ୟକ୍ତିଗତ ଜୀବନ ଉପରେ ଅନେକ କିଛି କହୁଛନ୍ତି। ସ୍ବାମୀଙ୍କ ମାର୍ପିଟ୍ ପରେ ଏବେ ତାଙ୍କୁ କରାଯାଉଥିବା ଟ୍ରୋଲିଂର ଜବାବ ଦେଇଛନ୍ତି ସେ। ଶୋ’ର ଅନ୍ୟତମ ସାଥୀ ପ୍ରତିଯୋଗୀ ଅଞ୍ଜଳି ଅରୋରା ଏବଂ ତହସିନ ପୁନାଓ୍ବାଲାଙ୍କ ସହ କଥା ହେଉଥିଲେ ପୁନମ। ଏହି ଅବସରରେ ସେ ଆମେରିକାରେ ରହିବାର ଯୋଜନାକୁ ନେଇ କଥା ହୋଇଥିଲେ।
ପୁନମ କହିଥିଲେ, ଅନ୍ୟକୁ ଯେଉଁମାନେ ଖରାପ କହିଥାନ୍ତି ସେମାନେ ନିଜେ ଖରାପ ହୋଇଥାନ୍ତି। କେହି ଯଦି ନିଲ୍ଲଜ ବୋଲି ମୋତେ ଭାବେ ସେଥିରେ ମୁଁ ସହମତ ନୁହେଁ। ଏଥିରେ ତହସିନ ସମ୍ମତି ଜଣାଇ କହିଥିଲେ, ପୁନମଙ୍କ ଭିଡିଓ ଦେଖିଥାନ୍ତି, ଡାଉନ୍ଲୋଡ୍ କରିଥାନ୍ତି ଏବଂ ପରେ ତାଙ୍କ ବିଷୟରେ ଖରାପ କଥା କହିଥାନ୍ତି, ସେମାନେ ହିଁ ଖରାପ ଲୋକ।
ପରେ ପୁନମ ମଧ୍ୟ କଥାକୁ ଆଗକୁ ବଢ଼ାଇ ତହସିନଙ୍କ ସହ ସହମତ ବୋଲି କହିଥିଲେ। ୬୦ ମିଲିୟନ ଲୋକ ପସନ୍ଦ କରିବା ଏବଂ ମାସକରେ ୨୦୦ ମିଲିୟନ ଲୋକ ଯୋଡ଼ି ହେବା ସହଜ କଥା ନୁହେଁ। କିଏ ଏହି ‘ହିଡେନ୍ ଫଲୋଅର୍ସ’। ଏମାନେ ରାତିରେ ମୋ ଭିଡିଓ ଦେଖିଥାନ୍ତି ଏବଂ ସକାଳେ ଉଠି ମୋତେ ଟ୍ରୋଲ କରିଥାନ୍ତି, ମୋ ବିରୋଧରେ କହିଥାନ୍ତି। ତାଙ୍କୁ ପଚାରିବାକୁ ଚାହୁଁଛି ନିର୍ଲଜ କିଏ, ସେ ନା ମୁଁ ବୋଲି ପୁନମ ପ୍ରଶ୍ନ କରିଥିବା ଦେଖାଯାଉଛି।