ଓ୍ବାଶିଂଟନ୍,୨୬।୧୨: ଇସଲାମାବାଦରେ ଥିବା ଆମେରିକୀୟ ଦୂତାବାସ ନିଜ କର୍ମଚାରୀଙ୍କୁ ସହରର ମ୍ୟାରିଅଟ ହୋଟେଲ ପରିଦର୍ଶନ ଉପରେ ପ୍ରତିବନ୍ଧକ ଲଗାଇଛି। ଦୂତାବାସ ଏକ ସୁରକ୍ଷା ଆଲର୍ଟରେ କହିଛି ଯେ, ଛୁଟିଦିନରେ ଇସଲାମାବାଦର ମ୍ୟାରିଅଟ ହୋଟେଲରେ ଅଜ୍ଞାତ ବ୍ୟକ୍ତି ଆମେରିକୀୟଙ୍କ ଉପରେ ଆକ୍ରମଣ କରିବାକୁ ଷଡଯନ୍ତ୍ର କରୁଛନ୍ତି ବୋଲି ଆମେରିକା ସରକାର ଅବଗତ ଅଛନ୍ତି।
ସହରରେ ଘୋଷିତ ରେଡ ଆଲର୍ଟ ଏବଂ ଜନସମାବେଶ ଉପରେ ନିଷେଧାଦେଶ ହେତୁ ଦୂତାବାସ ଏହାର ସମସ୍ତ କର୍ମଚାରୀଙ୍କୁ ଛୁଟିଦିନରେ ଇସଲାମାବାଦକୁ ଅନାବଶ୍ୟକୀୟ ଯାତ୍ରା ଠାରୁ ଦୂରେଇ ରହିବାକୁ ଅନୁରୋଧ କରିଛି। ଇଭେଣ୍ଟ, ପୂଜାପାଠ ସ୍ଥାନଗୁଡିକରେ ସତର୍କତା ଅବଲମ୍ବନ କରିବାକୁ ଏବଂ ବଡ଼ ସମାବେଶରୁ ଦୂରେଇ ରହିବାକୁ ପରାମର୍ଶ ଦେଇଛି।
ସୂଚନାଯୋଗ୍ୟ, ଦୁଇ ଦିନ ପୂର୍ବେ ଇସଲାମାବାଦରେ ଆତ୍ମଘାତୀ ବିସ୍ଫୋରଣରେ ଜଣେ ପୋଲିସ କର୍ମଚାରୀଙ୍କ ମୃତ୍ୟୁ ଘଟିଥିବା ବେଳେ ୬ ଜଣ ଆହତ ହୋଇଥିଲେ।