ପାଟଣା,୧୬ା୨(ସ୍ବ.ପ୍ର.): କେନ୍ଦୁଝର ଜିଲା ସାହାରପଡ଼ା ବ୍ଲକ କୁଣ୍ଡଳା ପଞ୍ଚାୟତ କୁଣ୍ଡୁଳାସ୍ଥିତ ମିରିଗିଖୋଜି କୁଣ୍ଡୁଳା ହାଇସ୍କୁଲ ଫାଟକରେ ଗୁରୁବାର ୧୨ଟି ସ୍ବୟଂ ସାହାୟକ ଗୋଷ୍ଠୀର ଶତାଧିକ ମହିଳା ବିଦ୍ୟାଳୟରେ ସୁଇପର ଓ ଓ୍ବାଚ୍ମ୍ୟାନ ନିଯୁକ୍ତି ଦାବିରେ ଫାଟକରେ ତାଲା ଦେଇ ଧାରଣାରେ ବସିଛନ୍ତି। ସ୍ବୟଂ ସହାୟିକା ଗୋଷ୍ଠୀର ମହିଳାଙ୍କ ଅଭିଯୋଗ ଅନୁଯାୟୀ, ବିଦ୍ୟାଳୟ ୫-ଟିରେ ରୁପାନ୍ତରିତ ହେବା ପରେ ପୂର୍ବରୁ ପ୍ରାଥମିକ ବିଦ୍ୟାଳୟରେ ରୋଷେଇ କରୁଥିବା ନିର୍ଦ୍ଦିଷ୍ଟ ଗୋଷ୍ଠୀଙ୍କୁ ପୁନର୍ବାର ଓ୍ବାଚ୍ମ୍ୟାନ, ସୁଇପର ପାଇଁ ନିଯୁକ୍ତି ଦେବାକୁ ଉପସ୍ଥିତ ମହିଳାମାନେ ବିରୋଧ କରିଛନ୍ତି। ଯାହାକୁ ନେଇ ୧୨ଟି ସ୍ବୟଂ ସହାୟିକା ଗୋଷ୍ଠୀର ମହିଳାମାନେ ଏଥି ପୂର୍ବରୁ ସାହାରପଡ଼ା ବିଡିଓ ବିଜୟ କୁମାର ନାୟକ, ସିଡିପିଓ ଦୀପ୍ତିମୟୀ ନାୟକ ଓ ଜିଲାପାଳ ଆଶିଷ ଠାକରେଙ୍କୁ ଦାବିପତ୍ର ପ୍ରତିବାଦ କରିଛନ୍ତି। ଦାବି ପୂରଣ ନ ହେଲେ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଧାରଣାରେ ବସିବେ ବୋଲି ମହିଳାମାନେ ଚେତାବନୀ ଦେଇଛନ୍ତି l ତେବେ ନବମ ଓ ଦଶମ ଶ୍ରେଣୀର ଏଫ୍ ଫୋର୍ ପରୀକ୍ଷା ଥିବାରୁ ସ୍ବୟଂ ସହାୟିକା ଗୋଷ୍ଠୀଙ୍କୁ ଭାରପ୍ରାପ୍ତ ପ୍ରଧାନଶିକ୍ଷକ ତାରା ଚାନ୍ଦ ମହାନ୍ତ ଅନୁରୋଧ କରିବାରୁ ସାନ ଫାଟକଟିକୁ ମହିଳାମାନେ ଖୋଲି ଦେଇ ମୁଖ୍ୟ ଫାଟକ ସମ୍ମୁଖରେ ଧାରଣାରେ ବସିଛନ୍ତି।