ମୁମ୍ବାଇ,୨୧।୪: ଜମ୍ମୁ-କଶ୍ମୀରକୁ ଲାଗି ରହିଥିବା ପୁଞ୍ଛ ଜିଲାର ଭିମ୍ବର ଗଳି ଅଞ୍ଚଳରେ ଗୁରୁବାର ୨୦ ଏପ୍ରିଲରେ ଏକ ସେନା ଗାଡି ଉପରକୁ ଆତଙ୍କବାଦୀମାନେ ଆକ୍ରମଣ କରିଥିଲେ। ଫଳରେ ଏଥିରେ ୫ ଭାରତୀୟ ଶହୀଦ ହୋଇଯାଇଥିଲେ। ଏବେ ଏହାକୁ ନେଇ ଶିବସେନା(ଉଦ୍ଧବ ବାଲା ସାହେବ ଠାକରେ) ଶୁକ୍ରବାର ୨୧ ଏପ୍ରିଲରେ ସେନାଙ୍କ ଉପରେ ହୋଇଥିବା ଆକ୍ରମଣକୁ ନେଇ ପ୍ରତିକ୍ରିୟା ପ୍ରକାଶ କରିଛି। ଏହି ଆକ୍ରମଣକୁ ବିରୋଧ କରି ଜମ୍ମୁ-କଶ୍ମୀର ଶିବସେନା ୟୁନିଟ ଜମ୍ମୁରେ ଜୋରଦାର ପ୍ରଦର୍ଶନ କରିଛନ୍ତି। ପ୍ରଦର୍ଶନକାରୀ ପାକିସ୍ତାନର ଜାତୀୟ ପତାକା, ଏହି ଆକ୍ରମଣପାଇଁ ନିଜକୁ ଦାୟୀ କରିଥିବା ପାକିସ୍ତାନ ଆତଙ୍କବାଦୀ ସଙ୍ଗଠନ ଜୈଶ-ଏ-ମହମ୍ମଦ/ପିଏଏଫଏଫର ପୁତ୍ତଳିକା ଦାହ କରିଛନ୍ତି।
ଦଳର ପ୍ରଦେଶ ମୁଖ୍ୟ ମନିଷ ସାହନିଙ୍କ ନେତୃତ୍ୱରେ ଜମ୍ମୁର ରୁପ ନଗରସ୍ଥିତ ପାର୍ଟି କାର୍ଯ୍ୟାଳୟ ନିକଟରେ ଶିବସେନା କର୍ମୀ ଏକାଠି ହୋଇଥିଲେ। ଶିବ ସୈନିକ ପାକିସ୍ତାନକୁ ଟାର୍ଗେଟ କରି ଶହୀଦ ଭାରତୀୟ ଯବାନଙ୍କ ପ୍ରତିଶୋଧ ନେବାକୁ ଦାବି କରିବା ସହ ଜୈଶ-ଏ-ମହମ୍ମଦର ପିଏଫଏଫ ଓ ପାକିସ୍ତାନ ବିରୋଧରେ ଜୋରଦାର ବିରୋଧ ପ୍ରଦର୍ଶନ କରିଛନ୍ତି। ସାହନି କହିଛନ୍ତି ପାକିସ୍ତାନ ୩ ଥର ସିଧା ସଳଖ ଭାବେ ଭାରତଠାରୁ ଯୁଦ୍ଧରେ ହାରି ସାରିଲାଣି।
ଏହାସହ ସାହନି ଆହୁରି ମଧ୍ୟ ଦାବି କରିଛନ୍ତି କି ଭାରତୀୟ ସେନାଙ୍କୁ ହତ୍ୟା କରିଥିବା ଦେଶରୁ ଆସୁଥିବା ପାକିସ୍ତାନର ମନ୍ତ୍ରୀ ବିଲାଓ୍ବଲ ଭୁଟ୍ଟୋଙ୍କୁ ଭାରତ ମାଟିରେ ପାଦ ରଖିବାକୁ ଅନୁମତି ନ ଦିଅନ୍ତୁ ମୋଦି ସରକାର।