ନବରଙ୍ଗପୁର,୩।୭(ବି.ପ୍ର.): ଚଳିତ ବର୍ଷ ଦୁର୍ବଳ ମୌସୁମୀ ଓ ବର୍ଷାର ଅଭାବ ଯୋଗୁ ନବରଙ୍ଗପୁର ଜିଲାରେ ଧାନ ଚାଷ କାର୍ଯ୍ୟ ଆଗେଇ ପାରୁନି। ଚାଷୀ ତଳି ପକାଇ ବର୍ଷାକୁ ଚାହିଁ ବସିଛନ୍ତି। ପୂର୍ବ ବର୍ଷ ତୁଳନାରେ ଜୁନ୍ ମାସ ସୁଦ୍ଧା ଯେତିକି ବର୍ଷା ହେବା ଆବଶ୍ୟକ ଚଳିତ ବର୍ଷ ସେହି ଅନୁପାତରେ ବର୍ଷା ହୋଇନାହିଁ। ଜୁନ୍ ଶେଷ ସପ୍ତାହରେ ଜିଲାରେ ରୁଆ ବେଉଷା କାର୍ଯ୍ୟ ଚାଲୁଥିବାବେଳେ ଚଳିତ ବର୍ଷ ତାହା ଦେଖିବାକୁ ମିଳୁନାହିଁ। ଅଣ ଜଳସେଚିତ ଜିଲାରେ ବର୍ଷାର ଅଭାବ ରହିଲେ ଚାଷୀଙ୍କ ଆର୍ଥିକ ସ୍ଥିତି ଉପରେ ଚାପ ନିଶ୍ଚୟ ପଡ଼ିବ।
ଜୁନ୍ ସୁଦ୍ଧା ୨୦୧୯ରେ ୨୧୬ ମି.ମି., ୨୦୨୦ରେ ୨୧୪ ମି.ମି., ୨୦୨୦ରେ ୨୧୦ ମି.ମି. ଏବଂ ୨୦୨୨ରେ ଜୁନ୍ ସୁଦ୍ଧା ୧୩୨ ମି.ମି. ବର୍ଷା ହୋଇଛି। ଏହି ଅନୁପାତକୁ ଆଧାର କଲେ ନବରଙ୍ଗପୁର ଜିଲାରେ ଚଳିତ ବର୍ଷ ଅତିକମ୍ ହୋଇଛି। ଜମି ଗୁଡ଼ିକ ଭିଜା ଅବସ୍ଥାରେ ରହିଥିବାବେଳେ କାଦୁଅ ହୋଇ ପାରୁନାହିଁ। ଧାନ ରୁଆ ଓ ବେଉଷା ପାଇଁ ଜମିରେ ଅନ୍ୟୁନ ଦୁଇ ଇଞ୍ଚ ପାଣି ଆବଶ୍ୟକ। ତେବେ ମକା, ଆଖୁ, ପରିବା, ମାଣ୍ଡିଆ, ଡାଲି ଓ ତୈଳ ଜାତୀୟ ଚାଷ ପାଇଁ ପାଣିପାଗ ଅନୁକୂଳ ରହିଛି । ବିଶେଷକରି ଏବେ ଧାନଚାଷୀ ଚିନ୍ତାରେ ରହିଛନ୍ତି। ଜିଲାରେ ଚଳିତ ବର୍ଷ ଧାନ, ମକା, ଆଖୁ, ଡାଲି ଓ ତୈଳ ଜାତୀୟ , ମାଣ୍ଡିଆ , ପରିବା ଓ ଅନ୍ୟାନ୍ୟ କିସମକୁ ନେଇ ୨ ଲକ୍ଷ ୧ ହଜାର ୪୨୧ ହେକ୍ଟର ଜମିରେ ଖରିଫ ଚାଷ ହେବ । ତେବେ ଅଣଧାନ ଚାଷ ବୃଦ୍ଧି କରାଯିବାକୁ ସରକାର ପକ୍ଷରୁ ନିର୍ଦ୍ଦେଶ ରହିଥିବା ସୂଚନା ମିଳିଛି । ଚଳିତ ବର୍ଷ ଧାନ ୯୫ ହଜାର ହେକ୍ଟର, ଡାଲି ଜାତୀୟ ୧୧ହଜାର ୫୦୦, ତୈଳ ଜାତୀୟ ୧ ହଜାର, ପରିବା ୧୬ ହଜାର ୮୬୪, ଆଖୁ ୫ହଜାର ହେକ୍ଟର ଜମିରେ ଚାଷ କରାଯିବ। ମିଲେଟ ମିଶନ ମାଧ୍ୟମରେ ନବରଙ୍ଗପୁର, ପାପଡ଼ାହାଣ୍ଡି ,କୋଷାଗୁମୁଡ଼ା, ଉମରକୋଟ ଓ ଝରିଗାଁରେ ଗତ ବର୍ଷ ମାଣ୍ଡିଆ ଚାଷ ପାଇଁ ପ୍ରୋସାହିତ କରାଯାଇଥିଲା। ଚଳିତ ବର୍ଷ ନନ୍ଦାହାଣ୍ଡି, ତେନ୍ତୁଳିଖୁଣ୍ଟି, ଡାବୁଗାଁ ଓ ରାଇଘର ବ୍ଲକରେ ମଧ୍ୟ ମାଣ୍ଡିଆ ଚାଷ କରାଯିବ। ଗତ ବର୍ଷ ୨ ହଜାର ୩୬୯ ହେକ୍ଟର ଜମିରେ ମାଣ୍ଡିଆ ଚାଷ କରାଯାଇଥିବାବେଳେ ଚଳିତ ବର୍ଷ କିନ୍ତୁ କୌଣସି ଟାର୍ଗେଟ ଆସିନାହିଁ।