![](https://www.dharitri.com/wp-content/uploads/2024/06/2-4.jpg)
ଆଳି,୩ା୬(ବନମାଳୀ ସେନାପତି): କେନ୍ଦ୍ରାପଡ଼ା ଜିଲା ଆଳି ଅଞ୍ଚଳରେ ଗତ ଶନିବାର ଶାନ୍ତିପୂର୍ଣ୍ଣ ଭାବେ ମତଦାନ ଶେଷ ହୋଇଥିଲା। ହେଲେ ରବିବାର ଆଳି ଥାନା ଅନ୍ତର୍ଗତ ସଂସିଧା ଠାକୁରପାଟଣା ଗ୍ରାମରେ ନିର୍ବାଚନ ପରବର୍ତ୍ତୀ ହିଂସା ଗୁରୁତର ରୂପ ନେଇଛି। ଗୋଟିଏ ପରିବାର ଏକ ନିର୍ଦ୍ଧିଷ୍ଟ ରାଜନୈତିକ ଦଳକୁ ଭୋଟ ଦେବାରୁ ପଡୋଶୀ ସେହି ପରିବାର ସଦସ୍ୟଙ୍କୁ ମରଣାନ୍ତକ ଆକ୍ରମଣ କରିଥିବା ନେଇ ଆଳି ଥାନାରେ ଅଭିଯୋଗ ହୋଇଛି। ଅପରପକ୍ଷେ ଏହି ଘଟଣା ରାଜନୈତିକ ବିବାଦ ନୁହେଁ ଏହା ପାରିବାରିକ ଶତ୍ରୁତାରୁ ହୋଇଥିବା ଅନ୍ୟ ଏକ ଅଭିଯୋଗ ଆଳି ଥାନାରେ ହୋଇଛି। ଏହି ଘଟଣାରେ ୭ ଜଣ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ୨ଜଣଙ୍କ ଅବସ୍ଥା ଗୁରୁତର ଅଛି ।
ଆଳି ଥାନାରେ ପ୍ରଫୁଲ୍ଲ ପାଣ୍ଡବ କରିଥିବା ଅଭିଯୋଗ ଅନୁଯାୟୀ, ଗତ ଶନିବାର ସେ ଓ ତାଙ୍କ ପରିବାର ସଦସ୍ୟମାନେ ଏକ ରାଜନୈତିକ ଦଳକୁ ଭୋଟ ଦେବାରୁ ଅନ୍ୟ ଦଳ ସହିତ ଜଡିତ ଥିବା ତାଙ୍କ ପଡ଼ୋଶୀ ଅଲେଖ ପାଣ୍ଡବ ଓ ତାଙ୍କ ପୁଅ ମିହିର ପାଣ୍ଡବ ଉତ୍ତ୍ୟକ୍ତ ହୋଇ ମୋ ପୁଅ ଜିତେନ୍ଦ୍ରଙ୍କ ସହିତ ଯୁକ୍ତିତର୍କ କରିଥିଲେ। ଏହି ସମୟରେ ମୁଁ ଶୌଚ ହୋଇ ଆସୁଥିଲି। ଉଭୟଙ୍କୁ ବୁଝାଶୁଝା କରିଥିଲି। ହେଲେ ମିହିର ଓ ଅଲେଖ ମିଳିତ ଭାବେ ମୋ ମୁଣ୍ଡକୁ ଏକ ଲୁହା ରଡ଼ରେ ଆକ୍ରମଣ କରିଥିଲେ। କେବଳ ସେତିକିରେ ସେମାନେ ଶାନ୍ତ ପଡି ନ ଥିଲେ। ସେମାନେ ମୋ ସ୍ତ୍ରୀ ବୈଦେୟୀବାଳା(୬୫), ପୁଅ ଜିତେନ୍ଦ୍ର (୪୫), ବୋହୂ ରଶ୍ମିତା (୩୮) ଓ ନାତି ଅଭିମନ୍ୟୁ(୧୪)ଙ୍କୁ ବିଭିନ୍ନ ମାରଣାସ୍ତ୍ରରେ ଆକ୍ରମଣ କରିଥିଲେ। ଏହି ଆକ୍ରମଣରେ ପ୍ରଫୁଲ୍ଲ ଓ ଜିତେନ୍ଦ୍ରଙ୍କ ମୁଣ୍ଡରେ ଗଭୀର କ୍ଷତ ସୃଷ୍ଟି ହୋଇଛି। ଉଭୟଙ୍କୁ କେନ୍ଦ୍ରାପଡ଼ା ଜିଲା ସ୍ବାସ୍ଥ୍ୟକେନ୍ଦ୍ରକୁ ସ୍ଥାନାନ୍ତର କରାଯାଇଛି। ଅପରପକ୍ଷେ ପ୍ରଫୁଲ୍ଲ ଓ ତାଙ୍କ ପୁଅ ଜିତେନ୍ଦ୍ରଙ୍କ ଆକ୍ରମଣରେ ଅଲେଖ ଓ ତାଙ୍କ ପୁଅ ମିହିର ଆହତ ହୋଇଥିବା ଅଭିଯୋଗ କରିଛନ୍ତି ପଡ଼ୋଶୀ ପରିବାର। ଏହି ଘଟଣା ଜମିଜମା ଓ ପାରିବାରିକ ଶତ୍ରୁତାକୁ କେନ୍ଦ୍ର କରି ହୋଇଥିବା ଅଲେଖ କହିଛନ୍ତି। ଏ ସଂକ୍ରାନ୍ତରେ ପୋଲିସ ପୃଥକ୍ ପୃଥକ୍ ମାମଲା ରୁଜୁ କରି ତଦନ୍ତ ଚଳାଇଛି।