ଜଗତ୍ସିଂହପୁର ଅଫିସ, ୨୮ା୩: ଜଗତ୍ସିଂହପୁର ପୌରାଧ୍ୟକ୍ଷ ଓ କାଉନ୍ସିଲର ନିର୍ବାଚନ ପରେ ଏବେ ପୌର ଉପାଧ୍ୟକ୍ଷ ପଦକୁ ନେଇ ପ୍ରମୁଖ ରାଜନୈତିକ ଦଳଗୁଡିକ ପକ୍ଷରୁ ଅଙ୍କକଷା ଆରମ୍ଭ ହୋଇଯାଇଛି। ଏହି ପଦବୀ ପାଇଁ ନିର୍ବାଚନ ଆସନ୍ତା ୭ ତାରିଖରେ ହେବାକୁ ଥିବା ବେଳେ ଏବେଠାରୁ କସରତ ଆରମ୍ଭ ହୋଇଛି।
ଜଗତ୍ସିଂହପୁର ପୌରାଞ୍ଚଳରେ ମୋଟ ୨୧ଟି ୱାର୍ଡ ରହିଛି। ଏଥର ପୌରାଧ୍ୟକ୍ଷ ପଦବୀ ପାଇଁ ସିଧାସଳଖ ନିର୍ବାଚନ ହୋଇଥିବାବେଳେ କଂଗ୍ରେସ ପ୍ରାର୍ଥୀ ଅର୍ଚ୍ଚନା ସିଂ ନିର୍ବାଚିତ ହୋଇଛନ୍ତି। କାଉନସିଲର ପଦବୀରେ ୯ ବିଜେଡି, ୭ କଂଗ୍ରେସ, ୨ ଭାଜପା ଓ ୩ ସ୍ବାଧୀନ ପ୍ରାର୍ଥୀ ଜିତିଛନ୍ତି। ପୌର ଉପାଧ୍ୟକ୍ଷ ପଦବୀ ହାତେଇବାକୁ ହେଲେ ଅଧାରୁ ଅଧିକ ଅର୍ଥାତ୍ ୧୧ କାଉନସିଲର ଦରକାର। କିନ୍ତୁ କୌଣସି ଦଳ ପାଖରେ ସଂଖ୍ୟା ଗରିଷ୍ଠତା ନାହିଁ। ବିଜେଡି ପାଇଁ ଆଉ ୨ ଆବଶ୍ୟକ ଥିବାବେଳେ କଂଗ୍ରେସର ୪ ଜଣ ଦରକାର। ରାଜନୀତି ସମୀକ୍ଷକଙ୍କ ମତ ଅନୁସାରେ ବିଜେଡି ସପକ୍ଷରେ ୨୦ନଂ. କାଉନସିଲର ଦୀପ୍ତିରଞ୍ଜନ ସାହୁ (ସ୍ବାଧୀନ) ଆସିବା ଯଥେଷ୍ଟ ସମ୍ଭାବନା ରହିଛି। କାରଣ ସେ ବିଜେଡିରୁ ପ୍ରାର୍ଥୀ ହେବା ପାଇଁ ଆଶାୟୀ ଥିଲେ। ଦଳ ତାଙ୍କୁ ସୁଯୋଗ ନ ଦେବାରୁ ସେ ସ୍ବାଧୀନରେ ମଇଦାନକୁ ଓହ୍ଲାଇଥିଲେ। ବଡ଼କଥା ହେଲା, ଏହି ୱାର୍ଡଟି ବିଜେଡିର ଦୁର୍ଗ ବୋଲି କୁହାଯାଏ। ଏଠାରେ ବିଗତ କେତୋଟି ନିର୍ବାଚନରେ ବିଜେଡି ପ୍ରାର୍ଥୀ ଜିତିଥିଲେ। ଏଥର ବିଜେଡି ପ୍ରାର୍ଥୀ ସୁବ୍ରତ ପରିଡାଙ୍କ ବାପା ଗତଥର କାଉନସିଲର ଥିବାବେଳେ ଉକ୍ତ ୱାର୍ଡରେ ତାଙ୍କ ଦବ୍ଦବା ଥିଲା। ଦୀପ୍ତିରଞ୍ଜନଙ୍କର ମଧ୍ୟ ୱାର୍ଡରେ ଭଲ ସଙ୍ଗଠନ ରହିଥିଲା। ଉଭୟ ଦଳୀୟ ପ୍ରାର୍ଥୀ ହେବା ପାଇଁ ଆଶାୟୀ ଥିବାବେଳେ ନେତୃତ୍ୱ ସୁବ୍ରତଙ୍କ ଉପରେ ଆସ୍ଥା ପ୍ରକଟ କରିଥିଲେ। ନିର୍ବାଚନରେ ତ୍ରିମୁଖୀ ଲଢ଼େଇ ହୋଇଥିଲା। ବିଜେଡି ସପକ୍ଷରେ ୨୯୧, କଂଗ୍ରେସର ସୂର୍ଯ୍ୟକାନ୍ତ ସାହୁଙ୍କୁ ୨୦୪ ଓ ସ୍ବାଧୀନ ପ୍ରାର୍ଥୀ ଦୀପ୍ତିରଞ୍ଜନଙ୍କୁ ୨୯୯ ଖଣ୍ଡ ଭୋଟ ମିଳିଥିଲା। ବିଜେଡି ପ୍ରାର୍ଥୀ ସୁବ୍ରତଙ୍କଠାରୁ ସ୍ବାଧୀନ ପ୍ରାର୍ଥୀ ଦୀପ୍ତିରଞ୍ଜନ ୮ ଖଣ୍ଡ ଭୋଟ ବ୍ୟବଧାନରେ ଜିତିଥିଲେ। ଏବେ ଉପାଧ୍ୟକ୍ଷ ପଦବୀ ପାଇଁ ବିଜେଡି ପାଖରେ ଆବଶ୍ୟକ ସଂଖ୍ୟା ନ ଥିବାରୁ ଦୀପ୍ତିରଞ୍ଜନଙ୍କୁ ମନାଇବାକୁ ଦଳ ପକ୍ଷରୁ ଉଦ୍ୟମ ହେଉଥିବା ଆଲୋଚନା ହେଉଛି। ହେଲେ ତାଙ୍କୁ ଉପାଧ୍ୟକ୍ଷ ପଦବୀ ମିଳିଲେ ସେ ସମର୍ଥନ କରିବେ ବୋଲି ସର୍ତ୍ତ ରଖୁଥିବା ତାଙ୍କର ଜଣେ ନିକଟ ସମ୍ପର୍କୀୟ ସୂଚନା ଦେଇଛନ୍ତି। ବାସ୍ତବରେ ଦୀପ୍ତିରଞ୍ଜନ ସାମିଲ ହେଲେ ବିଜେଡି ପାଇଁ ଆଉ ଜଣେ କାଉନ୍ସିଲରଙ୍କ ଆବଶ୍ୟକତା ରହିଛି। ଏହି ସଂଖ୍ୟା ପୂରଣ କରିବାକୁ ବିଜେଡିକୁ ସ୍ବାଧୀନ ୨ କିମ୍ବା ଭାଜପାର ୨ କାଉନସିଲରଙ୍କ ମଧ୍ୟରୁ ଜଣଙ୍କୁ ହାତେଇବାକୁ ପଡ଼ିବ। ଏବେର ରାଜନୈତିକ ସ୍ଥିତି ଯାହା ରହିଛି ଭାଜପାର ୨ ଜଣ ବିଜେଡି ସହ ବୁଝାମଣା କରି ନ ପାରନ୍ତି। ଯେହେତୁ କେନ୍ଦ୍ରରେ ଅନେକ କ୍ଷେତ୍ରରେ ଭାଜପା ସହ ବିଜେଡି ହାତ ମିଳାଇଛି ସେ ଦୃଷ୍ଟିରୁ ବୁଝାମଣାକୁ ସମ୍ପୂର୍ଣ୍ଣ ଏଡ଼ାଇ ଦିଆଯାଇ ନ ପାରେ। ଏହା ନ ହେଲେ ଅବଶିଷ୍ଟ ୨ ସ୍ବାଧୀନ କାଉନ୍ସିଲରଙ୍କ ମଧ୍ୟରୁ ଜଣଙ୍କ ସମର୍ଥନ ଜରୁରୀ। କିନ୍ତୁ ଏହି ୨ କାଉନ୍ସିଲର ବିଜେଡିକୁ ସମର୍ଥନ କରିବା ସ୍ଥିତିରେ ନ ଥିବା ବିଶେଷ ସୂତ୍ରରୁ ଜଣାଯାଇଛି। ଯଦି ଜଣେ ସମର୍ଥନ ଦିଅନ୍ତି ତେବେ ବିଜେଡି ଉପାଧ୍ୟକ୍ଷ ପଦ ଦଖଲ କରିବା ସମ୍ଭବ ହେବ। ଅନ୍ୟପକ୍ଷେ କଂଗ୍ରେସ ପାଇଁ ଆବଶ୍ୟକ ୪ କାଉନ୍ସିଲରଙ୍କ ସମର୍ଥନ ମିଳିଯିବା ସମ୍ଭାବନା ଦେଖାଦେଇଛି। ୭ନଂ. ଓ ୧୭ନଂ. ୱାର୍ଡର ସ୍ବାଧୀନ କାଉନ୍ସିଲର ଯଥାକ୍ରମେ ଗୋଲାମ ଅଲ୍ଲୀ ଖଁା ଓ ଦେବାଶିଷ ସ୍ବାଇଁ କଂଗ୍ରେସ ସହ ହାତ ମିଳାଇବା ନେଇ ଚର୍ଚ୍ଚା ହେଉଛି। ଏଥିସହ ଭାଜପାର ୨ କାଉନ୍ସିଲର ମଧ୍ୟ ମିଶିପାରନ୍ତି। କିନ୍ତୁ ଉପାଧ୍ୟକ୍ଷ ପଦବୀ ହାତେଇବାକୁ ସ୍ବାଧୀନ ଓ ଭାଜପା କାଉନ୍ସିଲରମାନେ ଦାବିଦାର ହୋଇପାରନ୍ତି। ଯଦି ସେଭଳି ପରିସ୍ଥିତି ଉପୁଜେ ତେବେ ଭାଜପା କିମ୍ବା ସ୍ବାଧୀନଙ୍କ ମଧ୍ୟରୁ ଜଣଙ୍କୁ ଉପାଧ୍ୟକ୍ଷ କରିବାକୁ କଂଗ୍ରେସ ପଛଘୁଞ୍ଝା ଦେଇ ନ ପାରେ ବୋଲି କୁହାଯାଉଛି। ଆଗକୁ ଦେଖିବାର ଅଛି ଏହି ପଦବୀ କାହା ଦଖଲକୁ ଯାଉଛି।